އިސްރާއީލުން ޣައްޒާގައި ހިންގަމުންދާ ހަނގުރާމައިގެ ޖަރީމާތަކުގައި ޝަހީދުވި ނޫސްވެރިންގެ އަދަދު އެމެރިކާ ބައިވެރިވެފައިވާ ފާއިތުވި ބޮޑު ހަތް ހަނގުރާމައިގައި ޖުމްލަ މަރުވި ނޫސްވެރިންގެ އަދަދަށްވުރެ ގިނަ ކަމަށް ރިޕޯޓެއްގައި ބުނެފައި ވެއެވެ.

ރިޕޯޓްގައި ބުނެފައިވާ ގޮތުގައި ޣައްޒާއަށް އިސްރާއީލުން ދެމުންދާ ހަމަލާތަކަކީ ދުނިޔޭގެ ތާރީޚު ދެކޭ ނޫސްވެރިންނަށް އެންމެ ނުރައްކާތެރި ހަނގުރާމަ އެވެ.

އިސްރާއީލުން 2023 ގައި ޣައްޒާއަށް ހަމަލާތައް ދޭން ފެށިފަހުން ފުރަތަމަ މަހުގައި އެކަނި، ކޮމިޓީ ޓު ޕްރޮޓެކްޓް ޖާނަލިސްޓްސްގެ މަޢުލޫމާތު ދައްކާގޮތުން މަދުވެގެން 37 ނޫސްވެރިން ޝަހީދުވިއެވެ. މިއީ ދުނިޔޭގައި ނޫސްވެރިން އެންމެ ގިނައިން މަރާލެވުނު މަސްދުވަސް ކަމަށް އެ ގްރޫޕުން ބުނެފައިވެއެވެ.

ނޫސްވެރިޔާ ނިކް ޓާސް ލިޔުނު މި ރިޕޯޓުގައި، އަލްޖަޒީރާ އަދި ކޮމިޓީ ޓު ޕްރޮޓެކްޓް ޖާނަލިސްޓްސްގެ ހިސާބުތަކަށް ބިނާކޮށް ނޫސްވެރިންގެ މަރުގެ އަދަދު ހިމަނާފައިވެއެވެ. ޓާސްގެ ހިސާބުތަކުން ދައްކާ އަދަދަކީ ފަހުން ބުނެވުނު ގްރޫޕުން އާންމުކޮށް ބަޔާންކުރާ އަދަދަށްވުރެ މާ ބޮޑު އަދަދެކެވެ.

ބްރައުން ޔުނިވަރސިޓީގެ ވޯޓްސަން އިންސްޓިޓިއުޓް ފޮރ އިންޓަނޭޝަނަލް އެންޑް ޕަބްލިކް އެފެއާޒްގެ "ކޮސްޓްސް އޮފް ވޯރ" ޕްރޮޖެކްޓްގެ އައު ރިޕޯޓެއްގައި ބުނެފައިވާ ގޮތުގައި، މާރޗް މަހުގެ ފަހުކޮޅާ ހަމައަށް މަދުވެގެން 232 ނޫސްވެރިން ޣައްޒާ އިން ޝަހީދުވެފައި ވެއެވެ. މީގެ ތެރެއިން ގިނައީ ފަލަސްތީނު ނޫސްވެރިންނެވެ. ޕެލެސްޓީނިއަން ޖާނަލިސްޓްސް ސިންޑިކެޓްގެ މަޢުލޫމާތު ދައްކާގޮތުން ޖެނުއަރީ މަހާ ހަމައަށް 380 އަށްވުރެ ގިނަ ނޫސްވެރިން ޒަޚަމްވެފައިވެއެވެ.