މިދިޔަ ބުރާސްފަތި ދުވަހު ހައުސިން މިނިސްޓްރީ ހިމެނޭހެން ތިން މިނިސްޓްރީއެއްގައިހިނގި އަލިފާނުގެ ހާދިސާ ތަހުގީގު ކުރުމަށް ރާއްޖެއިން ބޭރުގެ ތަހުގީގު ޓީމެއްގެ އެހީތެރިކަން ހޯދުމަށް ނިންމާފައިވާ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެ އެވެ.

އަލިފާނުގެ ހާދިސާއާ ގުޅޭ އެންމެ ފަހުގެ މައުލޫމާތު ހިއްސާކުރުމަށް މިއަދު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ސީޕީ ވިދާޅުވީ އަލިފާނުގެ ހާދިސާ އެންމެ ފުރިހަމައަށް ތަހުގީގު ކުރާނެ ކަމުގެ ޔަގީންކަން ދެއްވާ ކަމަށެވެ. ޕޮލިސްސާވިސްގެ ފޮރެންސިކް ޓީމުން މިހާރުވެސް އެތަނުގައި ހަރަކާތްތެރި ވަމުންދާ ކަމަށާ އެތަނުން ނަގަން ޖެހޭ ސަމްޕަލްތައް ނެގުމުގެ މަސައްކަތް ކުރިއަށްދާ ކަމަށް ސީޕީ ވިދާޅުވި އެވެ.

އަލިފާނުގެ ހާދިސާ ހިނގާ ދިޔަގޮތް އެންމެ ފުރިހަމައަށް ތަހުގީގު ކުރުމަށް ރާއްޖޭން ބޭރުގެ ތަހުގީގު ޓީމެއްގެ އެހީތެރިކަން ހޯދަން ނިންމާފައިވާ ކަމަށާ އެ ޓީމުން ކުރިއަށް އޮތް ދެތިން ދުވަހުގެ ތެރޭގައި މޯލްޑިވްސް ޕޮލިސްސާވިސްގެ ތަހުގީގު ޓީމާ ގުޅޭޅޭނެ ކަމަށް ސީޕީ ވިދާޅުވި އެވެ. ތަހުގީގު އަވަސް ކުރުމަށް ކަމާ ގުޅުން ހުރި އިދާރާތަކާ ގުޅިގެން މަސައްކަތްތައް ކުރިއަށް ގެންދާ ކަމަށް ސީޕީ ވިދާޅުވި އެވެ.

ބޭނުމަކީ މިވަރު ބޮޑު އަލިފާނެއްގެ ހާދިސާއެއް އެ ހިނގި ގޮތް ރައްޔިތުންނަށްވެސް އިންގެން ބޭނުންވާނެ އަދިި ހަމަ އެއާ އެއްކޮށް ކުރިއަށް އޮތް ތަނުގަ މިފަދަ ހާދިސާތަކުން ރައްކާތެރިވުމަށްޓަކާވެސް މިގޮތަށް ހިންގޭ ތަހުގީގުތަކުން ލިބޭ މައުލޫމާތަކީ މުހިންމު މައުލޫމާތަކަށް ވާނެ ތީވެ އެކަން ކުރާނަށް

ސީޕީ އިތުރަށް ވިދާޅުވީ މޯލްޑީވްސް ޕޮލިސް ށަވިސްގެ ފޮރެންސިކް ޓީމުން އަލިފާނުގެ ހާދިސާ ހިނގިތަނުން އެއްކުރަން ޖެހޭ ސާމްޕަލްތައް އެއްކޮށް ތަހުގީގު ބާރު ސްޕީޑްގައި ކުރިއަށް ގެންދާ ކަމަށެވެ. ތަނުގެ ވަށައިގެން ހުރި ސީސީޓީވީ ފޫޓްއޭޖް ނަގާ އެނަލަސިސް ކުރުމުގެ މަސައްކަތް ތަހުގީގު ޓީމުތަކުން މިހާރު ކުރިއަށް ގެންދާ ކަމަށް ސީޕީ ވިދާޅުވި އެވެ.

އެންމެ ފުރަތަމަ އެ މަންޒަރު ދުށް މީހުންނާއި އަލިފާނުގެ ހާދިސާ ހިނގި ވަގުތު މިނިސްޓްރީ ތެރޭގައި ތިބި މީހުންގެ ބަޔާން ނެގުމުގެ މަސައްކަތްވެސް ކުރިއަށް ގެންދާ ކަމަށެވެ. އަދި ހާދިސާގެ މައުލޫމާތު އެންމެ ފުރަތަމަ ލިބޭނެ ކަމަށް ގަބޫލުކުރެވޭ މީހުން ހޯދާ އެފަރާތްތަކާ ސުވާލު ކުރުމުގެ މަސައްކަތްވެސް ކުރިއަށް ގެންދާ ކަމަށް ސީޕީ ވިދާޅުވި އެވެ.

މި އަލިފާނުގެ ހާދިސާގައި ތިން މިނިސްޓްރީއެއް ހިންގި އިމާރާތަށް ގެއްލުންވެފައިވާއިރު، އެ މިނިސްޓްރީތަކުގެ ޚިދުމަތްތައް ވަގުތީ ގޮތުން ވަނީ މެދުކެނޑިފައެވެ. އެހެންކަމުން، އަލުން ޚިދުމަތްތައް ފެށުމަށްޓަކައި ދަރުބާރުގޭގައި ވަގުތީ އޮފީސްތައް ގާއިމުކޮށް، ޚިދުމަތްތައް ފެށުމުގެ މަސައްކަތް ދަނީ ކުރަމުންނެވެ.

ބުރާސްފަތި ދުވަހުގެ ހެނދުނު 7 ޖެހިއިރު ރޯވި އަލިފާންގަނޑު، އެމްއެންޑީއެފް އަދި ގުޅުން ހުރު އިދާރާތަކުގެ މަސައްކަތުން ނިންމާލެވުނީ އެދުވަހުގެ މެންދުރު 12ގެ ފަހުންނެވެ. އެ ހާދިސާގައި ހައުސިން މިނިސްޓްރީ އަދި ކޮންސްޓްރަކްޝަން ހިމެނޭ ޓިނު އިމާރާތައި، އެންވަޔރަމެންޓް މިނިސްޓްރީ ހިމެނޭ ގްރީން ބިލްޑިންގެ އިތުރުން، މާލެ ސިޓީ ކައުންސިލު ހިންގާ ބޮލްކެއްގައި ވެސް ވަނީ ރޯވެފައެވެ.