އަމިއްލަ ފަރާތެއްގެ ހިލޭ އެހީގެ ދަށުން ވިލިމާލޭގެ ޒަމާންވީ މަސްޖިދުއްސަލާމް މިސްކިތް ހުރި ބިމުގައި ބޮޑު ޒަމާނީ މިސްކިތެއް އެޅުމަށް ބަޔަކާ ހަވާލުކޮށްފިއެވެ.

އެކަން ހާމަކުރައްވަމުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ކުރެއްވި ޕޯސްޓެއްގައި ވިދާޅުވީ، އެ މިސްކިތް އެޅުމަށް ހެޔޮ އެދޭ ފަރާތަކުން ޝައުގުވެރިކަން ފާޅުކޮށްފައިވާތީވެ، އެ މަސައްކަތް ދެ އަހަރުގެ ތެރޭގައި ނިންމާ ގޮތަށް އެ ފަރާތާ ހަވާލުކޮށްފައިވާ ކަމަށެވެ.

އެގޮތުން އެ މިސްކިތް އަޅަން ނިންމާފައިވަނީ ޤުރުއާން ކިޔަވައި ދިނުމާއި އިލްމީ ކަންކަމަށް ބޭނުންކުރެވޭ ކްލާސްރޫމްތައް ވެސް ހިމެނޭހެނެ ކަމުގައި ވެސް ވަޒީރު ފާހަގަކުރެއްވިއެވެ.

6،000 އެއްހާ މީހުންގެ އާބާދީއެއް ދިރިއުޅޭ ވިލިމާލޭގައި ހުންނަނީ ތިން މިސްކިތެވެ. އެއީ މަސްޖިދުއްސަލާމުގެ އިތުރުން މަސްޖިދުލް އިހުލާސް އާއި މަސްޖިދުލް ބިއްރީއެވެ.