ރާއްޖެއަކީ ސައްތައިން ސައްތަ އިސްލާމީ ޤައުމެކެވެ. މާތްވެގެންވާ އިސްލާމް ދީނުގެ ހިޔާވަހިކަމުގެ އުފާފާގަތިކަން ދިވެހިން ލިބިގަތީ، ހިޖްރީ ތާރީޚުން މީގެ 898 އަހަރު ކުރިން، އަދި މީލާދީ ތާރީޚުން މީގެ 871 އަހަރު ކުރިންނެވެ. އެ ދުވަހުން ފެށިގެން މިއަދާ ހަމައަށް ވެސް ދިވެހިން އެ މަތީގައި ސާބިތުކަމާއެކު ދެމިތިބެ، އެކުވެރިކަމާއި އެއްބައިވަންތަކަންމަތީ ޤައުމު އާރާސްތުކުރަމުން އައި ވަރުގަދަ ބިންގަލަކީ އިސްލާމް ދީނުގެ ޞައްޙަ ޢަޤީދާއެވެ. ދުޢާ އަކީ، މާތް ﷲގެ ވާގިފުޅާއެކު، ތާއަބަދަށް ވެސް ދިވެހިން އިސްލާމީ ހިދާޔަތުގައި ދެމިތިބުމެވެ.

ޒަމާންދުށް ކަންކަން މިއަދާއި އަރާއި ހަމަކުރިއިރު، ރާއްޖޭގެ އިސްލާމީ ސިފަތައް ދިރުވައި، ރިވެތި އަޚްލާގް އަށަގަންނުވައި، އިސްލާމީ ޝިއާރު ނެގެހެއްޓުމަށް އޮތީ ބުރަމަސައްކަތެއްކުރަންޖެހިފައެވެ. އިސްލާމް ދީނުގެ އަދުވުން ރާއްޖޭގައި އޮތް އިސްލާމީ ސިފަތަކާއި ގުޅުންތައް ހީނަރުކޮށް، ކިލަނބުކުރުމަށް ކެނޑިނޭޅި ކުރަމުން އަންނަ މަސައްކަތުގައި މަދު އަދަދެއްގެ ނަމަވެސް ދިވެހިންގެ ބައިވެރިވުން ވެސް ވަނީ ހޯދާފައެވެ.

އިސްލާމީ ސިފަތަކުގައި ޒީނަތްތެރިވެ، ކުލުނާއި ލޯބި އުފައްދައި، އަޚުވަންތަކަށް ދަމަހައްޓައި، ރިވެހި އަޚްލާގުން މުޖުތަމައު ޖަރީކުރުމަށް ގިނަ މަސައްކަތްތަކެއް އޮތީ ކުރާންޖެހިފައެވެ. އެކި ވެރިން ވެރިކަމަށް ވަޑައިގެން އެކި މިންވަރަށް މިކަމުގައި އުޅުއްވިއެވެ. ނަމަވެސް ރާއްޖޭގައި އުފެދޭ ބޮޑެތި މައްސަލަތައް ދިޔައީ އިތުރުވަމުންނެވެ. އޭގެ މާނައަކީ އެވެރިންނަށް ވެސް މިކަމުގެ ހައްލު ހޯދުމަށް އެކަށޭނަ ނަތީޖާ ނެރެވިފައި ނުވުމެވެ. އެ މައްސަލަތަކުގެ މުގޫ ގުޅިފައި ވަނީ ދީނާ ޚިލާފް ކަންކަމަށެވެ. އެއީ ޑްރަގްގެ ވަބާކަމަށް ވިޔަސް، ގޭންގު ކުށްތައް ކަމަށްވިޔަސް، ވައްކަމާއި ކޮރަޕްޝަންކަމަށް ވިޔަސް، ޒިޔޭއާއި ލިވާތުކަމަށް ވިޔަސް ހުރިހާކަމެއްގެ އަސްލަކީ އިސްލާމީ ސިފަ ބަލިކަށިވެ، އަގީދާ އަށް އަސަރުކޮށް، ހެޔޮތަރުބިއްޔަތުން ދަރިން ނެެއްޓިދާ ދިޔުމުގެ ނަތީޖާއެވެ.

