ތައިލެންޑުގައި ހުންނަވާ ދިވެހި ސަފީރަކަށް، ފުއާދު ތައުފީގް އައްޔަންކުރަން ފެންނަކަމަށް ރައްޔިތުންގެ މަޖިލީހުގެ ތަޅުމުން މިއަދު ރުހުން ދީފިއެވެ.

މިއަދުގެ ޖަލްސާގައި ވަނީ، ފުއާދަށް ރުހުން އޮތްތޯ ބަލަން ޚާރިޖީ ގުޅުންތަކާބެހޭ ކޮމެޓީން ފޮނުވި ރިޕޯޓަށް ވޯޓަށް އަހާފައެވެ.

ފުއާދަށް ރުހުން އޮތްތޯބަލަން ނެގި ވޯޓުގައި 58 މެމްބަރުން ވަނީ ފެންނަކަމަށް ވޯޓު ދެއްވާފައެވެ.

އިލެކްޝަން ކޮމިޝަން (އީސީ)ގެ ކުރީގެ ރައީސް ފުއާދު، ސަފީރު ކަމަށް އައްޔަން ކުރަން މަޖިލީހަށް ފޮނުވާފައިވަނީ މިދިޔަ މަހުގެ 25 ވަނަ ދުވަހު އެވެ.

ފުއާދަކީ ސްޓެޓިސްޓިކްސްގެ ދާއިރާއިން ތައުލީމު ހާސިލުކުރެއްވުމަށްފަހު އެކި ދާއިރާތަކުގައި ސަރުކާރަށާއި ދައުލަތަށް ގިނަ ދުވަހު ހިދުމަތް ކުރައްވާފައިވާ ބޭފުޅެކެވެ. ދެ ފަހަރެއްގެ މަތިން އިލެކްޝަންސް ކޮމިޝަނުގެ ރައީސްކަން ފުއާދުވަނީ ކުރައްވާފަ އެވެ.