އޮޅުހިޔާގައި އެއްފަހަރާ 100 ބުޅާ ކަރަންޓީނު ކުރެވޭގޮތަށް ކެޕޭސިޓީ އިތުރުކުރަން ނިންމާފައިވާކަމަށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާ އިން ބުނެފިއެވެ.

އެ ވުޒާރާއިން ބުނީ، މާލެ ސަރަހައްދުގައި ވީއްލިގެން އުޅޭ ބުޅާތައް އޮޅުހިޔާއަށް ވެއްދުމަށް ކުރަމުންދާ މަސައްކަތްތަކުގެ ތެރެއިން ކަރަންޓީން ގެ ކެޕޭސިޓީ އިތުރުކުރުމަށް އިތުރު 70 ކޭޖު ތައްޔާރުކޮށް ނިމޭނެ ކަމަށެވެ.

އެގޮތުން މިވަގުތު ކަރަންޓީން ގައި ތިބީ އެއްމެ ފަހުން ނެގުނު 28 ބުޅާ ކަމަށާއި، ކަރަންޓީން ކުރެވޭ ކެޕޭސިޓީ އިތުރުކުރުމުން އެއްފަހަރާ 100 ބުޅާ ކަރަންޓީން ކުރެވޭނެ ކަމަށް އެ ވުޒާރާއިން ބުނެފައިވެއެވެ.

ވުޒާރާއިން ބުނީ، ބުޅާތައް އޮޅުހިޔާއަށް ވެއްދުމަށްފަހު ޖެނެރަލް ބަޔަށް ލުމުގެ ކުރިން ގިނަ ކަރަންޓީން ފޭސްތަކެއް ކަޑައްތުކުރަން ޖެހޭ ކަމަށާއި، ސަބަބަކީ މަގުތަކުން ގެންނަ ބުޅާތަކަކީ އެކި ބަލިތަކާއި ރޯގާތައް ޖެހި، އެކި ވަރުގެ އަނިޔާތައް ލިބިފައި ތިބޭ ބުޅާތަކެއް ކަމަށެވެ. އެހެންކަމުން މި ފޭސްތައް ކަޑައްތުކޮށް، އާންމު ބަޔަށް ބުޅާތައް ބަދަލު ކުރެވޭ މިންވަރަކުން މާލެތެރެއިން އިތުރު ބުޅާތައް ގެނެކަމަށް ވެސް އެ ވުޒާރާއިން ބުނެފައިވެއެވެ.

އެ ވުޒާރާގެ އަމާޒަކީ ހުރިހާ ބުޅާތައް ގެނެސް ކޮށިތަކަށް އަޅާލުމެއްނޫން ކަމަށާއި، އޭގެ ބަދަލުގައި އެސޮރުމެންނަށް ލިބެންޖެހޭ އަޅާލުމާއި ބޭސްފަރުވާވެސް ފުރިހަމަކޮށް، އެސޮރުމެން ބެލެހެއްޓުން ކަމަށް ވެސް އެ ވުޒާރާއިން ބުނެފައިވެއެވެ.