ރ.މަޑުއްވަރީގައި ޤާއިމްކޮށްފައިވާ އައިސް ޕްލާންޓް ރަސްމީކޮށް އެރަށު ކައުންސިލުން ދައުލަތުގެ މަސްކުންފުނި މިފްކޯގެ ދަށަށް ބަދަލުކޮށްފިއެވެ.

މަޑުއްވަރީ ކައުންސިލްގައި މިއަދު ބޭއްވި ރަސްމިއްޔާތެއްގައި މި ބަދަލު ރަސްމީކޮށް އިއުލާނުކޮށްފައިވާއިރު، އެ ތަން ހަވާލުކުރުމުގެ އެއްބަސްވުމުގައި މަޑުއްވަރީ ކައުންސިލްގެ ރައީސް މުހައްމަދު ސާދިގު އާއި މިފްކޯގެ އެކްޓިން ޗީފް އިލްޔާސް ހަނީފް ސޮއިކުރެއްވި އެވެ. މި އައިސް ޕްލާންޓް ދެން ބަލަހައްޓާނީ ފިޝަރީޒް ކޮމްޕްލެކްސް (އެފްއެފްސީ) ގެ އިންޖިނިއަރިން ޓީމުންނެވެ.

25 މެޓްރިކް ޓަނުގެ ފްލޭކް އައިސް އުފެއްދުމުގެ ކެޕޭސިޓީ އާއި 50 ޓަނުގެ ސްޓޯރޭޖް ކެޕޭސިޓީ ހުރި މި އައިސް ޕްލާންޓުން މަސްވެރިންނަށް އައިސް ވިއްކާނީ ޓަނަކަށް 750 ރުފިޔާގެ ރޭޓުންނެވެ. މިފްކޯއިން ވަނީ ޓެކްނީޝަނުންނާއި ކޭޝިއަރަކު ވެސް ހަރަކާތްތެރިވެ، އޮޕަރޭޝަންތައް އޮމާންކޮށް ކުރިއަށް ގެންދިއުމަށް މަސައްކަތްކޮށްފައެވެ.

ކައުންސިލްގެ ރައީސް ސާދިގު ވިދާޅުވީ މެނޭޖްމަންޓަށް ގެނައި ބަދަލާ އެކު މަސްވެރިންނަށް ބޭނުންވާ އައިސް ހެޔޮ އަގުގައި ލިބޭނެ ކަމުގެ ޔަގީންކަން ދޭކަމަށެވެ.

މި އައިސް ޕްލާންޓުން 2021 ވަނަ އަހަރުން ފެށިގެން މަސްވެރިންނަށް ހިދުމަތް ދެމުން ގެންދެއެވެ.