ރައީސް މުޢިއްޒު، ދިވެހި އުދަރެހުން ލިބުނު އުންމީދުގެ އަލިކަމެއް

17 ނޮވެމްބަރު 2023 ގައި ރާއްޖޭގެ ވެރިކަމާއި ހަވާލުވެވަޑައިގެން ރައީސް ޑރ. މުހައްމަދު މުޢިއްޒު ވެގެން ގޮސްފައި ވަނީ ރާއްޖޭގެ އިސްލާމީ ޝިޢާރު ދިރުވައި، އިސްލާމީ ތަރުބިއްޔަތުގެ މަތީގައި ދިވެހި ދަރިން ތަރުބިއްޔަތުކޮށް، ދީނީ ކަންކަމަށް އެންމެ އަހުމިއްޔަތު އިސްކުރެއްވި އެއް ރައީސްކަމުގައެވެ. އެއީ އެކަންކަމަށް އެންމެ ސަމާލުކަންދެއްވާ، ދިވެހި ޤައުމުގައި އިސްލާމީ ވަންތަ ސިފަތައް އިޔާދަކުރެއްވުމަށް އެންމެ ބޮޑު މަސައްކަތެއް ކުރެއްވި ރައީސްކަން އެމަނިކުފާނުގެ ފުރަތަމަ އަހަރު ދުވަހުގެ މަސައްކަތުގެ ރެކޯޑުން ވެސް ސާފުވެއެވެ.

ސަލީމްބެގެ އުމުރުން މިހާރު ހަތް ދިހަޔަށް ފައި ނަގަނީއެވެ. ސަލީމްބެ ބުނިގޮތުގައި އިސްލާމީ ކަންކަމަށް މިހާ އިސްކަންދެއްވައި، ޤައުމުގައި އިސްލާމީ ސިފަތައް އަށަގަންނަވައި، އިސްލާމީ ތަރުބިއްޔަތު ގައުމުގައި އާލާކުރެއްވުމަަށް މިހާ މަސައްކަތްކުރެއްވި ވެރިއެއް ސަލީމްބެގެ އުމުރުގައި ނުދެކެއެވެ.

އަޒީޒާއްތަ ބުނިގޮތުގައި އޭނާގެ އުމުރުން މިވީ 65 އަހަރުގައި ވެސް މިވަރު ވެރިއެއް ނުދެކެއެވެ. ސަބަބެއްގެ ގޮތުގައި ބުނީ، ރާއްޖޭގެ ހާލަތު އޮތްގޮތުން އެންމެ މުހިންމީ ހެޔޮ ތަރުބިއްޔަތުކަމުން އެކަންކަމަށް ރައީސް ފެއްޓެވި މަސައްކަތްޕުޅެވެ. އަދި އަޅުކަަމަށް އިސްކަން ދެއްވައި، އަމިއްލަ ފުޅަށް އެ ނަމޫނާ ދައްކަވައި، ރައްޔިތުންނަށް ވެސް އެމަގު ފަހިކޮށްދެއްވަމުން ގެންދަވާތީއެވެ.

ގާދިރު ބުނާގޮތުގައި އޭނާފަދަ ދޮށީ އުމުރު މީހުންނަށް ވެސް އެންމެ އޯގާތެރި، އަދި ދޮށީ އުމުރު މީހުންނަށް އިޚްތިރާމް ލިބިނިވިގޮތައް ގައުމުގެ ކަންކަން ތަރުތީބު ކުރުމުގައި ރައީސް މުޢިއްޒު އުޅުއްވަނީ އެހެން ވެރީންނަށްވުރެ ކުރީގައެވެ. އަދި ޚާއްޞަކޮށް ރާއްޖޭގައި ދީނީ ޝިއާރު ވަރުގަދަކުރައްވަން ރައީސް ކުރަށްވާ މަސައްކަތްޕުޅު އޭނާ ފާހަގަކުރިއެވެ.

ހައްވައްތަބުނީ ރައީސް މުޢިއްޒު އަކީ ވަރަށް ރަނގަޅު މިސާލެއްކަމަށެވެ. އަދި ވެރިން މިސާލުދެއްކުމަކީ ކަންކަން އިސްލާހްވެ ހަމަމަގަށްއެޅެން އޮތް އެންމެ ރަނގަޅު ހަތިޔާރުކަން އޭނާގެ ތަޖުރިބާގެ އަލީގައި ކިޔައިދިނެވެ. ރައީސް މުޢިއްޒު ނަމާދަށް ވަޑައިގެން ދީނީކަންކަމަށް ދެއްވާ އިސްކަން ދެކި، ރައްޔިތުން އެ ނަމޫނާ ނަގާނެކަމަށް ހައްވައްތަ ބުންޏެވެ. އަދި އެމަނިކުފާނުގެ ވެރިކަމުގައި އެންމެ އިސްކަން ދެއްވަނީ އިސްލާމްދީނަށާއި، ގައުމިއްޔަތު އިޔާދަކުރުންކަމަށްވާތީ، އެކަމަށް އެންމެން އެއްބާރުލުން ދީފިނަމަ އަހަރުތަކެއް ފަހުންވިޔަސް ރައީސްގެ އެ އިސްނެންގެވުމުގެ ފޮނި މޭވާ ލިބޭނެކަން ހައްވައްތަ ފާހަގަކުރިއެވެ.

