ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި ޢިމާރަތްކުރަމުން އަންނަ "އަމާން އުދަރެސް"ގެ 16 ޓަވަރުގެ ސްޓްރަކްޗާގެ މަސައްކަތް ނިންމައިފިއެވެ.

މިދިޔަ ސަރުކާރުން "ގެދޮރުވެރިޔާ" ސްކީމުގެ ދަށުން ހުޅުމާލެ ދެވަނަ ފިޔަވަހީގައި ތަރައްގީ ކުރަން ފެށި ފްލެޓްތައް ބެލެހެއްޓުމުގެ މަސައްކަތް ހަވާލުކުރީ އެފްޑީސީއާއެވެ. އެގޮތުން އެފްޑީސީން އިންޑިޔާގެ ދެ ކުންފުންޏަކާ ހަވާލުކޮށްގެން ޖުމްލަ 32 ޓަވަރު އެޅުމުގެ މަސައްކަތް ދަނީ ކުރަމުންނެވެ. އެ ފްލެޓްތަކުގެ އަދާހަމަ އެ ކުންފުނިން ވަނީ ހާމަކޮށްފައެވެ.

އެގޮތުން އެފްޑީސީން "އެކްސް"ގައި ކުރި ޕޯސްޓެއްގައި ބުނީ، އިންޑިޔާގެ ކޭޕީއައިއެލް ނުވަތަ ކުރީގެ ޖޭއެމްސީ ކުންފުންޏާ ހަވާލުކޮށްގެން ޢިމާރަތްކުރަމުންދާ "އަމާން އުދަރެސް"ގެ 16 ޓަވަރުގެ ސްޓްރަކްޗާގެ މަސައްކަތް ނިމިފައިވާ ކަމަށެވެ.

އެ މަސައްކަތްތަކުގެ ތެރެއިން ބާކީ ހުރި 16 ޓަވަރުގެ މަސައްކަތް އެފްޑީސީން ހަވާލުކުރީ އެންބީސީސީއާ އެވެ. އެ ޓަވަރުތަކުގެ ވެސް ގިނަ ޓަވަރުތަކުގެ ސްޓްރަކްޗާ ވަނީ ނިމެން ކައިރިވެފައެވެ.

މިދިޔަ ސަރުކާރުގެ "ގެދޮރުވެރިޔާ" ސްކީމުގެ ދަށުން ޢިމާރަތްކުރަމުންދާ 32 ފްލެޓަށް، 4000 މީހުން ވަންނާނެއެވެ. އެމީހުންގެ ދާއިމީ ފްލެޓް ލިސްޓު މި އަހަރުގެ އޮކްޓޯބަރު މަހުގެ ތެރޭގައި އާންމުކުރާނެ ކަމަށް ހައުސިން މިނިސްޓްރީން ބުނެއެވެ.