ދަ ޑިމޮކްރެޓްސްގެ ރައީސްކަމުގެ މަގާމުުން ހަސަން ލަތީފް އިސްތިއުފާ ދެއްވައިފިއެވެ.

ހަސަަން އިސްތިއުފާ ދެއްވިކަން އިއުލާން ކުރެއްވީ އެ ޕާޓީގެ ގައުމީ މަޖިލީހުގެ ވަޓްސްއެޕް ގްރޫޕުގައެވެ.

ހަސަން ޑިމޮކްރެޓްސް އިން އިސްތިއުފާ ދެއްވާފައި ވަނީ އޭނާ އިސްތިއުފާއަށް ގޮވާލައި އެ ޕާޓީގެ ނެޝަނަލް އެސެމްބްލީގެ މެމްބަރުންތަކެއް ޕެޓިޝަނެއް ތައްޔާރުކުރަމުން ދަނިކޮށެވެ.

އެ ޕެޓިޝަންގައި ބުނެފައި ވަނީ ހަސަން އެމްޑީޕީއާ ގުޅިވަޑައިގަތުމަށް ގަސްތުކުރައްވައި އެކަމުގެ މަޝްވަރާ ޕާޓީގެ ބޭފުޅުންނާ އެކު ވަކިވަކިން ކުރައްވަމުން ގެންދަވާތާ ދުވަސްތަކެއް ވެއްޖެ ކަމަށެވެ. އަދި އެ މަޝްވަރާ ހޯއްދަވަމުން ގެންދަވާއިރު ވެސް ޕާޓީގެ ރައީސްގެ މަގާމުން އޭނާ އިސްތިއުފާ ދެއްވާފައި ނުވާ ކަމަށާއި އެ ޕެޓިޝަންގެ ބޭނުމަކީ އޭނާ އިސްތިއުފާއަށް ގޮވާލުން ކަމަށެވެ.

ކުރީގެ ރައީސް މުޙައްމަދު ނަޝީދު އިސްވެ ހުންނަވައި އުފެއްދެވި ދަ ޑިމޮކްރެޓްސްއަކީ ވެސް ނުތަނަވަސްކަމެއްގެ ތެރެއިން އިދިކޮޅު އެމްޑީޕީ ދޫކޮށް ނުކުތް ސިޔާސީ ފަރާތްތަކަކުން އުފެއްދެވި ޕާޓީއެކެވެ. އެގޮތުން އެ ޕާޓީގެ ލީޑާޝިޕްގައި ތިއްބެވީ ކުރީގެ އެމްޑީޕީގެ ވެސް ގައުމީ މަޖިލީހުގެ މެންބަރުންތަކެކެވެ.

އެގޮތުން ހަސަން މިއަދު އެ ޕާޓީގެ ރައީސްކަމުން އިސްތިއުފާ ދެއްވިއިރު، އެ ޕާޓީގައި އިސްކޮށް ހަރަކާތްތެރިވި އަދި މިދިޔަ ރިޔާސީ އިންތިހާބުގައި އެ ޕާޓީގެ ފަރާތުން ރަނިންމޭޓެއްގެ ގޮތުގައި ނުކުންނެވި ހުސައިން އަމްރޫ ވެސް ވަނީ އެ ޕާޓީން ވަކިވެ، އެމްޑީޕީއާ ގުޅިވަޑައިގަންނަވައިފައެވެ. މީގެ އިތުރުން އެމްޑީޕީގެ ސަރުކާރުގެ ރައީސް އޮފީހުގެ މިނިސްޓަރުކަން ކުރެއްވި މުޙައްމަދު ޝިފާޒުގެ އިތުރުން މަޖިލީހުގެ މެދު ހެންވޭރު ދާއިރާގެ ކުރީގެ މެންބަރު އަލީ އާޒިމް ވެސް ވަނީ އަލުން އެމްޑީޕީއާ ގުޅިވަޑައިގަންނަވައިފައެވެ.

އެ ހުރިހާ ބޭފުޅުންނަކީ ވެސް، މިދިޔަ ރިޔާސީ އިންތިހާބާ ގާތްވެފައިވަނިކޮށް އެމްޑީޕީން ވަކިވެ، ޑިމޮކްރެޓްސްއާ ގުޅިވަޑައިގެންނެވި ބޭފުޅުންނެވެ.