ޒައިދުއަކީ ޒުވާން ޚަތީބެކެވެ. އޭނާ ބުނިގޮތުގައި ޒުވާންނުންނަށް ދީން އުނގަންނައިދީ، ދީނަށް ލޯބި ޖެއްސުމަށް މިވަރަށް މަސައްކަތްކުރެވުނުތަނެއް މީގެ ކުރިން އޭނަ ދެކިފައެއްނުވެއެވެ. ގޯސް ސިފަތައް ނައްތާލައި، ފުރިހަމަ ސިފަތަކެއް އަށަގެންނެވޭނީ ދެވޭ ތަރުބިއްޔަތާއި، އެކަމަށް ރޭވުންތެރިކަމާއެކު ކުރެވޭ ގިނަ މަސައްކަތްތަކަކުންކަމަށް ޒައިދު ދެކެއެވެ. ރައީސް މުޢިއްޒުގެ ސަރުކާރުން އެކަންކަން ކުރަށްވަމުންދާކަން ޒައިދު ފާހަގަކުރިއެވެ.

މި ހުރިހާ ބޭފުޅުން މިދެއްކެވި ވާހަކަތައް ކުލަވެގެން އަންނަނީ ރައީސް މުޢިއްޒުގެ ވެރިކަމުގެ ފުރަތަމަ އަހަރުގެ ސަފުހާތަކުންނެވެ.

ރައީސް މުޢިއްޒުގެ ވެރިކަމުގެ ފުރަތަމަ އަހަރުގެ ސަފުތާކުން ތަންކޮޅެއް

ރައީސް ޑރ. މުޢިއްޒުގެ އިރުސާދުގެ ދަށުން މުޅި ރާއްޖެއަށް އަމާޒުކޮށްގެން ރިސާލަތު ޕްރޮގްރާމްގެ ނަމުގައި ޚާއްޞަ ޕްރޮގްރާމެއް ފަރުމާކޮށް، ރާއްޖޭގެ އެކި ކަންކޮޅުތަކުގައި އެ ޕްރޮގްރާމްތައް މެދުކެނޑުމެއްނެތި އަންނަނީ ހިންގަމުންނެވެ. އަދި ދިވެހި މުޖުތަމަޢު ފަރުޟު ފަސް ނަމާދަށް އަހުލުވެރިކުރުވުމުގެ މާތް މަޤުޞަދުގައި "ނަމާދު މަތިވެރިކުރުން" މި ނަމުގައިވެސް މުހިންމު މަޝްރޫޢެއް ވަނީ ފައްޓަވާފައެވެ.ހަމަމިއާއެކު އިސްލާމީ ލީޑަރޝިޕް ކޮލިޓީ އުނގަންނައިދީ ހޭލުންތެރިކުރުވުމަށްޓަކައި "އިސްލާމީ ލީޑަރޝިޕް މެނޭޖްމަންޓް" ޕްރޮގްރާމެއް، އެކަމާ ގުޅުންހުރި ދާއިރާތަކަށާއި ޖަމުޢިއްޔާތަކަށް އަމާޒުކޮށްގެން، މި އަހަރު ކުރިއަށް ގެންދަން ވަނީ ނިންމާފައެވެ.

މީގެ އިތުރުން، މިސްކިތްތަކާބެހޭ ޤައުމީ މަޖިލީސް ވާނީ އަލުން އުފައްދަވައި، މަޖިލީހުގެ ބައްދަލުވުންތައް ބާއްވައި، މިސްކިތްތަކުގެ ހާލަތު ދަނީ ދުވަހުން ދުވަހަށް ބަލަހައްޓަވަމުންނެވެ. އަދި ދައުލަތުގެ ބަޖެޓުން 2024 ވަނަ އަހަރު 7.8 މިލިއަން ރުފިޔާ، މިސްކިތްތައް ބެލެހެއްޓުމާއި މަރާމާތުކުރުމަށް ޚަރަދުކޮށްފައިވާއިރު، ރާއްޖޭގެ އެކި ކަންކޮޅުތަކުގައި މިސްކިތް ބިނާކުރުމަށް 35 މަޝްރޫޢު މި އަހަރު ކުރިއަށް ގެންދަވަން ވަނީ ނިންމަވާފައެވެ. އޭގެ ބައެއް މަޝްރޫޢުތައް މިހާރު ވަނީ ފަށާފައެވެ.

