ބުރާސްފަތި ދުވަހުގެ އަލިފާނުގެ ޙާދިސާގައި ހައުސިންގެ އެއްވެސް ޑޭޓާއެއް ގެއްލިފައިނުވާ ކަމުގައި އުމްރާނީ ތަރައްގީ އާ ބެހޭ ވަޒީރު ޑރ. އަބްދުﷲ މުއްތަލިބް ވިދާޅުވެއްޖެއެވެ.

ބުރާސްފަތި ދުވަހު ހިނގި އަލިފާނުގެ ޙާދިސާއާ ގުޅިގެން ސަރުކާރުގެ ވަޒީރުންނާއި މުއައްސަސާތަކުގެ ވެރިން މިއަދު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ޑރ. އަބްދުﷲ މުއްތަލިބް ވިދާޅުވީ އެ ދުަވަހުގެ އަލިފާނުގައި ގިނަ ޑޭޓާތަކެއް ގެއްލުނުކަމަށް އާންމުންގެ ތެރޭގައި ވާހަކަ ދެކެވުނު ނަމަވެސް، ގިނަ ޑޭޓާތަކެއް ސްޓޯކުރެވިފައިވާ ކަމަށާއި، އޭގެ ތެރެއިން ގެއްލުނު ޑޭޓާތައް ދެނެގަތުމުގެ މަސައްކަތް މިހާރު ވެސް ކުރަމުންދާ ކަމަށެވެ.

އަދި އޭގެ ތެރޭގައި ސީދާ ރައްޔިތުންނާ ގުޅުންހުރި މަސައްކަތްތަކުގެ ތެރެއިން ހައުސިންގެ އެއްވެސް މައުލޫމާތެއް ގެއްލިފައިނުވާ ކަމަށް ވަޒީރު ވިދާޅުވިއެވެ.

އޭގެ ތެރޭގައި ސީދާ ރައްޔިތުންނާ ގުޅުންހުރި މަސައްކަތްތަކަށް ބަލާއިރު ހައުސިންއާ ގުޅުންހުރި އެއްވެސް އިންފޮމޭޝަންއެއް ގެއްލިފައި ނުވާކަމަށް މިހާރު ވެސް އެބަ ހުރި ކަމަށް އަޅުގަނޑަށް ޔަގީންކުރެވޭ، - އުމްރާނީ ތަރައްގީ އާ ބެހޭ ވަޒީރު ޑރ. އަބްދުﷲ މުއްތަލިބް

މީގެ އިތުރުން، އާދިއްތަ ދުވަހު އޮފީސްތައް ހުޅުވަން ވާއިރަށް، ތިން ވުޒާރާގެ ވެސް ގިނަ މަސައްކަތްތައް ކުރިއަށް ގެންދެވޭނެ ވަރަށް ދަރުބާރުގޭގައި މަސައްކަތްތައް ނިމިފައިވާ ކަމަށް ވަޒީރު ވިދާޅުވިއެވެ. އެގޮތުން ދަރުބާރުގޭގެ ތިން ހޯލުގައި ތިން ވުޒާރާއަށް ތިބެވޭ ވަރަށް ޖާގަ އެބަހުރި ކަމަށާއި، އެ މަސައްކަތް ކުރަމުންދަނީ ސަރުކާރުގެ އެކި އިދާރާތަކާއި އަދި އެކި ކުންފުނިތަކުގެ އެހީއާއެކު، ގުޅިގެން ކަމަށެވެ.

ހައުސިން މިނިސްޓްރީގައި ހިނގި އަލިފާނުގެ ހާދިސާ -- މެންދުރު ފޮޓޯއަދި ޗައިނާ އެމްބަސީގެ ފަރާތުން ސަރުކާރަށް ހަވާލުކޮށްފައި ހުރި ބައެއް ޕީސީތައް ވެސް އެ ވުޒާރާތަކުގައި ބޭނުންކުރާ ކަމަށް ވަޒީރު ވިދާޅުވިއެވެ.

ވަޒީރުގެ އިތުރުން، ކޮމިޝަނާ އިފް ޕޮލިސް އަލީ ޝުޖާއު ވިދާޅުވީ، އެ ހާދިސާ ހިނގި ގޮތުގެ ފުރިހަމަ ތަހުގީގެއް ހިންގާނެ ކަމަށާއި، އެ ތަހުގީގުގައި ބޭރުގެ ފަރާތްތަކުގެ އެހީތެރިކަން ވެސް ހޯދާނެ ކަމަށެވެ. އަދި މިހާރު ވެސް ފޮރެންސިކްސްގެ މަސައްކަތްތައް އެ ސަރަހައްދުގައި ކުރަމުންދާ ކަމުގައި ޝުޖާއު ވިދާޅުވިއެވެ.

ބުރާސްފަތި ދުވަހުގެ ހެނދުނު 7 ޖެހިއިރު ރޯވި އަލިފާންގަނޑު، އެމްއެންޑީއެފް އަދި ގުޅުން ހުރު އިދާރާތަކުގެ މަސައްކަތުން ނިންމާލެވުނީ އެދުވަހުގެ މެންދުރު 12ގެ ފަހުންނެވެ. އެ ހާދިސާގައި ހައުސިން މިނިސްޓްރީ އަދި ކޮންސްޓްރަކްޝަން ހިމެނޭ ޓިނު އިމާރާތައި، އެންވަޔރަމެންޓް މިނިސްޓްރީ ހިމެނޭ ގްރީން ބިލްޑިންގެ އިތުރުން، މާލެ ސިޓީ ކައުންސިލު ހިންގާ ބޮލްކެއްގައި ވެސް ވަނީ ރޯވެފައެވެ. އޭގެ ތެރެއިން 2008 ވަނަ އަހަރު ވަގުތީ ގޮތުން އިމާރަތް ކުރި ޓިނު އިމާރާތް ވަނީ އަނދާ ހުލިވެފައެވެ