ޣައްޒާއާއި ލުބްނާނާއި ދެކޮޅަށް އިސްރާއީލުން ހިންގި ހަނގުރާމައާއި، ފާއިތުވި އަހަރު އިސްރާއީލުން އީރާނަށް ހަމަލާދިނުމުގެ ރޭވުންތަކާ ގުޅޭ ސިއްރު ލިޔެކިޔުންތައް ލީކުކުރިކަމަށް ކުރީގެ ސެންޓްރަލް އިންޓެލިޖެންސް އެޖެންސީ (ސީއައިއޭ) ގެ މުވައްޒަފަކު އިޢުތިރާފުވެއްޖެއެވެ.

ހުކުރު ދުވަހު ނެރުނު ބަޔާނެއްގައި، ޔުނައިޓެޑް ސްޓޭޓްސްގެ ޑިޕާޓްމަންޓް އޮފް ޖަސްޓިސްއިން ބުނެފައިވަނީ، 34 އަހަރުގެ އާސިފް ވިލިއަމް ރަޙްމާން، ޤައުމީ ދިފާޢާ ގުޅޭ "ސިއްރު މަޢުލޫމާތު ގަސްތުގައި ބެހެއްޓުމާއި ފޮނުވުމުގެ" ދެ ކުށަށް އިޢުތިރާފުވެފައިވާ ކަމަށެވެ.

އޭނާއަށް އަދަބު ކަނޑައެޅުމަށް ހަމަޖެހިފައިވަނީ މެއި 15 ވަނަ ދުވަހު ކަމަށާއި، އެއްބަސްވުމެއްގެ ދަށުން އެ ދެ ކުށަށް އެންމެ ގިނަވެގެން 10 އަހަރުގެ ޖަލު ޙުކުމެއް ކުރެވިދާނެ ކަމަށް ބަޔާނުގައި ބުނެފައިވެއެވެ.

"މިސްޓަރ ރަޙްމާން ވަނީ އޭނާ ރައްކާތެރިކޮށް ބަލަހައްޓާނެ ކަމަށް ހުވާކޮށްފައިވާ، ޤައުމީ ދިފާޢާ ގުޅޭ ސިއްރު މަޢުލޫމާތު ޤާނޫނާ ޚިލާފަށް ހިއްސާކުރުމުގެ ސަބަބުން އެމެރިކާގެ ރައްޔިތުންގެ އިތުބާރަށް ޚިޔާނާތްތެރިވެފައެވެ،" އެސިސްޓަންޓް އެޓަރނީ ޖެނެރަލް މެތިއު ޖީ. އޯލްސެން މި ބަޔާނުގައި ބުނެފައިވެއެވެ.

މި އިޢުތިރާފުން ދައްކުވައިދެނީ، އެމެރިކާގެ ޤައުމީ ސަލާމަތީ ސިއްރުތައް ޤާނޫނާ ޚިލާފަށް ހާމަކޮށްގެން އެމެރިކާއަށް ގެއްލުން ދޭ މީހުން އަވަހަށް ހޯދައި، ހަރުކަށި ގޮތެއްގައި ދަޢުވާކުރުމަށް ޑިޕާޓްމަންޓް އޮފް ޖަސްޓިސްއިން އަވަސްމަސްކަތްކޮށް، އެމެރިކާ ސަލާމަތްކުރުމުގައި ދެމިތިބޭނެކަންކަމަށް އެ ބަޔާނުގައި ބުނެފަވެއެވެ.