ދިވެހި ރާއްޖޭގެ ހައިކޯޓުގެ ހިންގުން ވަގުތީ ގޮތުން ފަނޑިޔާރު މުޙައްމަދު ފައިސަލްއާ ހަވާލުކޮށްފިއެވެ.

ވަގުތީގޮތުން ހައިކޯޓުގެ ހިންގުން ފަނޑިޔާރު ފައިސަލާ ޖުޑީޝަލް ސަރވިސް ކޮމިޝަން (ޖޭއެސްސީ)ން ހަވާލުކޮށްފައިވަނީ އެ ކޮމިޝަނުގެ ޖަލްސާއަކުން ނިންމައިގެންނެވެ.

ހައިކޯޓުގެ ހިންގުން ވަގުތީ ގޮތުން ފަނޑިޔާރު މުޙައްމަދު ފައިސަލްއާ ހަވާލުކޮށްފައިވަނީ ސުޕްރީމް ކޯޓުގެ ފަނޑިޔާރުކަމުގެ މަޤާމަށް އަލްއުސްތާޛު ޙުސައިން ޝަހީދު އައްޔަނުކުރެއްވުމާ ގުޅިގެންނެވެ.

ސުޕްރީމް ކޯޓުގެ ފަނޑިޔާރެއްގެ މަގާމު ހުސްވީ، އެ މަގާމުގައި ކުރިން ހުންނެވި ހުސްނުއްސުއޫދުގެ މައްސަލައެއް ޖުޑީޝަލް ސާވިސް ކޮމިޝަން (ޖޭއެސްސީ)ން ބަލަން ފެށުމާއެކު، އެ މަގާމުން ހުސްނުއްސުއޫދު އަމިއްލަފުޅަށް އިސްތިއުފާ ދެއްވުމާ ގުޅިގެންނެވެ. އެއާއެކު އެ މަގާމަށް ބޭފުޅަކު ހޮވުމަށް ޖޭއެސްސީން ދެ ފަހަރު އިއުލާންކުރިއިރު، އެ މަގާމަށް އައްޔަނުކުރުމަށް ޖޭއެސްސީގެ ފަރާތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަށް ފޮނުވާފައިވަނީ ޝަހީދުގެ ނަންފުޅެވެ.

ޝަހީދަކީ ޤާނޫނީ ދާއިރާގައި ފާހަގަކޮށްލެވޭ ތަޖުރިބާކާރެއްގެ އިތުރުން އޭނާ ވަނީ ކުރިން ހައި ކޯޓުގެ އިސް ފަނޑިޔާރުގެ މަޤާމާއި ކްރިމިނަލް ކޯޓުގެ ފަނޑިޔާރުކަމުގެ މަޤާމު އަދާކުރައްވާފައެވެ.