އިސްރާއީލުން ޣައްޒާއަށް ދިން ވައިގެ ހަމަލާއެއްގައި ހަމާސްގެ ތަރުޖަމާނަކު ޝަހީދުކޮށްލާފައިވާކަމަށް މީޑިއާ ރިޕޯޓުތަކުން ބުނެފިއެވެ. މިއަދުގެ ފަތިހު ގެ ވަގުތެއްގައި ޣައްޒާގެ އުތުރުގައި އޮންނަ ޖަބާލިޔާއަށް ދިން ވައިގެ ހަމަލާއެއްގައި ޝަހީދުކޮށްލާފައިވަނީ ހަމާސްގެ ތަރުޖަމާނެއްކަމަށްވާ އަބްދުލް ލަތީފް އަލް-ޤަނޫއާކަމަށް އަލް-އަޤްސާ ޓީވީން ބުނެފައިވެއެވެ. މި ހަމަލާގައި ކުޑަކުދިން ހިމެނޭ ގޮތަށް އިތުރު ބަޔަކު ޒަޚަމްވެފައިވާކަމަށް އަލްޖަޒީރާގެ ނޫސްވެރިޔާ ހިންދް ޚުދާރީ ބުނެފައިވެއެވެ.ފާއިތުވި ވަގުތުތަކުގައި އިސްރާއީލުން ޣައްޒާގެ އެކި ސަރަޙައްދުތަކަށް ހަމަލާދީފައިވާއިރު ޣައްޒާގެ އައް-ސަފްތާވީ ސަރަޙައްދުގައި ހުރި ގެއަކަށް ދިން ހަމަލާއެއްގައި އެއް ޢާއިލާއެއްގެ 6 މެންބަރުން ވަނީ ޝަހީދުކޮށްލާފައެވެ. އިސްރާއީލުން ޣައްޒާއަށް ދެމުން އަންނަ ހަމަލާތައް އަލުން ފަށާފައިވާއިރު މިހާރު ދުވާލެއްގެ މައްޗަށް 100 އަށް ވުރެ ގިނަ މީހުން ޝަހީދުކޮށްލައެވެ. އަދި ކޮންމެ 45 މިނިޓަކުން ތުއްތު ކުއްޖަކު ޝަހީދުކޮށްލާކަމަށް ބައިނަލްއަގްވާމީ މީޑިއާތަކުން ބުނެއެވެ.

މިދިޔަ ހަފްތާގައި ހަމާސްގެ އިސް އޮފިޝަލުންތަކެއް ޔަހޫދީންވަނީ ޝަހީދުކޮށްލާފައެވެ. އެގޮތުން އާދީއްތަ ދުވަހު ޚާން ޔޫނިސްގެ ނާސިރު ހޮސްޕިޓަލަށް އިސްރާއީލުން ދިން ހަމަލާއެއްގައި 5 މީހުން ޝަހީދުކޮށްލިއެވެ. މީގެ ތެރޭގައި ހަމާސްގެ ސިޔާސީ އޮފީހުގެ މާލީ އަދި މުއައްސަސާތަކުގެ އިސްވެރިޔާ އިސްމާޢީލް ބަރްހޫމް ހިމެނިވަޑައިގަންނަވައެވެ.އަދި އިސްރާއީލުގެ ފައިޓަރ ޖެޓުތަކުން ޚާން ޔޫނިސްގައި ހުންނަ ހިޖުރަކުރި މީހުންގެ ޓެންޓުތަކަށް ހަލަމާދީ ނަމާދަށް ހުންނަވަނިކޮށް ހަމާސްގެ ސިޔާސީ ލީޑަރެއްކަމުގައިވާ ސަލާހް އަލް-ބަރްދަވީލްވަނީ ޝަހީދުކޮށްލާފައެވެ. މި ދެބޭފުޅުންނަކީވެސް ހަމާސްގެ ސިޔާސީ އޮފީހުގެ މެންބަރުންނެވެ. މިއީ 20 މެންބަރުންގެ މައްޗަށް އެކުލެވޭ ނިންމުންތައް ނިންމާ މަޖިލީހެކެވެ.

2023 ގެ އޮކްޓޯބަރު 7 ގައި އިސްރާއީލާ ދެކޮޅަށް ހަމާސްއިން ދިން ހަމަލާގައި ރަހީނުކުރި 250 އެއްހާ މީހުންގެ ތެރެއިން 59 މީހުން އަދިވެސް ހަމާސްގެ ބާރުގެ ދަށުގައި ތިބިކަމަށް ބެލެވެއެވެ.އޮކްޓޯބަރު 7 ގެ ހަމަލާގައި މަދުވެގެން އިސްރާއީލުގެ 1,139 މީހުން މަރުވިއެވެ. އޭގެ ފަހުން އިސްރާއީލުން ގާޒާއަށް ދިން ހަމަލާތަކުގައި މަދުވެގެން 50,183 ފަލަސްތީނުން މަރުވެ، 113,828 މީހުންނަށް ޒަޚަމްވެފައިވެއެވެ.އދ. ގެ އިންސާނީ އެހީގެ އޭޖެންސީއިން ބުނާގޮތުގައި މާރިޗު 18 އިން ފެށިގެން 142,000 ފަލަސްތީނު މީހުން އިސްރާއީލުގެ ސިފައިންގެ ސަބަބުން ހިޖުރަކުރަން ވަނީ މަޖުބޫރުވެފައެވެ. ހަނގުރާމަ ދާއިމީކޮށް ހުއްޓުވުމަށް ކުރެވޭ މަސައްކަތްތަކަށް އިސްރާއީލުން ގަސްދުގައި ހުރަސްއަޅަމުންދާކަމަށް ހަމާސްއިން ތުހުމަތުކުރާއިރު އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ ބުނެފައިވަނީ ހަމާސްއިން ޔަހޫދީންގެ ނިންމުތަކާ ދެކޮޅު ހަދާތީ ހަނގުރާމަ ވަރުގަދަކުރާނެކަމަށާއި އަދި ޣައްޒާގެ އެކި ހިސާބުތަކުގައި ޔަހޫދީން އާބާޒުކުރާނެކަމަށެވެ.