ރާއްޖެއަށް މަސްތުވާތަކެތި އެތެރެކުރި މައްސަލައެއްގެ ތުހުމަތުގައި އިންޑިއާގެ ދެ މީހަކު ހައްޔަރުކޮށްފިއެވެ.

މި ދެމީހުން ހައްޔަރުކުރީ ކަސްޓަމްސްއިން ހިންގި އޮޕަރޭޝަނެއްގައި ވެލާނާ އިންޓަނޭޝަނަލް އެއަރޕޯޓު (ވީއައިއޭ) އިންނެވެ.

Ad by Hajj Corporation

މި މީހުންގެ މައްޗަށް ކްރިމިނަލް ކޯޓުން ނެރެފައިވާ ބަންދުގެ އަމުރުގައިވާގޮތުން، މި މައްސަލައިގައި ހައްޔަރުކޮށްފައިވަނީ 30 އަހަރުގެ ސައްޑާމް ހުސައިން އާއި 31 އަހަރުގެ އެމް.ޑީ ތަމަންނާ އެވެ.

ކްރިމިނަލް ކޯޓުގެ ބަންދު އަމުރުގައިވާ ގޮތުން، މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވަނީ އެމް.ޑީ ތަމަންނާގެ ލަގެޖުންނެވެ.

އެމް.ޑީ ތަމަންނާ ބުނެފައިވަނީ އެ ތަކެއްޗަކީ އޭނާއާ މީހަކު ހަވާލުކުރި ތަކެތި ކަމަށެވެ. އަދި ސައްޑާމް ހުސައިން އަކީ ކޮންޓްރޯލް ޑެލިވަރީ އޮޕަރޭޝަންގެ ތެރެއިން އެ ތަކެއްޗާ ހަވާލުވާން އައި މީހާ ކަމަށް ކޯޓު އަމުރުގައި ބަޔާންކޮށްފައިވެއެވެ.

ސީންގައި ސައްޑާމް ހުސައިން ބުނެފައިވަނީ އެ މަސްތުވާތަކެއްޗަކީ އޭނާ ބޭނުންކުރަން ގެނައި ތަކެތި ކަމަށެވެ.

މި މައްސަލައިގެ ތަޙްޤީޤު ކުރިއަށްދާއިރު، ދެ މީހުންގެ ބަންދުގެ މުއްދަތުގެ ގޮތުގައި ކްރިމިނަލް ކޯޓިން ވަނީ 30 ދުވަސް ޖަހާފައެވެ.