ތުރުކީވިލާތުގެ ފެކްޓްރީއެއްގައި އެއްޗެއް ގޮވައި ބަޔަކު މަރުވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތުރުކީވިލާތުގެ ރައީސް ރަޖަބް ޠައްޔިބު އުރްދުޣާނަށް ތަޢުޒިޔާގެ މެސެޖެއް ފޮނުއްވައިފިއެވެ.ރައީސުލްޖުމްހޫރިއްޔާގެ ތަޢުޒިޔާ މެސެޖުގައި ތުރުކީގެ ބްލިކެސިރް ސަރަހައްދުގައި ހުރި ހަނގުރާމައިގެ އާލާތްތައް އުފައްދާ ފެކްޓްރީއެއްގައި އެއްޗެއް ގޮވައި، 12 މީހުން މަރުވެ ގިނަ ބަޔަކު ޒަހަމްވި ހާދިސާ ހަބަރު އަޑުއެއްސެވީ ފުން ހިތާމައާއެކުކަމަށް ވިދާޅުވެ ތުރުކީގެ ރައީސަށާއި އެ ގައުމުގެ ރައްޔިތުންގެ އިތުރުން އެ ހާދިސާގައި މަރުވި މީހުންނާއި ޒަހަމްވި މީހުންގެ ޢާއިލާތަކަށް ވަނީ ތަޢުޒިޔާ ވިދާޅުވެފައެވެ. މި މެސެޖު ނިންމަވާލައްވަމުން ދިވެހި ސަރުކާރާއި ދިވެހި ރައްޔިތުންގެ ފަރާތުން ހާދިސާގައި ޒަހަމްވި އެންމެންނަށް އަވަސް ޝިފާއަކަށް އެދިވަޑައިގަންނަވާކަމަށް ވިދާޅުވެފައިވެއެވެ.

މިހާދިސާގައި 12 މީހަކު މަރުވެ 4 މީހަކު ޒަހަމްވެފައިވާކަމަށް އަލްޖަޒީރާއިން ރިޕޯޓުކުރެއެވެ.

ހާދިސާ ހިނގަން މެދުވެރިވީ ސަބަބު ހޯދުމަށް މިހާރު ކަމާ ގުޅުން ހުރިމ އިދާރާތަކުން އެ ސަރަހައްދުގައި ހަރަކާތްތެރިވަމުން އަންނައިރު ހާދިސާ ހިނގީ ތުރުކީއަށް ހެނދުނުގެ ވަގުތުގައިކަމަށް މައުލޫމާތުލިބެއެވެ.

މި ހާދިސާ ހިނގާފައިވަނީ ވެރިރަށް އަންކާރާ ކައިރީގައި އޮންނަ ތުރުކީގެ ދައުލަތުގެ ޑިފެންސް ކުންފުންޏަކަށް ދިން ހަމަލާއެއްގައި ފަސް މީހުން މަރުވެ 22 މީހުން ޒަޚަމްވިތާ ދެ މަސް ފަހުންނެވެ.