ކަނޑު އުޅަނދުފަހަރު ނަގިލިލާފައި އޮންނަ ވަގުތުތަކުގައި ފަޅުވެރިން ތިބުން ލާޒިމް: ޓްރާންސްޕޯޓް މިނިސްޓްރީ

މަސްވެރިއެއް ދޯނިން މަސްތަކެއް ބާލަނީ -- ފޮޓޯ: މިހާރު
.jpg&w=3840&q=75)
22 މާރިޗު 2025 - 07:40
ކަނޑު އުޅަނދުފަހަރު ނަގިލިލާފައި ނުވަތަ ޖެޓީގައި އޮންނަ ވަގުތުތަކުގައި ފަޅުވެރިން ތިބުމަކީ ލާޒިމް ކަމެއް ކަމުގައި ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބުނެފިއެވެ.
އެ ވުޒާރާއިން ނެރުނު އިއުލާނެއްގައި ބުނީ، ކަނޑު އުޅަނދުތައް ފަޅު ތެރޭގައި އާއި ކަނޑުގެ ސަރަހައްދުގައި ނަގިލި ލުމަށްފަހު އުޅަނދުގައި އެއްވެސް ފަޅުވެރިއެއް ނެތުމުގެ ސަބަބުން ތަފާތު ނުރައްކާތެރި ޙާދިސާތައް ދިމާވެ، މީހުންގެ މުދަލަށް ގެއްލުންވާކަން ފާހަގަކުރެވިފައިވާ ކަމަށެވެ.
އެހެންކަމުން، ރާއްޖޭގެ ކަނޑުގެ ސަރަހައްދުގައި ދުއްވާ ކަނޑު އުޅަނދުފަހަރެއް ނަގިލި ލާފައި ނުވަތަ ޖެޓީގައި އޮންނަ ވަގުތުތަކުގައި އެ އުޅަނދެއް ބެލެހެއްޓުމަށްޓަކައި އެކަށީގެންވާ އަދަދކަށް ފަޅުވެރިން ތިބުމަކީ ސަލާމަތާއި ރައްކާތެރިކަމުގެ ގޮތުން ކޮންމެހެން ވެސް ލާޒިމް ކަމެއް ކަމުގައި އެ ވުޒާރާއިން ވަނީ ކަނޑައަޅާފައެވެ.
އަދި އެފަދައިން އަމަލުނުކުރާ ނަމަ، އެ އުޅަނދެއްގެ ވެރިފަރާތަކާ މެދު "ދިވެހިރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާބެހޭ ޤަވާއިދު"ގެ 44 ވަނަ މާއްދާގެ "ފ"ގެ ދަށުން ފިޔަވަޅު އަޅާނެ ކަމުގައި އެ ވުޒާރާއިން ބުންޏެވެ.
ދަތުރުފަތުރާ ބެހޭ ވުޒާރާއިން އެފަދައިން އަމަލުކުރަން އެދުނު އިރު، ކަނޑު އުޅަނދުތައް ފަޅު ތެރޭގައި އާއި ކަނޑުގެ ސަރަހައްދުގައި ނަގިލި ލުމަށްފަހު އުޅަނދުގައި އެއްވެސް ފަޅުވެރިއެއް ނެތުމަކީ ދިވެހިރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާބެހޭ ޤަވާއިދުގެ ދަށުން ފާހަގަކުރާ ޖޫރިމަނާކުރެވޭނެ ކުށެއް ނޫނެވެ.
އެހެން ނަމަވެސް، އެ ގަވާއިދުގެ 44 ވަނަ މާއްދާގެ "ފ" އިން ބުނާ ގޮތުން، ވުޒާރާގެ މި ނިންމުމަށް ޢަމަލުނުކުރާ ނަމަ އެ ގަވާއިދުގެ ދަށުން ކުށަކަށް ވަކި އަދަބެއް ކަނޑައަޅާފައިނުވާ ކޮންމެ ކުށެއްގެ އަދަބެއްގެ ގޮތުން 1،000 ރުފިޔާގެ ޖޫރިމަނާއެއް އަންނާނެއެވެ.
އިތުރު ލިޔުންތައް

އާދިއްތަ ދުވަހުން ފެށިގެން ސެކިއުރިޓީ ފީޗަރތަކާއެކު ޑޮމެއިންގެ ޚިދުމަތް އަލުން ފަށަނީ
5 މަސް ކުރިން
ފ. އަތޮޅުގެ ދެ ރަށެއްގައި ލައިސަންސް ޓްރެކް ހުޅުވަނީ
މަހެއް ކުރިން
އައު ޓާމިނަލް ހުޅުވުމާއެކު އެއާޕޯޓުގެ ޓްރެފިކް ފްލޯއަށް އަންނާނެ ބަދަލުތަކާ ގުޅޭގޮތުން މަޝްވަރާކޮށްފި
މަހެއް ކުރިން