ހުޅުމާލެ ދެ ވަނަ ފިޔަވަހީގައި ފުލުހުންގެ ކާރަކާ ސައިކަލެއް ޖެހި ހިނގި ނުރައްކާތެރި އެކްސިޑެންޓުގައި އަނިޔާވި 18 އަހަރުގެ ޒުވާނާއަށް އަދިވެސް އޮތީ ވެންޓިލޭޓަރުގައި ކަމަށް އައިޖީއެމް ހޮސްޕިޓަލުން މިއަދު ބުނެފި އެވެ.

އެ އެކްސިޑެންޓް ހިނގީ ފުލުސް ކާރު ގުލްއަލާމަގު، އިރުން ހުޅަނގަށް ނިރޮޅުމަގު ހުރަސްކުރި ވަގުތު ބާރު ސްޕީޑުގައި ނިރޮޅުމަގުން އުތުރުން ދެކުނަށް ދުއްވާފައި އައި ސައިކަލަކާ ޖެހިގެން ކަމަށް ފުލުހުން މައުލޫމާތު ދީފައިވެ އެވެ.

އެރޭ ހިނގާފައިވާ ނުރައްކާތެރި އެކްސިޑެންޓްގައި ހިމެނޭ ސައިކަލު ދުއްވި މީހާއަށް ބޮޑެތި އަނިޔާތަކެއްވެފައިވާ ކަމަށް ފުލުހުން ބުންޏެވެ. އެކްސިޑެންޓުގައި އަނިޔާވި ޒުވާނާ، އެއްގަމު ދަތުރުފަތުރު ކުރުމުގެ ގާނޫނާ ހިލާފުވެގެން އެ ގާނޫނުގެ ދަށުން ޑިސެންބަރު 21 ވަނަ ދުވަހު ލައިސަންސް ހިފަހައްޓާފައިވާ ކަމަށް ފުލުހުން ބުނެފައިވެ އެވެ.

ފުލުހުން ބުނީ، އެ އެކްސިޑެންޓް ހިނގާފައިވަނީ 27 ވަނަ ދުވަހުގެރޭ ދަންވަރު 01:45 ހާއިރު ހުޅުމާލެ ފޭސް 2 ގެ ނިރޮޅުމަގާއި ގުލްއަލާމާހިނގުން ގުޅޭ ހިސާބުގައި ފުލުހުންގެ ކާރަކާއި ސައިކަލެއް ޖެހިގެން ކަމަށެވެ.

އަދި މިއަދު ފުލުހުން ވަނީ އެ އެކްސިޑެންޓް ހިނގި ވަގުތު މަންޒަރު ދުށް މީހުން ހޯދަން ވެސް އިއުލާނު ކޮށްފަ އެވެ.