އެއާޕޯޓު ބާރުބޮޑުވުމުގެ ސަބަބުން ފަސިންޖަރުން ފުރުމުގެ ތިން ގަޑިއިރު ކުރިން އެއާޕޯޓަށް ދިޔުމަށް، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސްކޮށްފިއެވެ.

އެމްއޭސީއެލުން އެކްސްގައި ކުރި ޕޯސްޓެއްގައި ބުނީ ބަންދާ ދިމާކޮށް އުމްރާއަށް ދާ މީހުން ފުރާތީ އެއާޕޯޓުގެ މަގުތަކާއި ޓާމިނަލްގައި ޓްރެފިކް ބާރު ބޮޑުވާނެ ކަމަށެވެ. އެހެންކަމުން ފުރުމުގެ ތިން ގަޑިއިރު ކުރިން ފަސިންޖަރުން އެއާޕޯޓަށް އައުމަށް ވަނީ އިލްތިމާސްކޮށްފައެވެ.

އަދި އެއާޕޯޓު މުވައްޒަފުންގެ އިރުޝާދުތަކާ އެއްގޮތަށް އަމަލުކުރުމަށް އެމްއޭސީއެލް ވަނީ އެދިފައެވެ.

މި ދުވަސްވަރަކީ ސްކޫލް ބަންދު ދުވަސްކޮޅަކަށްވާތީއާއި ފަތުރުވެރިކަމުގެ ސީޒަންކަމަށްވާތީ ރާއްޖެ އަންނަ މީހުންނާއި ފުރާ މީހުންގެ އަދަދު ވެސް ވަނީ އިތުރުވެފައެވެ.