ސަރުކާރުން މަސައްކަތްކުރަނީ ކުރިއަށް އޮތް ދެ އަހަރުގެ ތެރޭގައި މަސްވެރިން ބާނާ މަހަށް ރަނގަޅު އަގެއް ހޯދައިދީ، މަސްވެރި އާއިލާތަކުގެ ތަނަވަސްކަން އިތުރުކުރުމަށް ކަމުގައި މަސްވެރިކަމާ ބެހޭ ވަޒީރު އަޙްމަދު ޝިޔާމް މުޙައްމަދު ވިދާޅުވެއްޖެއެވެ.

ވަޒީރު އެފަދައިން ވިދާޅުވީ، މަސްވެރިކަމުގެ ދުވަހާ ގުޅިގެން، މިއަދު ސެންޓްރަލް ޕާކުގައި ބޭއްވި ޚާއްސަ ކުޑަކުދިންގެ ހަވީރު ހުޅުއްވައިދެއްވުމަށްފަހު "މެންދުރު ޓީވީ"އަށް ދެއްވި ޚާއްސަ ބަސްދީގަތުމެއްގައެވެ.

އެގޮތުން ވަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތަކީ ރާއްޖޭގައި މަސްވެރިންނަށާއި އަދި އެހެން ދާއިރާތަކަށް ވެސް ހުރި ގޮންޖެހުންތަކަށް ހައްލު ހޯދުމުގެ ސިޔާސަތެއް ކަމަށާއި، އެފަދައިން ޙައްލު ހޯދުމަށް ބޭނުންވާ ފައިސާ ފާއިތުވި އެއް އަހަރުގެ ތެރޭގައި ހޯދިފައިވާ ކަމަށެވެ. އެހެންކަމުން ކުރިއަށް އޮތް ތަނުގައި މަސްވެރިންނަށާއި، މަސްވެރިކަމުގެ ސިނާއަތް ކުރިއަރުވަން ބޭނުންވާ މުހިންމުކަންކަން ކުރެވި، އެ ތަރައްގީގެ ސަބަބުން މަސްވެރިންނަށާއި މަސްވެރި އިންޑަސްޓްރީއަށް ވެސް ބޮޑެތި ފައިދާތައް ލިބޭނެ ކަމުގައި ވަޒީރު ވިދާޅުވިއެވެ.

ރައީސުލްޖުމްހޫރިއްޔާގެ ސިޔާސަތަކީ ރާއްޖޭގައި ހުރި ބޮޑެތި ގޮންޖެހުންތަކަށް ޙައްލު ކުރުމުގެ ސިޔާސަތެއް. އިރާދަކުރެއްވިއްޔާ ފުރަތަމަ އަހަރު ވެގެންދިޔައީ މި ސިޔާސަތުތަކަށް ކޮންޓްރިބިއުޓް ކުރުމަށްޓަކައި އަޅުގަނޑުމެން ބޭނުންވާ ފައިސާ އަޅުގަނޑުމެން ސެކިއާ ކުރަން އަޅުގަނޑުމެން ބޮޑެތި މަސައްކަތްތަކެއް ކުރެވި އަދި އިރާދަކުރެއްވިއްޔާ ހުރި ހުރިހާ މަސައްކަތްތަކެއް ކުރުމަށް ހުރި ފައިސާ އަޅުގަނޑުމެންނަށް ސެކިއާ ކުރެވިއްޖެ. މި ބަލަނީ އިރާދަކުރެއްވިއްޔާ ކުރިއަށް އޮތް ދެ އަހަރު ދުވަހުގެ ތެރޭގައި އަޅުގަނޑުމެން ބޭނުންވާ މުހިންމު ނޫނީ މަސްވެރިކަމުގެ ސިނާއަތް ތަރައްގީކުރަން ބޭނުންވާ މުހިންމު ކަންކަން އަޅުގަނޑުމެންނަށް ޙާސިލްކުރެވި، އެ ފެސިލިޓީތަކުން މަސްވެރިންނަށާއި އަދި މަސްވެރި ސިނާއަތުގެ ބޭފުޅުންނަށް ޚިދުމަތް ލިބިގެންދާނެ ކަމަށް، - މަސްވެރިކަމާ ބެހޭ ވަޒީރު އަޙްމަދު ޝިޔާމް މުޙައްމަދު

ވަޒީރު އިތުރަށް ވިދާޅުވީ، ސަރުކާރުން އެފަދަ މަސައްކަތްތައް ކުރަނީ، މަސްވެރިން ބާނާ މަހަށް ރަނގަޅު އަގެއް ހޯދައިދީ، މަސްވެރި އާއިލާތަކަށް ތަނަވަސްކަން ހޯދައިދިނުގެ މަގްސަދުގައެވެ. އަދި މަސްވެރިކަމުގެ ސިނާއަތަށް ގެނެވޭ ތަރައްގީގެ ސަބަބުން، އެކަން ޙާސިލްވާނެ ކަމަށް ވަޒީރު ވަނީ ވިދާޅުވެފައެވެ.

މަސްވެރިން ބާނާ މަހަށް ރަނގަޅު އަގެއް ލިބި، މަސްވެރި އާއިލާތަކުގެ ތަނަވަސްކަން އިތުރުވެގެންދާނެ އިނގޭތޯ - މަސްވެރިކަމާ ބެހޭ ވަޒީރު އަޙްމަދު ޝިޔާމް މުޙައްމަދު

ވަޒީރު އެފަދައިން ވިދާޅުވިއިރު، މި ސަރުކާރު އައި އިރު މަސްވެރިންނަށް ނުދެވި ހުރި ހުރިހާ ފައިސާއެއް މިހާރު ވަނީ ދައްކައި ޚަލާސްކޮށްފައެވެ. އެގޮތުން މިދިޔަ ހަފުތާގެ ތެރޭގައި ވެސް މަސްވެރިންނަށް 38 މިލިއަނަށް ވުރެ ގިނަ ރުފިޔާ ދީ ޚަލާސްކޮށްފައިވާއިިރު, 48 ގަޑިއިރުގެ ތެރޭގައި ކިރާ މަހަށް ފައިސާ ލިބޭނެ ގޮތް ވެސް ސަރުކާރުން ވަނީ ފަހިކޮށްދީފައެވެ.