ރޯދަމަހަށް ރާއްޖޭގެ ރަށްތައް ސާފުކުރުމުގެ ހަރަކާތުގެ ތެރެއިން "ސާފު ވިލިމާލެ ރައްކާތެރި ވެށި" ގެ ނަމުގައި ވިލިމާލެ ސާފުކުރުމުގެ ހަރަކާތެއ ްމިއަދު ފަށައިފި އެވެ.

"ސާފު ވިލިމާލެ - ރައްކާތެރި ވެށި" މި ނަމުގައި ވިލިމާލެ ދާއިރާގެ މެމްބަރ މުޙައްމަދު އިސްމާޢީލް އިސްނަންގަވައިގެން ދައުލަތުގެ ބައެއް މުއައްސަސާތަކާއި ކުންފުނިތަކުގެ ބައިވެރިވުމާއެކު ކުރިއަށް ގެންދިޔަ ހަރަކާތެކެވެ. މިހަރަކާތުގައި ސިޓީތަކާއި އިދާރީ ދާއިރާތަކާއި އާންމު މައްސައްކަތްތަކާބެހޭ ވުޒާރާއާއި، ސަރުކާރުގެ މުއައްސަސާތަކުގެ އިސްވެރިންގެ އިތުރުން މަދަނީ ޖަމްޢިއްޔާ ޖަމާއަތްތަކުން ބައިވެރިވި އެވެ.

މިއަދު ހެނދުނު 9 އަކުން އިރުއޮއްސި 6 އަށް ކުރިއަށްގެންދިޔަ މިހަރަކާތުގައި ވިލިމާލޭގެ ގިނަ ސަރަހައްދުތަކެއް ވަނީ ސާފު ކޮށްފަ އެވެ.އަދި ގޭބީސީތަކުގައި ހުރި ކުނިތައްވެސް ވަނީ އުކާލަފަ އެވެ.

ވިލިމާލެ ދާއިރާގެ މެމްބަރ މުޙައްމަދު އިސްމާޢީލް ވިދާޅުވީ ވިލިމާލެ ސާފު ކުރުމަށް ބޭއްވި ހަރަކާތުގައި އާންމުކޮށް ރައްޔިތުން އެއްވެ އުޅޭ ތަންތަނާ ވިލިމާލޭގެ މަގުތަށް ސާފު ކޮށްފައިވާ ކަމަށެވެ. މި ހަރަކާތުގައި ވިލިމާލޭގެ ހުރިހާ ރައްޔިތުންގެ ފަރާތުން ވަރަށްބޮޑު ތަރުހީބެއް ލިބުނު ކަމަށް އިސްމާއީލް ވިދާޅުވި އެވެ.

ރޯދައަށް މުޅި ރާއްޖެ ސާފު ކުރުމުގެ ހަރަކާތް ފަށަފައި ވަނީ މި މަހުގެ 15 ވަނަ ދުވަހު އެވެ.