ދަނޑުވެރިކަމުގައި އެއްރަށުގެ ތަޖުރިބާ އަނެއްރަށާއި ހިއްސާކުރުމަކީ ދަނޑުވެރިކަމުގެ ސިނާއަތަށް ލިބިގެންދާ ވަރަށްބޮޑު ކުރިއެރުމެއްކަމަށް ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.

އެކަމަނާ މިހެންވިދާޅު މިލަދުންމަޑުލު އުތުރުބުރީ ކައުންސިލް އިދާރާގެ މުއައްޒަފުން އައްޑޫ މީދޫ އަށް ކުރެއްވި ޒިޔާރަތުގައި ޒުވާން ދަނޑުވެރިޔާގެ ޑްރަގަން ފުރުޓް ފާމް އަދި ފްރެޝް ޔީލްޑް (ކިއުކަމްބާ ) ފާމް އަށް ޒިޔާރެއްކުރުމުން ދަނޑުވެރިކަން ކުރައްވާ ގޮތުގެ މައުލޫމާތު ހިއްސާކުރުމާއި ގުޅިގެން، އެކަން ފާހަގަކުރައްވާ ކުރެއްވި ޕޯސްޓްގައެވެ.

ވަޒީރު ވިދާޅުވީ ދަނޑުވެރިކަމުގެ ތަޖުރިބާ އެހެން ރަށްރަށާ ހިއްސާކުރެވިގެންދިއުމަކީ ވަރަށް އުފާވެރި ކަމެއްކަމަށެވެ. މިގޮތަށް ރަށްރަށުގެ މެދުގައި ތަޖުރިބާ ބަދަލުކުރެވި، އެއްބައިވަންތަކަމާއެކު މަސައްކަތްކުރުމަކީ ދިވެހި ދަނޑުވެރިކަން ކުރިއެރުވުމަށް ވަރަށް މުހިންމު ކަމެއްކަމަށެވެ.

ޑްރަގަން ފުރުޓް އަދި ކިއުކަމްބާ ފަދަ ތަފާތު ބާވަތްތަކުގެ ދަނޑުވެރިކަން ކުރިއަރުވައި، އޭގެ މަޢުލޫމާތު އެހެން ފަރާތްތަކާ ހިއްސާކުރުމަކީ ރާއްޖޭގެ ދަނޑުވެރިކަން ތަރައްޤީވެގެންދާނެ ރަނގަޅު ފިޔަވަޅެއް. އަދި މިފަދަ ދަތުރުތަކުން ލިބޭ މަޢުލޫމާތާއި ތަޖުރިބާ ބޭނުންކޮށްގެން އިތުރު ރަށްރަށުގައިވެސް ދަނޑުވެރިކަން ކުރިއަރައިގެންދާނެކަމީ ޝައްކެއްވެސް އޮތްކަމެއް ނޫން

ވަޒީރު އިތުރަށް ވިދާޅުވީ ރަށުގެ ކައުންސިލްތަކުން މިފަދަ ގުޅުން ބަދަހިކޮށް، އެއްބައިވަންތަކަމާއެކު މަސައްކަތް ކުރެއްވުމަށް ނަންގަވާފައިވާ މި ފިޔަވަޅަށްޓަކައި ޝުކުރު ދަންނަވާކަމަށެވެ. ކުރިއަށް އޮތް ތަނުގައިވެސް މިފަދަ ގިނަ މަސައްކަތްތަކެއް ކުރެވި، ދިވެހިރާއްޖޭގެ ދަނޑުވެރިކަން އިތުރަށް ކުރިއަރައިގެންދާނެ ކަމުގެ އުންމީދު ކުރައްވާކަމަށްވެސް ވަޒީރު ވިދާޅުވިއެވެ. އަދި ރާއްޖެގައި ދަނޑުވެރިކަން ކުރިއެރުވުމަށް ކުރައްވާ މަސައްކަތަށް ޒުވާން ދަނޑުވެރިޔާއަށްވެސް ވަޒިރުގެ ޕޯސްޓްގައި ޝުކުރު އަދާކުރައްވާފައެވެ.