މި މަހުގެ 10ގައި ފާހަގަކުރި މަސްވެރިންގެ ދުވަހާ ގުޅިގެން، މޯލްޑިވްސް ސީފުޑް ޕްރޮސެސާސް އެންޑް އެކްސްޕޯޓާސް އެސޯސިއޭޝަން (އެމްއެސްޕީއޭ) އިން ޚާއްސަ ކުޑަކުދިންގެ ހަވީރެއް މިއަދު ހަވީރު ބާއްވައިފިއެވެ.

ހުޅުމާލެ ސެންޓްރަލް ޕާކުގައި ބޭއްވި އެ ޚާއްސަ ކުޑަކުދިންގެ ހަވީރު ހުޅުއްވައިދެއްވައި، އެ ކުޑަކުދިންގެ ހަވީރު ޝަރަފުވެރިކޮށްދެއްވީ މަސްވެރިކަމާ ބެހޭ ވަޒީރު އަޙްމަދު ޝިޔާމް މުޙައްމަދުއެވެ. އެ ހަވީރުގައި ވަޒީރު ވަނީ ބައިވެރިވަޑައިގެން، އެކި ސްޓޯލްތަކަށް ޒިޔާރަތްކުރައްވާފައެވެ.

އެ ކުޑަކުދިންގެ ހަވީރާ ގުޅޭގޮތުން އެމްއެސްޕީއޭ ބުނި ގޮތުގައި، އެ ހަވީރު ބާއްވައިފައިވަނީ ވީހާ ވެސް ގިނަ ފަރާތްތަކަށް ބައިވެރިވެވޭ ގޮތަށް ކަމަށާއި، އެ ހަރަކާތް ބާއްވަނީ މަސްވެރިކަމާ ބެހޭ ވުޒާރާ އަދި އެހެނިހެން ފަރާތްތަކާ ވެސް ގުޅިގެން ކަމަށެވެ. އެގޮތުން ހައުސިން ޑެވެލޮޕްމަންޓް ކޯޕަރޭޝަން (އެޗްޑީސީ)، މަސްވެރިކަމާ ބެހޭ ވުޒާރާ، ވެމްކޯ، ސިފައިން އަދި ފުލުހުންގެ ފަރާތުން އެ ހަވީރު ބޭއްވުމަށް ދިން އެހީތެރިކަން އެމްއެސްޕީއޭ އިން ވަނީ ފާހަގަކޮށްފައެވެ.

އެ ކުޑަކުދިންގެ ހަވީރުގައި ފުޑް ސްޓޯލްތަކާއި، މަސްވެރިކަމާ ގުޅުންހުރި އެކި މައުލޫމާތުތައް ލިބޭ ސްޓޯލުތަކުގެ އިތުރުން، ކުޑަކުދިންނަށް ޚާއްސަ ގޭމުތައް ކުޅެވޭ ސްޓޯލުތައް ވަނީ ބަހައްޓާފައެވެ. މީގެ އިތުރުން އެ ހަވީރުގައި ރޮބޯމޭންގެ ހުނަރުތައް ފެނުނުއިރު، ޖާދުގަރުންނާއި އެކި އާޓިސްޓުންގެ ހުނަރު ވެސް ދައްކާފައެވެ.

އެ ހަރަކާތް ކުރިއަށް ދިޔައީ މިއަދު ހަވީރު ހަތަރަކުން އިރުއޮއްސި ހަޔެއް ޖެހުމާ ހަމައަށެވެ.