ކިންގްސް ކެޕިޓަލް އިންވެސްޓްމަންޓް އިން ހިންގި ސްކީމެއްގެ ތެރެއިން ގިނަ ބައެއްގެ އަތުން ފައިސާ އަތުލި މައްސަލާގައި ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީގެ އާއި އޭނާގެ ދެ ކޮއްކޮގެ މައްޗަށް ކުރާ ދައުވާތައް ރިވިއުކޮށް ދައުވާއަށް ބަދަލެއް ގެންނަން ނުޖެހޭ ކަމަށް ނިންމާ އެމައްސަލަ ކުރިއަށް ގެންދަން ޕްރޮސެކިއުޓާ ޖެނެރަލް (ޕީޖީ) އަހުމަދު އައްބާސް ޝަރީފް ނިންމަވައިފި އެވެ.

ކިންގްސް ކެޕިޓަލްސްއިން ގިނަ ބައެއްގެ އަތުން ފައިސާ ނަގައިގެން ހިންގި ސްކީމްގެ މައްސަލާގައި ދައުވާ ކުރަނީ އަލްހާންއާއި އޭނާގެ ކޮއްކޮ މީޑިއާ ކައުންސިލުގެ ކުރީގެ ރައީސް ސަހުބާން ފަހުމީގެ އިތުރުން ސ. ފޭދޫ, ބޮންތި, ޝަޒްބާން ފަހުމީގެ މައްޗަށެވެ. އެމައްސަލާގައި އެއިން ކޮންމެ މީހެއްގެ މައްޗަށް ޓެކުމުގެ 13 ދައުވާއެއް ދައުލަތުން ކުރެ އެވެ.

މިދިޔަ އޮކްޓޫބަރު މަހުގެ 3 ވަނަ ދުވަހު ބޭއްވި އަޑު އެހުމުގައި އަލްހާންއާއި އޭނާގެ 2 ކޮއްކޮގެ ފަރާތުން ވަނީ އެ ދައުވާތައް ރިވިއުކުރަން ހުށަހަޅަން ނިންމާފައިވާ ކަމަށް ބުނެފަ އެވެ.

އެމައްސަލަ ރިވިއުކުރަން އެދުމުން ޕީޖީ އޮފީހުން ބުނެފައި ވަނީ އެމައްސަލާގައި ދައުވާ ބަދަލުކުރަން ޖެހޭ އެއްވެސް ހާލަތެއް ނެތް ކަމަށެވެ.

މައްސަލާގައި ލިބިފައި ހުރި ހެއްކާއި ގަރީނާއާއި އެމައްސަލަ މުރާޖާކުރުމަށް އެދި ހުށހަޅާފައި ހުރި ލިޔެކިޔުންތަކުން މައްސަލާގައި ހިމެނޭ ދައުވާތައް މުރާޖައާކޮށް، އެ ދައުވާތަކަށް ބަދަލެއް ގެންނަންޖެހޭފަދަ ސަބަބެއް ނުވަތަ ހާލަތެއް އޮތްކަމަށް ނުފެންނަކަމަށް ޕްރޮސިކިއުޓާ ޖެނެރަލް އަހުމަދު އައްބާސް ޝަރީފް ނިންމަވާފައިވާ ކަމަށް ޕީޖީ އޮފީހުން ބުނެ އެވެ.

ކިންގްސް ކެޕިޓަލް އިންވެސްޓްމަންޓް އިން ހިންގި ސްކީމެއްގެ ތެރެއިން ގިނަ ބައެއްގެ އަތުން ފައިސާ ހޯދާ އެ ފައިސާ ލޯންޑާކޮށްފައިވާ މައްސަލައިގައި އަންހާންގެ ތިން ބެއިންގެ މައްޗަށް ކޮންމެ މީހަކަށް 13 ދައުވާ އުފުލާފައިވަނީ 2023 ވަނަ އަހަރުގެ ނޮވެމްބަރު 23 ގަ އެވެ. އެސްކީމަށް ގިނަ ދިވެހީން ވަނީ އިންވެސްޓް ކޮށްފަ އެވެ. ގާތްގަނޑަކަށް 98 މިލިއަނަކަށް ވުރެ ގިނަ ރުފިޔާ އެކި މީހުން އޭރު އިންވެސްޓް ކުރިއެވެ.