ރާއްޖޭގެ 43 ވަނަ މަސްވެރިންގެ ދުވަސް ފާހަގަ ކުރުމަށްޓަކައި ކުޑަކުދިންގެ ހަވީރެއް ބާއްވައިފިއެވެ.

މި ކުޑަކުދިންގެ ހަވީރު ބާއްވާފައިވަނީ މާލޭ އާޓިފިޝަލް ބީޗްގައެވެ. މި ހަވީރުގައި ފިޝަރީސް މިނިސްޓަރ އަހްމަދު ޝިޔާމް ވަނީ މި ކުޑަކުދިންގެ ހަވީރަށް ވަޑައިގެން ކުޑަކުދިންނާ ބައްދަލުކޮށް އެތަނުގައި ބަހައްޓާފަ އެކި ސްޓޯލްތަކަށް ވެސް ޒިޔާރަތްކޮށްފައެވެ.

މެންދުރު ޓީވީ އަށް މައުލޫމާތު ދެއްވަމުން ޝިޔާމް ވިދާޅުވީ މަސްވެރިންގެ ދުވަސް ކުލަގަދަކޮށް ފާހަގަ ކުރުމަށްޓަކާ މި މަހުގ ހަވަނަ ދުވަހުން ފެށިގެން ގިނަ ޕްރޮގްރާމްތަކެއް ދަނީ ކުރިއަށް ގެންދަމުން ކަމަށެވެ. އޭގެ ތެރޭގައި އެމްއެންޔޫގެ ޝެފުންގެ ޓީމަކާއި ގުޅިގެން މަހުން އުފައްދާ ބާވަތްތަކުން ކެއްކުމުގެ މުބާރާތެއްވެސް ވަނީ ކުރިއަށް ގެންގޮސްފައި ކަމަށެވެ. އަދި މަސްވެރިންގެ ދުވަހާ ގުޅޭގޮތުން އެވެއާނެސް ޕްރޮގްރާމްތައްވެސް ދަނީ ކުރިއަށް ގެންދަމުންކަމަށެވެ.

"މަސްވެރިކަން ޕްރޮމޯޓް ކުރުމަށްޓަކައި ރައީސުލްޖުމްހޫރިއްޔާ އުފައްދަވާފަ އެބައޮތް ހާއްސަ ކުންފުންޏެއް. މިއީ ދިވެހި ރާއްޖޭގެ ތާރީހުގައި ފުރަތަމަ ފަހަރަށް މި ސިނާއަތް ކުރިއެރުވުމަށްޓަކައި ވަކި ކުންފުންޏެއް އުފައްދައިގެން މި ސަރުކާރުން މަސައްކަތް މި ކުރައްވަނީ . ރައީސުލްޖުމްހޫރިއްޔާ ފަތުރުވެރިކަމެކޭ އެއްގޮތަށް މަސްވެރިކަމަށް ވެސް ދެއްވާ އަހައްމިއްޔަތުކަން އަޅުގަނޑުމެންނަށް މީގެއިން މި އެންގެނީ ". - ފިޝަރީސް މިނިސްޓަރ އަހްމަދު ޝިޔާމް

މަސްވެރިންގެ ދުވަހާ ގުޅިގެން ކުރިޔަށްގންދާ ހުރިހާ އިވެންޓުތަކަކީ ވެސް ރާއްޖޭގަ މަހުގެ ބާވަތްތަކާ މަސްވެރިކަން ޕްރޮމޯޓުކުރުމަށްޓަކައި ރައީސުލްޖުމްހޫރިއްޔާ ޑރ. މުއިއްޒު އުފެއްދެވި ކުންފުނި ން އިސްނަންގަވައިން އެކުންފުނިން ބާއްވާ އިވެންޓުތަކެވެ.