logoEN
ޚަބަރު

ބޭނުންހާ އެއްޗެއް ބުނުމަކީ ޚިޔާލު ފާޅުކުރުމުގެ މިނިވަންކަމެއް ނޫން، ޙައްޤުތަކާ އެކީގައި ޙުދޫދުތަކެއް ވެސް އޮވޭ: ރައީސް

24  ޙާފިޡުން ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވާހަކަފުޅު ދައްކަވަނީ -- ފޮޓޯ: ރައީސް އޮފީސް

24 ޙާފިޡުން ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވާހަކަފުޅު ދައްކަވަނީ -- ފޮޓޯ: ރައީސް އޮފީސް

އަޙްމަދު ސަދޫފް މޫސާއަޙްމަދު ސަދޫފް މޫސާ

26 މާރިޗު 2025 - 17:49

ބޭނުންހާ އެއްޗެއް އަނެކަކާ ދިމާލަށް ބުނުމަކީ ޚިޔާލު ފާޅުކުރުމުގެ މިނިވަންކަމެއް ނޫން ކަމަށާއި، ޙައްޤުތަކާ އެކީގައި އެ ޙައްޤުތަކުގެ ޙުދޫދުތަކެއް ވެސް އޮންނާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އިސްލާމީ މަރުކަޒުގެ އެތެރޭ ހޯލުގައި މިރޭ ބޭއްވި 24 ޙާފިޡުން ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވަމުން ރައީސް ވަނީ މި ޤައުމަކީ 100 އިންސައްތަ އިސްލާމީ ޤައުމަކަށް ވާއިރު، މި މުޖްތަމައުން ފެންނަ ނޭދެވޭ ބައެއް ކަންކަމުގެ މައްޗަށް އަލިއަޅުއްވައި، ކަންބޮޑުވުމާ އެކު ވާހަކަފުޅު ދައްކަވާފައެވެ.

އެގޮތުން ރައީސް ވިދާޅުވީ، މިއަދުގެ މުޖްތަމައުގައި އެންމެންގެ ޢަމަލުތައް ހުރީ ކިހިނެއްތޯ ވިސްނާލުން މުހިންމު ކަމަށާއި، މި މުޖްތަމައުގައި އިސްލާމް ދީނުގައި މަނާކުރައްވާފައިވާ ހުރިހާ އާދައެއް އާންމުންވަމުންދާ ކަމަށެވެ. އޭގެ ތެރޭގައި ދެބަ އޮޑުވުމާއި ނޮތިމޮށުމާއި، ދޮގު ވާހަކަތައް ފެތުރުން އިންތިހާއަށް އާންމުވެފައިވާ ކަމުގައި ރައީސް ވިދާޅުވިއެވެ.

އަޅުގަނޑުމެންގެ ޢަމަލުތައް ހުރީ ކިހިނެއްތޯ އެއީ މިއަދު ވިސްނަންޖެހޭ ކަމެއް. އަދި މިފަދަ ރެއެއްގައި މިވާހަކަ ދެކެވިގެންދާއިރު އަދި މިފަދަ ޙަފުލާއެއް ބޭއްވިގެންދާއިރު އަޅުގަނޑުމެން ވިސްނަންޖެހޭނެ ކަމެއް. ސައްތައިން ސައްތަ އިސްލާމީ ޤައުމެއްގައި އަދި އަމުދުން މިވާހަކަ ދެކެވެންޖެހޭނެ. ކިހިނެއްތޯ ކަންތައްތައް ހުރީ. އަޅުގަނޑުމެންގެ އެކަކު އަނެކަކުގެ އަބުރަށް އަރައިގަންނަނީ. ދެބައޮޑުވަނީ. ނެތިމޮށެނީ. ދޮގު ވާހަކަތައް އިންތިހާއަށް ފަތުރަނީ. މިހެން ގޮސް އަޅުގަނޑުމެންގެ ތެރޭގައި ނެތް ކަމެއް ނެތް. ގޯސް ހުރިހާ އާދައެއް. އިސްލާމް ދީނުގައި ކީރިތި ޤުރްއާނުގައި މަނާކުރައްވާފައިވާ އެކަންކަމާ ދުރަށް ދާން އަންގަވާފައިވާ ހުރިހާ ކަމެއް މި ސައްތައިންސައްތަ އިސްލާމީ ޤައުމުގައި އަޅުގަނޑުމެންގެ ތެރޭގައި އަޅުގަނޑުމެން މި ކުރަނީ، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް ވިދާޅުވީ މިއަދު މި މުޖްތަމައުގެ ތެރެއިން އިންސާނީ ކަރާމާތަށް އަރައިގަތުން އާންމުވެފައިވާ ކަމަށާއި، އެހެން ނަމަވެސް ކީރިތި ޤުރްއާނުގައި ދިރިއުޅުމަށް ދަސްކޮށްދީފައިވަނީ އެފަދައިން ނޫންކަމަށެވެ. އޭގެ މިސާލެއްގެ ގޮތުގައި އިސްރާ ސޫރަތުގެ 70 ވަނަ އާޔަތާއި އެ އާޔަތުގެ މާނަ ވިދާޅުވަމުން ރައީސް ވިދާޅުވީ، ކޮންމެ މީހަކީ ވެސް ކަރާމާތެއް ލިބިފައިވާ މީހެއް ކަމަށާއި، އެއް އިންސާނަކު އަނެކަކަށް އިޙްތިރާމު ވެސް ކުރަން ޖެހޭ މީހެއް ކަމަށެވެ.

undefined24 ޙާފިޡުން ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވާހަކަފުޅު ދައްކަވަނީ -- ފޮޓޯ: ރައީސް އޮފީސް

އެގޮތުން އެކަކު އަނެކަކާ ދިމާލަށް ބޭނުންހާ އެއްޗެއް ބުނުމަކީ ވެސް ޚިޔާލު ފާޅުކުރުމުގެ މިނިވަންކަމެއް ނޫންކަމުގަައި ފާހަގަކުރައްވަމުން ރައީސް ވިދާޅުވީ، ޚިޔާލު ފާޅުކުރުން ފަދަ ޙައްޤުތަކާ އެއްވަރަށް، އެ ޙައްޤުތަކުގެ ޙުދޫދުތައް ވެސް އޮންނަ ކަމަށެވެ.

