މިދިޔަމަހު މޯލްޑިވްސް އިންލަންޑު ރެވެނިއު އޮތޯރިޓީ، މީރާއަށް 3.34 ބިލިޔަން ރުފިޔާ ބަލައިގަނެފައިވާކަމަށް އެ އޮތޯރިޓީން ހާމަކުރައްވައިފިއެވެ.

މީރާއިން މަޢުލޫމާތު ދޭ ގޮތުގައި މިދިޔަ މަހަށް އަންދާޒާކޮށްފައިވާ އާމްދަނީއަށްވުރެ 5 އިންސައްތަ އިތުރުވެފައިވާ މައިގަނޑު އެއް ސަބަބަކީ ގްރީން ޓެކުހާއި ވަރކް ޕަރމިޓް ފީ، ޓޫރިޒަމް ދާއިރާގެ ޖީއެސްޓީ އަދި ކޯޕަރޭޓް އިންކަމް ޓެކްސްތަކުން އާމްދަނީ އިތުރުވުމެވެ.

އަދި އިންކަމް ޓެކްސް ދެއްކުމުގެ ސުންގަޑީގެ މުއްދަތު އިތުރުކުރި ނަމަވެސް، ޖީއެސްޓީއާއި ކޯޕަރޭޓް އިންކަމް ޓެކްސް ސުންގަޑީގެ ކުރިން ދައްކާފައިވުމީ މި މުއްދަތުގައި ލިބިފައިވާ އާމްދަނީ އިތުރުވި ސަބަބެއްކަން އެ އޮތޯރިޓީން ފާހަގަކުރައްވައެވެ.

ތަފާސްހިސާބުތައް ދައްކާގޮތުން ނިމުނު ޖެނުއަރީމަހު މީރާއަށް ލިބުނު 3.34 ބިލިޔަން ރުފިޔާގެ އާމްދަނީއަކީ އޭގެ ކުރީމަހު މީރާއަށް ބަލައިގަނެފައިވާ އާމްދަނީއާ އަޅާބަލާއިރު، %43 އިތުރު އަދަދެއްކަމަށެވެ. އަދި މިއީ ލިބޭނެކަމަށް އަންދާޒާކޮށްފައިވާ އަދަދަށްވުރެވެސް %5 އިންސައްތަ އިތުރު އަދަދެއްކަމަށް މީރާއިން ވިދާޅުވެއެވެ.

މީރާއިން ވިދާޅުވީ މިދިޔަ މަހު މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ޖީއެސްޓީ ކަމަށެވެ. އެގޮތުން ޖީއެސްޓީގެ ގޮތުގައި 1.59 ބިލިޔަން ރުފިޔާ ލިބުނުއިރު، އެއީ އާމްދަނީގެ %47.7އެވެ. އަދި އެއަރޕޯޓް ޑިވެލޮޕްމެންޓް ފީގެ ގޮތުގައި 115.39 މިލިޔަން ރުފިޔާއާއި ޓޫރިޒަމް ލޭންޑް ރެންޓްގެ ގޮތުގައި 65.11 މިލިޔަން ރުފިޔާ ލިބިފައިވާކަމަށްވެސް މީރާއިން ވިދާޅުވިއެވެ.