ނަފްސާނީ އެހީތެރިކަން ފޯރުކޮށްދޭން ގާއިމް ކުރި ހެލްޕް ލައިނުން މިހާތަނަށް 3،000 އަށްވުރެ ގިނަ މީހުންނަށް ނަފްސާނީ އެހީގެ ހިދުމަތް ފޯރުކޮށްދީފައިވާ ކަމަށް ސިއްހީ ވުޒާރާއިން ބުނެފި އެވެ.

ނަފްސާނީ އިޖުތިމާއީ އެހީތެރިކަމުގެ ގައުމީ ހެލްޕް ލައިނެއް އުފެއްދުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ. އެ ވައުދުފުޅަ އެއްގޮތަށް ނަފްސާނީ ސިއްހަތުގެ ހެލްޕްލައިން ނަމްބަރެއްގެ ގޮތުގައި 1677 ހަމަޖައްސައި އެ ހިދުމަތް ކޮންމެ ގަޑިއެއްގައި ވެސް ލިބޭނެ ގޮތް ވަނީ ހަދައިފަ އެވެ.

ސިއްހީ ވުޒާރާއިން ބުނީ ނަފްސާނީ އެހީގެ ހިދުމަތް މިހާތަނަށް 3،004 މީހަކަށް ފޯރުކޮށްދީފައިވާ ކަމަށެވެ.

ނަފްސާނީ ދުޅަހެޔޮކަމުގެ ފަރުވާ ރަށްރަށަށް ފުޅާކުރުމަކީ ސަރުކާރުގެ ސިޔާސަތެކެވެ.

ޑަބްލިއުއެޗްއޯގެ ތަފާސްހިސާބުތައް ދައްކާ ގޮތުން ދުނިޔޭގެ ނިސްބަތުން ކޮންމެ އަށް މީހަކުން އެކަކު ނަފްސާނީ އުނދަގޫތައް ތަހައްމަލުކުރެ އެވެ. އެ ޖަމިއްޔާއިން 2022 ވަނަ އަހަރު ހެދި ސްޓެޕް ސާވޭއިން ވެސް ކޮންމެ ފަސް މީހަކު އެކަކު ޑިޕްރެޝަންގެ އަލާމަތްތައް ތަހައްމަލުކުރާކަން ދައްކަ އެވެ. އަދި ނަފްސާނީ ބައްޔެއްގެ ސަބަބުން އަމިއްލަ ނަފްސަށް ގެއްލުން ދިނުމުގެ ހިޔާލު ކޮންމެ 20 މީހަކުން އެކަކު ހުންނައިރު ޑިޕްރެޝަނާއި ހާސްކަމުގެ ސަބަބުން އަހަރަކު 12 ބިލިއަން މަސައްކަތު ދުވަހުގެ ގެއްލުން ވެސް ލިބެ އެވެ.