މުޅި ރާއްޖެއަށް މޫސުން ގޯސްވާނެކަމަށް ލަފާކޮށް މޫސުމަށް ސަމާލުވުމަށް މޫސުމާ ބެހޭ ގައުމީ އިދާރާއިން އިލްތިމާސްކޮށްފިއެވެ.

މޫސުމާއި ބެހޭ އިދާރާއިން ބުނީ، ހުޅަނގުދެކުނާއި ހުޅަނގުން ، އުތުރު އަތޮޅުތަކަށް ގަޑިއިރަކު 6 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި އެހެން ހިސާބުތަކަށް ގަޑިއަކު 13 މޭލާއި 23 މޭލާއި މެދުގެ ބާރުމިނުގައި ވައި ޖެހޭނެ ކަމަށެވެ. އަދި ވިލާގަނޑުގައި، ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާ ކަމަށް ވެސް ވަނީ ބުނެފައެވެ.

މީގެ އިތުރުން އުތުރު އަތޮޅު ތަކުގެ ކަނޑުތައް އާދައިގެ ވަރަކަށް ގަދަވެ އެހެން ހިސާބުތަކުގެ ކަނޑުތައް ވެސް ގަދަވެ ވިލާގަނޑުގައި ކަނޑުތައް އިތުރަށް ގަދަވާނެއެވެ. އަދި އުތުރުގެ ރާޅުގެ އުސްމިން 3-5 ފޫޓު، މެދުރާއްޖެތެރެއާއި ދެކުނު 6-8 ފޫޓު ހުންނާނެއެވެ .

މުޅި ރާއްޖެއަށް ވެސް މޫސުން ގޯސްވާނެތީވެ، ކަނޑުދަތުރުފަތުރުކުރާ ފަރާތްތަކުން މޫސުމަށް ސަމާލުވުމަށް އެ އިދާރާއިންވަނީ އިލްތިމާސްކޮށްފައެވެ.