ނެޓްޒަރިމް ކޮރިޑޯއިން ޔަހޫދީ އަސްކަރިއްޔާގެ ސިފައިން އަނބުރާ ގެންދިއުމުގެ މަސައްކަތް އިސްރާއީލުން ފަށައިފިއެވެ.

ޔަހޫދީ މީޑިއާތަކުން ރިޕޯޓުކުރާ ގޮތުގައި މި މަސައްކަތް މިއަދު ނިންމާލެވޭނެއެވެ.

ނެޓްޒަރިމް ކޮރިޑޯއަކީ އިސްރާއީލު ސިފައިން ޣައްޒާ ދެބައިކޮށް ޣައްޒާގެ ދެކުނާއި އުތުރު ބަންދުކޮށް ޖަހައިތިބި ޗެކް ޕޮއިންޓެކެވެ. މި ސަރަހައްދުން ސިފައިން ގެންދަނީ އިސްރާއީލާއި ހަމާސްއާ ދެމެދު ފަސްވަނަ ފަހަރަށް އަސީރުން ބަދަލުކުރުމުގެ މަސައްކަތް ނިމުމާ ގުޅިގެންނެވެ. މިހާތަނަށް މި އެއްބަސްވުމުގެ ދަށުން ފަލަސްތީނު ރަށްވެހިންގެ 183 މީހަކު ޔަހޫދީންވަނީ ދޫކޮށްލާފައެވެ. އެއީ ހަމާސްއިން ރަހީނުންގެ ގޮތުގައި ހިފެހެއްޓި 3 ޔަހޫދީން ދޫކޮށްލުމުގެ ބަދަލެވެ. ނެޓްޒަރިމް ކޮރިޑޯއިން ޔަހޫދީ އަސްކަރިއްޔާގެ ސިފައިން އަނބުރާ ގެންދަންފެށިނަމަވެސް އިސްރާއީލުން ދަނީ ލުބުނާނާއި ސީރިއާއަށް ދެމުންދާ ހަމަލާތައް ވަރުގަދަކުރަމުންނެވެ. އަދި ހުޅަނގު އައްސޭރީގައިވެސް ހަމަލާތައް ދަނީ ވަރުގަދަކުރަމުންނެވެ.

ޔަހޫދީން ދޫކޮށްލާފައިވާ ގިނަ ފަލަސްތީނުގެ ރައްޔިތުންނަށް ވަނީ ލާއިންސާނީ އަނިޔާތަށް ދީފައެވެ. ދޫކޮށްލި ބައެއް ފަލަސްތީނުގެ ރައްޔިތުނާ ހަވާލާދީ ބައިނަލްއަގްވާމީ މީޑިއާތަކުން ރިޕޯޓުކުރާގޮތުން ނުފެންނަ ގޮތަށް ލޮލުގައި ފޮތި ބަނުމަށްފަހު ތަޅާ، އަނިޔާކޮށް، ސިއްހީ ފަރުވާއިން މަހުރޫމްކޮށް އަދި ފިނި މޫސުމުގައި އަންނައުނު ނުދީ ގަދަ ފިނީގައި ބޭތިއްބުންފަދަ އަނިޔާތައް ޔަހޫދީންވަނީ ފަލަސްތީނުގެ ރަށްވެހިންނަށް ދީފައެވެ. މިއީ ސީދާ އެ މުސްލިމުން މަރާލުމަށް ރާވައިގެން ދީފައިވާ ހަމަލާތަކެއްކަމަށް ހަމާސްއިންވަނީ ބުނެފައެވެ. ޔަހޫދީން ޣައްޒާގައި މިފަހަރު ހިންގި ގަތުލު އާއްމުގައި 48،181 މީހުން މަރުވެ، 111،638 މީހުން ޒަހަމްކޮށްލާފައިވާކަމަށް ޣައްޒާގެ ސިއްހަތާ ބެހޭ ވުޒާރާގެ ހިސާބުތަކުން ދައްކައެވެ. އެހެންނަމަވެސް، ޣައްޒާގެ ގަވަރމަންޓް މީޑިއާ އޮފީހުން ވަނީ އިމާރާތްތަކުގެ ދަށުގައި ތާށިވި މީހުންނާއެކު ޝަހީދުންގެ ޖުމްލަ އަދަދު 61،709 އަށް އަރާނެކަމަށް އަންދާޒާކޮށްފައެވެެ. ޔަހޫދީންގެ ހަމަލާތަކުގެ ރައްދުގައި ހަމާސްއިން މި މުއްދަތުގައި ދިން ހަމަލާތަކުގައި ޔަހޫދީންގެ 1،139 މީހުން މަރާލާފައިވެއެވެ.