48 ގަޑިއިރު މަސްވެރިންނަށް ފައިސާ ދޫކުރަން ފެށި ފަހުން މަސް އެކްސްޕޯޓުކޮށްގެން 4.6 މިލިޔަން ޑޮލަރު މިފްކޯއިން ބޭންކަށް މާރުކޮށްފިއެވެ.

މިފްކޯއިން ލަފާކުރާގޮތުގައި، އަހަރުގެ ތެރޭގައި އެވްރެޖްކޮށް 300 މެޓްރިކް ޓަނުގެ މަސް އެވްރޭޖްކޮށް ކިރުވަމުންދާނަމަ 50 މިލިޔަން ޑޮލަރު ލިބޭނެއެވެ. އަދި މިއީ މިފްކޯގެ އަމާޒަށްވާއިރު ސަރުކާރުން ވަނީ މިއަދަދު 90 މިލިޔަން ޑޮލަރަށް މަތި ކުރުމަށް އަމާޒު ހިފާފައެވެ. އެގޮތުން ސްޓޯރޭޖް ކެޕޭސިޓީ އިތުރުކޮށް ރާއްޖެއިން ބޭރުކުރެވޭ މަހުގެ މިންވަރު އިތުރުކުރުމަށް ސަރުކާރުން ދަނީ މަސައްކަތް ކުރަމުންނެވެ.

މަސްވެރިންނަށް 48 ގަޑިއިރުތެރޭ ފައިސާ ދިނުމަކީ ރައީސް ޑރ. މުހައްމަދު މުޢިއްޒުގެ ރިޔާސީ ވަޢުދެކެވެ. މި ވަޢުދާއި އެއްގޮތަށް، މަސްވެރިންނަށް ފައިސާ ދޫކުރަން ފަށާފައިވާއިރު މިކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް އިންތިޒާމުތަކެއް ހަމަޖައްސާފައިވާ ކަމަށް ސަރުކާރުން ވަނީ ވިދާޅުވެފައެވެ.ޕިޝަރީޒް މިނިސްޓަރ އަހުމަދު ޝިޔާމް ވިދާޅުވީ، މަސްވެރިންނަށް ފައިސާ ދިނުމުގެ ކަންކަން ރައީސްގެ ވަޢުދާއި އެއްގޮތަށް ކުރިއަށްދާއިރު މިކަން ދެމެެހެއްޓެނިވި ގޮތެއްގައި ކުރުމަށް، ސަރުކާރުން ރަނގަޅު އިންތިޒާމުތަކެއް ވަނީ ހަމަޖައްސާފައި ކަމަށެވެ.

މިނިސްޓަރ ވިދާޅުވީ، މިކަމުގެ ސަބަބުން ބޭންކް އޮފް މޯލްޑިވްސް އަށާއި، އެ ބޭންކުގެ ކަސްޓަމަރުންނަށް އަދި މަސްވެރިންނަށްވެސް ފައިދާ ވެގެންދާ ކަމަށެވެ. މިހާރު ހަމަޖެހިފައިވާ އިންތިޒާމުގެ ދަށުން، މަސްވެރިންނަށް 48 ގަޑިއިރު ތެރޭ ބޭންކު މެދުވެރިކޮށް ފައިސާ ޖަމަޢުކޮށްދެއެވެ. އަދި މިކަމަށް ބޭނުންވާ ފައިސާ މިފްކޯއިން ދެނީ ޑޮލަރުންނެވެ.