ހަނގުރާމަ ހުއްޓާލުމުގެ އެއްބަސްވުމުގެ ދަށުން މިއަދު އިސްރާއީލުން ދޫކުރަން ހަމަޖެހިފައިވާ 620 ފަލަސްތީނުގެ ރައްޔިތުން ދޫކޮށްލުން ޔަހޫދީން ފަސްކޮށްފިއެވެ.

އެއްބަސްވުމާ ހިލާފުވެ މުސްލިމުން ދޫނުކުރާނެކަމަށްބުނެ ޔަހޫދީން ދައްކާ ބަހަނާއަކީ ހަމާސްގެ ބެލުމުގެ ދަށުގައި ތިބި އިސްރާއީލު މީހުން ދޫކުރާނެކަމުގެ ޔަޤީންކަން ހޯދުމަށް ކަމަށް ބުނެއެވެ.

މިއީ ހަނގުރާމަ ހުއްޓާލުމުގެ އެއްބަސްވުމާ "ހިލާފު" ކަމެއްގެ ގޮތުގައި ބައިނަލްއަގްވާމީ މީޑިއާތަކުން އަންނަނީ ސިފަކުރަމުންނެވެ.

ޙަމާސާއި ޔަހޫދީންނާ ދެމެދު އަމަލު ކުރަމުންދާ އެއްބަސްވުމާ އެއްގޮތަށް ޙަމާސުން އިއްޔެ ވަނީ 6 އަސީރުން މިނިވަން ކޮށްފައެވެ. މިއީ އެއްބަސްވުމުގެ ދަށުން ޙަމާސުން މިނިވަން ކުރާނެ ކަމަށް ބުނެފައިވާ ދިރިތިބި އަސީރުންގެ ތެރެއިން އެންމެ ފަހު ގުރޫޕެވެ.

މިކަމާ ގުޅިގެން އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ، ދެން މުސްލިމުން މިނިވަން ކުރެވޭނީ، ޔަހޫދީންގެ އައު ޝަރުތުތަކަށް ޙަމާސުން އެއްބަސްވުމުން ކަމުގައެވެ. މި އައު ޝަރުތުތަކަކީ މިހާރު އަމަލުކުރަމުންދާ އެއްބަސްވުމާ ހިލާފުއެއްޗެކެވެ.

ޣައްޒާގެ މުސްލިމުންގެ ނަސްލުހޭދު ކުރުމަށް ޔަހޫދީ ފައުޖުން ލާއިންސާނީ ޢުދުވާނެއް ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. އެ ޤަތުލުޢާންމުގައި ޝަހީދު ކޮށްލާފައިވާ މީހުންގެ އަދަދު 61,700ށް އުފުލިފައިވާއިރު، އިތުރު 111,000 މީހުން ވަނީ ޒަޚަމު ކޮށްލާފައެވެ. ޔަހޫދީންގެ ޤަތުލުޢާންމު މެެދުކަނޑައިލާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތާއި ޔަހޫދީންނާ ދެމެދު ޖަނަވަރީ 19ވަނަ ދުވަހު އަމަލު ކުރަން ފެށި އެއްބަސްވުމެއްގެ ދަށުންނެވެ. އަސީރުން ބަދަލު ކުރަމުން ދަނީ އެ އެއްބަސްވުމުގެ ދަށުންނެވެ.