ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޗެއާމަންގެ މަގާމަށް އައްޔަން ކުރެއްވި ސ. ހުޅުދޫ، ރިވާސައިޑް އަޙްމަދު ނާޞިފް، އެ މަޤާމުން ވަކިކޮށްފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން މިއަދު ބުނީ، ނާޞިފް އެޗްޑީސީގެ ޗެއާމަންގެ މަގާމުން ވަކިކޮށްފައިވާ ކަމަށާއި، މިއަދު އޭނާ ވަނީ ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) ގެ ޗެއާމަން ކަމުގެ މަޤާމަށް އައްޔަނުކޮށްފައެވެ.

އެޗްޑީސީދެ ޗެއާމަންގެ މަގާމަށް ނާޞިފް އައްޔަން ކުރެވުނީ މިދިޔަ އަހަރުގެ ނޮވެމްބަރު މަހުގެ 6 ވަނަ ދުވަހުއެވެ.

ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުއޭސީއެލް) ގެ ޗެއާމަނަކަށް ހުންނެވި ނާސިފް ވަނީ ކުރީގެ ރައީސް އަބްދުﷲ ޔަމީންގެ ސަރުކާރުގައި އެޗްޑީސީގެ މެނޭޖިން ޑިރެކްޓާކަމާއި، ތިލަފުށި ކޯޕަރޭޝަން ލިމިޓެޑް (ޓީސީއެލް) ގެ މެނޭޖިން ޑިރެކްޓަރުގެ މަގާމާއި، ގްރޭޓާ މާލެ އިންޑަސްޓްރިއަލް ޒޯން ލިމިޓެޑްގެ މެނޭޖިން ޑިރެކްޓަރުގެ މަގާމު ފުރުއްވާފައެވެ.

އެޗްޑީސީގެ ޗެއާމަނަކަށް ފުރަތަމަ ހުންނެވީ ކުރީގެ ވަޒީރު އަހްމަދު ޒުހޫރެވެ.