ވިލިމާލޭ ދާއިރާގެ މެންބަރު އަދި ޕީއެންސީގެ ޑެޕިއުޓީ ޕީޖީ ލީޑަރު މުހައްމަދު އިސްމާއީލް، ވިލިމާލޭ ރައްޔިތުންގެ ބައެއް ކަންބޮޑުވުންތައް މާލެ ސިޓީ މޭޔަރ އާދަމް އާޒިމްއާ ހިއްސާކޮށްފިއެވެ.

މިކަންބޮޑުވުންތައް ހިއްސާކުރަމުން މެމްބަރު މުހައްމަދު އިސްމާއީލް ފާހަގަކުރެއްވި ކަންކަމުގެ ތެރޭގައި ވިލިމާލޭ މަސްވެރިންގެ އެންމެ ބޮޑު ދެ ކަންބޮޑުވުން ހިމެނެއެވެ.

އެގޮތުން، ވިލިމާލޭ ރައްވެހިންގެ އޮޑިދޯނިފަހަރާއި ޑިންގީފަދަ އުޅަނދުތަކުން ނަގާ ފައްތިޔާ ފީ ކުޑަކޮށް، ވިލިމާލޭ އޮޑިވެރިންނަށް ލުއިތަކެއް ހޯދައިދިނުމާއި، އެސްޓީއޯ މެދުވެރިކޮށް ޕެޓްރޯލާއި ޑީސަލް ލިބޭނެ ގޮތް ހަމަޖެއްސުމަށް ނިންމާފައިވާ ޕެޓްރޯލް ޝެޑް އެޅުމުގެ ބިން އެސްޓީއޯއާ ހަވާލުކުރުން އަވަސްކުރުމާ ބެހޭގޮތުން މެމްބަރުވަނީ ވާހަކަދައްކަވައި، މޭޔަރާއި މަޝްވަރާކުރަށްވާފައެވެ.

މީގެ އިތުރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ޓޫރިޒަމް ފުޅާކުރުމުގެ ގޮތުން ވިލިމާލެއިން 24,000 އަކަފޫޓުގެ ބިމެއް ކަނޑައެޅުމަށް ޓޫރިޒަމް މިނިސްޓްރީން 22 ފެބްރުއަރީ 2024 ގައި ފޮނުވާފައިވާ ސިޓީއާ ގުޅިގެން، މިކަން ލަސްވަމުންދާތީ މިކަންބޮޑުވުން ވެސް ފާޅުކުރެއްވިއެވެ. އަދި ވިލިމާލޭގައި މަސްމާރުކޭޓެއްގެ ޚިދުމަތް ރައްޔިތުން ބޭނުންވާތީ، މިކަމާ ގުޅޭގޮތުން ފުޅާ ދާއިރާއެއްގައި ވާހަކަދެއްކެވިއެވެ.

މި ބައްދަލުވުމުގައި މޭޔަރ އާދަމް އާޒިމް ވިދާޅުވިގޮތުގައި، ކުޑަ ލަސްވުމެއް މާޒީގައި ދިމާވިކަމުގައި ވީނަމަވެސް، މިހާރު މަޝްވަރާކުރެވުނު ކަންކަމުގެ ތެރެއިން ޕެޓްރޯލް ޝެޑްގެ ބިންވަނީ ކައުންސިލުން ފާސްކޮށް، އެސްޓީއޯއާ ހަވާލުކުރުމުގެ މަގުމަތީގައެވެ. އަދި ދެން ހުރި ބިންތަކުގެ ކަންކަންވެސް ލަސްތަކެއްނުވެ ނިމިގެންދާނެ ކަމަށާއި، ރައްޔިތުންނާ ގުޅުންހުރި ހުރިހާ ކަމެއްގައި ފުރިހަމަ އެއްބާރުލުމާއެކު މި ސަރުކާރާ ގުޅިގެން ބާރަށް ކުރިއަށް ގެންގޮސްދެއްވާނެ ކަމުގެ ފުރިހަމަ ޔަޤީންކަން ދެއްވިއެވެ.