އޭގެ މަފްހޫމަކީ އަޅުގަނޑުމެން ކޮންމެ މީހަކީ އަނެއް އިންސާނާއަށް ރެސްޕެކްޓް [އިޙްތިރާމް]ކުރަންޖެހޭ، އިޙްތިރާމް އަދާކުރަންޖެހޭ ބަޔަކަށް ވާންޖެހޭ. ތިމަންނާ މަތިވެފައި، އަނެއް މީހާ ދަށްކޮލުން. ތިމަންނާ ބޭނުންހާ އެއްޗެއް އަނެއްމީހާއާ ދިމާލަށް ބުނުމުގެ ޙައްޤަކީ ޚިޔާލު ފާޅުކުރުމުގެ މިނިވަންކަމެއް ނޫން. ޙައްޤުތަކާ އެކީގައި އޭގެ ޙުދޫދުތަކެއް ވެސް އޮވޭ. ރައިޓްސްއާ އެކީގައި ލިމިޓޭޝަންސް އޮވޭ. އެހެން ނޫނީ އިންސާނީ މުޖްތަމައެއް ހެޔޮ ގޮތުގައި ކުރިއަކަށް ނުދާނެ. އެހެންވީމާ އަނެއް އިންސާނާއަކީ ތިމަންނާ ފަދައިން ކަރާމަތްތެރިކަން ލިބިގެންވާ މީހެއްކަން ޤަބޫލުކުރެވުނު ދުވަހަކުން މި މުޖްތަމައު ރަނގަޅުވާނީ. އެއީ ކީރިތި ޤުރްއާނުގައި ވަރަށް ސާފުކޮށް އެނގެން އޮތް ކަމެއް. އަޅުގަނޑުމެން ޖެހޭ އެކަން ޤަބޫލުކުރަން، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

އެއާއެކު ރައީސް ވިދާޅުވީ، މި މުޖްތަމައުގެ ތެރޭގައި ގެއްލެމުންދާ އިންސާނީ ކަރާމާތް އަނބުރައި ގެނެވޭނީ ކޮންމެ ދުވަހަކު ވެސް ކީރިތި ޤުރްއާނަށް އަމަލުކުރަން ފެށުމުން ކަމަށެވެ. އެގޮތުން އެކަންތައް ރަނގަޅުކުރުމަށް، ހެޔޮ ނިޔަތާއެކު މަސައްކަތްކުރާ ނަމަ މި މުޖްތަމައު ވެސް ރަނގަޅުވާނެ ކަމުގައި ރައީސް ވިދާޅުވިއެވެ.

އަޅުގަނޑުމެންގެ އަނެއް މުސްލިމާ، ތިމަންނަގެ އަތާއި ދުލުގެ ނުބައިކަމުން ސަލާމަތްވެފައިތޯ ވަނީ މި ސުވާލުކުރަން އެބަޖެހޭ. ﷲ ސުބްޙާނަހޫ ވަތައަލާ، ޢާލަމްތަކަށް ރަޙްމަތެއް ގޮތުގައި ފޮނުއްވި ކީރިތި ރަސޫލާ ސައްލަﷲ ޢަލައިޙި ވަސައްލަމްގެ ޙަދީޘްފުޅުގައި އޮތީ އެހެންނޫންތޯ. މުސްލިމަކީ އޭނާގެ އަތާއި ދުލުގެ ނުބައިކަމުން އެހެން މުސްލިމުން ސަލާމަތްވެގެންވާ މީހާއެވެ. އަޅުގަނޑުމެން އެ ސުވާލު އަޅުގަނޑުމެންގެ އަމިއްލަ ނަފްސާ ކުރަންޖެހޭ ނޫންތޯ. މިކަން އަޅުގަނޑުމެން ކޮށްފިއްޔާ އަދި ހެޔޮ ނިޔަތުގައި ކޮށްގެން އެކަންކަން ރަނގަޅުކުރަން އުޅެފިއްޔާ އިސާހިތަކު މި މުޖްތަމައު ރަނގަޅުވާނެ، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް ވިދާޅުވީ ކީރިތި ޤުރްއާނުގެ ވަރަށް ގިނަ އާޔަތްތަކުގައި މުސްލިމުންގެ ސިފަތައް ބަޔާންކޮށްދެއްވާފައިވާއިރު، މުސްލިމުންގެ މެދުގައި ރަޙުމްވެރިކަމާއި، އޯގާވެރިކަން އޮންނަން ޖެހޭ ވަރު ވެސް ކީރިތި ޤުރްއާނުގައި ސިފަކޮށްދެއްވާފައިވާ ކަމަށެވެ. އަދި ޤުރްއާނުގައި ބަޔާންކޮށްފައިވާ ގޮތަށް ޢަމަލުކުރުމަށް އެމަނިކިފާނުވަނީ ތަކުރާރުކޮށް އިލްތިމާސްކުރައްވާފައެވެ.

ކޮމެންޓް

871x217_placeholder