ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެމްބަރު ޢަލީ ޙަމީދުގެ މަސްލަހަތު އޮންނަ ކުންފުންޏަކަށް 44 މިލިއަން ރުފިޔާ ދޫކޮށްފައިވާ ކަމަށް ބުނާ މައްސަލަ އަވަސް ކުރުމަށް ޕްރޮސެކިއުޓާ ޖެނެރަލްގެ އޮފީހުން ފުލުހުންނަށް އަންގައިފި އެވެ.

ޕީޖީ އޮފީހުން ބުނީ ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެމްބަރު ޢަލީ ޙަމީދުގެ މަޞްލަހަތު އޮންނަ ކުންފުންޏެއް ކަމަށްވާ ނޯތު ކޯސްޓް ކޮންސްޓްރަކްޝަން ޕްރައިވެޓްލިމިޓެޑަށް ހަވާލުކޮށްފައިވާ ޕްރޮޖެކްޓަކާ ގުޅިގެން، 2023 ވަނަ އަހަރު 44 މިލިއަން ރުފިޔާ ދޫކޮށްފައިވާކަމަށް ތުހުމަތުކުރެވޭ މައްސަލަ ރައްޔިތުންގެ މަޖިލީހުގެމާލިއްޔަތު ކޮމިޓީއިން ބަލާ ފުލުހަށް ހުށަހަޅާފައިވާ ކަމަށެވެ.

މި މައްސަލައަކީ ދިވެހި ދައުލަތާއި، ރައްޔިތުންގެ އާންމު މަސްލަހަތު މަތީ ދަރަޖައަކަށް އޮތް ހައްސާސް މައްސަލައެއްކަމަށް ވެސް ޕީޖީ އޮފީހުން ބުނެ އެވެ. އެހެންވީމާ މި މައްސަލައަށްއިތުރު ސަމާލުކަމެއްދީ މައްސަލައަށް ޚާއްސަ ތަޙުޤީޤު ޓީމެއް އެކުލަވާލުމާށް ޕީޖީ އޮފީހުން ފުލުހަށް ވަނީ އަންގާފަ އެވެ.

މީގެ އިތުރުން އަވަސް މައްސަލައެއްގެ ގޮތުގައި މިމައްސަލަ ކުރިއަށްގެންގޮސް ތަހުގީގު އަވަސްކުރުމަށް ވެސް ޕީޖީ އޮފީހުން ފުލުހަށް ވަނީ އަންގާފަ އެވެ.

އަދި މި މައްސަލައިގައި ހިމެނޭ ފަރާތްތަކާ ގުޅޭ މި ބާވަތުގެ އިތުރު ޕްރޮޖެކްޓެއްވާނަމަ އެކަންކަންވެސް މި މައްސަލައިގެ ތެރެއިން ތަޙުޤީޤު ކުރުމަށް ޕީޖީ ވަނީ ފުލުހުންނަށް އަންގާފަ އެވެ.