ޣައްޒާގެ ދެކުނުގައި ހުރި ހޮސްޕިޓަލަކަށް އިސްރާއީލުން ދިން ވައިގެ ހަމަލާއެއްގައި ހަމާސްގެ އިސް ލީޑަރަކާއި 16 އަހަރުގެ ކުއްޖަކު ޝަހީދުކޮށްލައިފިއެވެ. ޝަހީދުކޮށްލާފައިވަނީ ހަމާސްގެ ޕޮލިޓިކަލް ބިއުރޯގެ މެމްބަރެއް ކަމަށްވާ އިސްމާއީލް ބަރްހޫމްއެވެ. އޭނާއަކީވެސް ހޮސްޕިޓަލުގައި ފަރުވާ ހޯދަމުންދިޔަ މީހެކެވެ.

ހަމަލާއާ ގުޅިގެން ހަމާސްއިން ބުނީ ޔަހޫދީންގެ މި ހަމަލާއަކީ ހަނގުރާމައިގެ ޖަރީމާތަކެއް ކަމަށާއި މިއީ ޓެރަރިޒަމްގެ ހަމަލާއެއްކަމަށެވެ.މި ހަމަލާގައިއިތުރު 8 މުސްލިމުން ޒަޚަމްވެފައިވާ ކަމަށް އަލް ޖަޒީރާގެ ނޫސްވެރިޔާ ހިންދު ޚުދައިރީ ރިޕޯޓުކޮށްފައިވެއެވެ. ހޮސްޕިޓަލުގައި މަސައްކަތްކުރާ ޑޮކްޓަރ ފިރޯޒް ސިދްވާ ވިދާޅުވީ ޝަހީދުވި 16 އަހަރުގެ ކުއްޖާއަކީ އޭނާގެ ޕޭޝަންޓެކެވެ. އަދި އެ ކުއްޖާއަކީ ބަނޑުގެ އޮޕަރޭޝަނަކަށްފަހު މާދަމާ ދޫކޮށްލަން ހަމަޖެހިފައި އޮތް ކުއްޖެއްކަމަށް ޑޮކްޓަރ ފިރޯޒް ވިދާޅުވެފައިވެއެވެ.

ޔަހޫދީ ސިފައިން ޣައްޒާއަށް ދެމުން ގެންދާ ހަމަލާތަކުގައި އިއްޔެވަނީ ޣައްޒާގެ ދެކުނަށް ޚާން ޔޫނިސްގެ ސަރަހައްދަށް ވައިމަގުން ދިން ހަމަލާއެއްގައި ހަމާސްގެ ސިޔާސީ ލީޑަރެއް ކަމުގައިވާ ސަލާހް އަލް-ބަރުދަވީލްވެސް ޝަހީދުކޮށްލާފައެވެ. ސަލާހް ޝަހީދުކޮށްލާފައިވަނީ އޭނާ އާއި އޭނާގެ އަނބިކަނބަލުން ޚާން ޔޫނިސްގެ ޓެންޓެއްގައި ނަމާދަށް ހުންނަވަނިކޮށް މިސައިލު ހަމަލާއެއް ދީގެންނެވެ.

އެއާއެކު އަންގާރަ ދުވަހުން ފެށިގެން އިސްރާއީލުން ޝަހީދުކޮށްލި ހަމާސްގެ ޕޮލިޓިކަލް ބިއުރޯގެ މެމްބަރުންގެ އަދަދު 4 އަށް އަރައެވެ.

2023 ވަނަ އަހަރުގެ އޮކްޓޯބަރުމަހުން ފެށިގެން ޔަހޫދީން ޣައްޒާގައި ހިންގަމުން އަންނަ ގަތުލުއާއްމުގައި ޝަހީދުކޮށްލި މުސްލިމުންގެ އަދަދުވަނީ ބައި ލައްކައަށް އުފުލިފައެވެ.