ޒަކާތުގެ ނިޒާމު ހަރުދަނާކޮށް ފުޅާކުރުމަށްޓަކައި ޒަކާތު ހައުސް އުފައްދަވައި، ފަޤީރުންގެ ދަފުތަރުގައި ރަޖިސްޓަރީ ވެފައިވާ ފަރާތްތަކަށް އާމްދަނީ ހޯދޭނެ ވަސީލަތްތައް މިހާރު ވަނީ ގާއިމުކޮށްދެއްވަން ފައްޓަވާފައެވެ. ޒަކާތުގެ ނިޒާމު، ލާބަހުރި ޒަމާނީ ގޮތެއްގައި ތަރުތީބު ކުރުމަށްޓަކައި ހަދަންޖެހޭ އުސޫލުތަކާއި، ގަވާއިދުތައް އެކުލަވައިލައި ވަނީ ފާސްކުރަށްވާފައެވެ. އަދި ޒަކާތުގެ މަސައްކަތްތައް، ޒަމާނީ ޓެކްނޮލޮޖީގެ އެހީގައި ކުރިޔަށް ގެންދިޔުމަށްޓަކައި ބޭނުންވާ ފަންނީ ޤާބިލުކަން ލިބިގަތުމަށްޓަކައި، "އިންޒެކް" އިންޓަރނޭޝަނަލް ޒަކާތު ކޮންފަރެންސް ވަނީ ބާއްވާފައެވެ.

ދިވެހިރާއްޖޭގެ އިސްލާމީ ސަޚްސިއްޔަތު އަލުން އާރާސްތުކުރުމަށް ކުރެވެމުންދާ މަސައްކަތްތަކުގެ ނަތީޖާ މިހާރު ދަނީ ފެންނަމުންނެވެ. ސްކޫލްތަކުގެ ދަންފަޅިތައް ފެށިގެން އަންނަނީ ކީރިތި ޤުރްއާންގެ މޫރިތި އާޔަތްތައް ދަރިވަރުންގެ ހިތްތަކަށް އިއްވައިދެމުންނެވެ. ރޯދަމަހު އަޅުކަމާއިގެން އުޅެވޭނެގޮތަށް މަސައްކަތްތަކަށް ލުއި ލިބޭނެ އިންތިޒާމު ހަމަޖައްސަވައިދެއްވައިފިއެވެ. ލިޔާނަމަ މިފަދަ އެތައް ކަމެކެވެ.

ރައީސް ޑރ. މުޙައްމަދު މުޢިއްޒުގެ ދީނީ ސިޔާސަތުގެ ސަބަބުން، އިސްލާމްދީނުގެ ރިވެތި އަޚްލާޤާއި ސިފަތަކުން ޒީނަތްތެރިވެފައިވާ މުޖުތަމަޢެއް ބިނާކުރުމަށް އަމާޒު ހިފާފައިވާ މަންޒަރު މިއަދު ދަނީ ފެންނަމުންނެވެ.

ރައީސް މުޢިއްޒުގެ ދީނީ ސިޔާސަތުގެ މައިގަނޑު އަމާޒަކީ ދިވެހިރާއްޖޭގެ އިސްލާމީ ސަޚްސިއްޔަތު އޭގެ އަސްލު މަޤާމަށް ރުޖޫޢަކުރުމެވެ.

ރައީސް މުޢިއްޒުގެ ދީނީ ސިޔާސަތުގެ ސަބަބުން ދިވެހިރާއްޖޭގެ އިސްލާމީ ސަޚްސިއްޔަތު އަލުން ދިރުވައި، ރިވެތި އަޚްލާޤާއި ސިފަތަކުން ޒީނަތްތެރިވެފައިވާ މުޖުތަމަޢެއް ބިނާކުރުމަށް އުންމީދުގެ އަލިކަމެއް ފެންނަމުންދެއެވެ. މި މަސައްކަތް ކާމިޔާބު ކުރުމަށްޓަކައި، ސަރުކާރާއި ރައްޔިތުން ގުޅިގެން މަސައްކަތްކުރުމަކީ މުހިންމު ކަމެކެވެ.