ރާއްޖޭގައި ހާފިޒުން ދަސްވެނިވުމަށް ބާއްވާ ތާރީޚީ ފުރަތަމަ ހަފްލާ، މިމަހުގެ 27 ވިލޭރޭ ބޭއްވުމަށް ހަމަޖެހިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ހާމަކުރައްވައިފިއެވެ.

މިނިސްޓަރު ޝަހީމް ސޯޝަލް މީޑިއާގައި ލިޔުއްވި މެސެޖެއްގައި ވިދާޅުވެފައިވަނީ މި ހަފުލާގައި 20-25 އާ ދެމެދު އަދަދެއްގެ ހާފިޒުން ދަސްވެނިވާނެ ކަމަށެވެ. އަދި މިއީ ރާއްޖޭގެ ތާރީޚުގައި ވެސް މިކަމަށް ޚާއްޞަކޮށް ބޭއްވޭ މިފަދަ ފުރަތަމަ ހަފްލާ ކަމަށް އެމަނިކުފާނު ފާހަގަކުރެއްވިއެވެ.

"މިއީ ވަރަށް ތާރީޚީ މުހިންމު ދުވަހެއް. ރާއްޖޭގެ ހާފިޒުންނަށް ޚާއްޞަ ގޮތެއްގައި އިޙްތިފާލުކުރެވޭ ފުރަތަމަ ފަހަރު މިއީ," މިނިސްޓަރު ޝަހީމް ވިދާޅުވިއެވެ.

މީގެ ކުރިން ހާފިޒުން ދަސްވެނިވުމަށް ޚާއްސަ ޖަލްސާއެއް ބާއްވާފައެއްނުވެއެވެ. އަދި ދަސްވެނިވި ހާފިޒުންނަށް އިނާމާއި މެޑަލް ދެމުން އައީ އެކި އަހަރު އެކި މުނާސަބާތުތަކާ ގުޅުވައިގެން ބާއްވާ ޖަލްސާތަކުގައެވެ.