މިއަހަރަކީ އަދާ ހަމައަށް ޒަކާތު ފަންޑަށް އެންމެ ގިނަ ރުފިޔާ ލިބިފަިވާ އަހަރެވެ.

ރާއްޖޭގެ ތާރީޚުގައި އަލަށް 98.6 މިލިއަން ރުފިޔާ ޒަކާތުގެ ގޮތުގައި ލިބިފައިވާއިރު، އިސްލާމީ ކަންތައްތަކާ ބެހޭ ވުޒާރާގެ އަމާޒަކީ އަހަރަކު މަދުވެގެން 100 މިލިއަނަށް ފަންޑު އެރުވުމެވެ. އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެފައިވަނީ މި ފަންޑުގެ ޒަރިއްޔާއިން ޝަރުޢީ އަސާސްގެ އަލީގައި ޒަކާތުގެ ޙަައްޤުވެރިންނަށް ފުޅާދާއިރާއެއްގައި އެހީތެރިވާންވެސް އަޒުމުކުރާކަމެވެ.

މިއީ ރައީސް ޑރ. މުައިއްޒުގެ ސަރުކާރުން ޒަކާތުގެ ޙާއްސަ އިދާރާއެއް އުފެއްދުމުގެ ހެޔޯ ނަތީޖާކަމަށްވެސް ވަޒީރު ވަނީ ވިދާޅުވެފައެވެ.

ޒަކާތު ފަންޑަކީ ފަގީރުންނާ މިސްކީނުންނަށް އެހީވާން، އިސްލާމިކް މިނިސްޓްރީގައި އުފައްދާފައިވާ ފަންޑެކެވެ. އެ ފަންޑުގެ ހިންގުން ވަރުގަދަ ކުރުމަށް ޒަކާތު ހައުސްގެ ނަމުގައި އިދާރާއެއް ވެސް ގާއިމުކޮށްފަ އެވެ.

މޯލްޑިވްސް ޒަކާތު ހައުސްގެ ނަމުގައި ސަރުކާރުގެ އިދާރާއެއް ގާއިމުކުރެއްވީ، ދިވެހިރާއްޖޭގެ ޒަކާތުގެ ނިޒާމު ހަރުދަނާކޮށް، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ހަމަޖެއްސުމަށެވެ.