ދިވެހިރާއްޖޭގެ ޒަކާތު ފަންޑުން ޣައްޒާގެ ރައްޔިތުންނަށް ހަދިޔާކުރުމަށް ނިންމާފައިވާ އެއްލައްކަ ޑޮލަރުގެ އެހީގެ ތަކެތި ޣައްޒާއަށް ފޮނުވައިފިއެވެ.

އެ ފައިސާ ޤަތަރުގެ ރެޑް ކްރެސެންޓާ ހަވާލުކުރުމަށް އިސްލާމީ ކަންތައްތަކާ ބެހޭ ވުޒާރާއާއި ޤަތަރު ރެޑް ކްރެސެންޓް ސޮސައިޓީއާއި ދެމެދު އެއްބަސްވުމުގައި ސޮއިކުރެއްވީ މިދިޔަ ނޮވެމްބަރު މަހުގެ ތެރޭގައެވެ.

Ad by Hajj Corporation

ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ރާއްޖޭގެ ޒަކާތު ފަންޑުން ގައްޒާއަށް ކާބޯތަކެތީގެ އެހީތެރިކަން ފޯރުކޮށްދިނުމަށް މަސައްކަތް ކުރަމުންދާކަން މީގެ ކުރިން ވުޒާރާއިން ހާމަކުރިއެވެ.ޒަކާތު ފަންޑަކީ ފަގީރުންނާ މިސްކީނުންނަށް އެހީވާން، އިސްލާމިކް މިނިސްޓްރީގައި އުފައްދާފައިވާ ފަންޑެކެވެ. އެ ފަންޑުގެ ހިންގުން ވަރުގަދަ ކުރުމަށް ޒަކާތު ހައުސްގެ ނަމުގައި އިދާރާއެއް ވެސް ގާއިމުކޮށްފަ އެވެ.

މިއީ ޒަކާތު ފަންޑުން، ރާއްޖޭން ބޭރުގެ ބަޔަކަށް އެހީވާ ފުރަތަމަ ފަހަރެވެ.

އިސްލާމީ ކަންތައްތަކާ ބެހޭ ވުޒާރައިން ހާމަކުރާގޮތުގައި މި ފައިސާހަވާލުކުރުމަށް ހަމަޖެހިފައިވަނީ ދެ ޕޭމަންޓަކަށް ބަހާލައިގެންނެވެ. ޒަކާތު ފަންޑުން ދޭ އެއް ލައްކަ ޑޮލަރު ހަރަދުކުރުމަށް ހަމަޖެހިފައިވަނީ ޣައްޒާގެ ރައްޔިތުންނަށް ސާފު ބޯފެން ފޯރުކޮށްދިނުމަށް ކުރެވެމުންދާ މަސައްކަތްތަކަށެވެ.

ޒަކާތު އެހީގެ ދަށުން މިހާރު ވޯޓާ ސަޕްލައި ޕްރޮޖެކްޓެއް ޣައްޒާގައިި ލޯންޗްކޮށްފައިވާކަމަށާއި މީގެ ތެރެއިން 6،000 ފުޅީގެ ފެން އަލް ޝިފާ ހޮސްޕިޓަލާއި އަލް ހަޔާތް ހޮސްޕިޓަލުގައި ތިބި ޒަހަމްވެގެން ފަރުވާ ހޯދަމުންދާ މީހުންނަށާއި ބަލި މީހުންނަަށް ބަހާފައިވާކަމަށް ޤަތަރުގެ ރެޑް ކްރެސެންޓުން މައުލޫމާތުދެއެވެ. އަދި ބާކީ 50،000 ފެން ފޮށިގަނޑު 60،000 ޣައްޒާގެ ރައްޔިތުންނަށް ބަހަން ނިންމާފައިވާ ކަމަށް ވެސް ޤަތަރުގެ ރެޑް ކްރެސެންޓުން ބުނެއެވެ.