logoEN
ޚަބަރު

ތަންފީޒީ ފުލުހުންގެ ޚިދުމަތް ޤާއިމުކުރުމަކީ ސަރުކާރުގެ އަމާޒެއް

އާމިނަތު ސަފާއާމިނަތު ސަފާ

02 އޭޕްރީލު 2025 - 15:01

ތަންފީޒީ ފުލުހުންގެ ޚިދުމަތް ދިވެހިރާއްޖޭގައި ޤާއިމުކުރުމަކީ ސަރުކާރުގެ އަމާޒެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ސަރުކާރުގެ އަމާޒަކީ 2026ވަނަ އަހަރު ނިމުމުގެ ކުރިން މީހުން ދިރިއުޅޭ ހުރިހާ ރަށެއްގައި ފުލުހުންގެ ޚިދުމަތް ފެށުމެވެ.

މި އަމާޒަށް ވާސިލްވުމަށްޓަކައި ފުލުހުންގެ ހަރަކާތްތައް އިތުރުކޮށް މާލޭގެ މަގުމަތީގެ އަމާންކަން ކަށަވަރުކުރުމަށް ގިނަ އަދަދެއްގެ ފުލުހުން ޒޯންތަކަށް ބަހާލައިގެން އަންނަނީ ޑިޕްލޮއިކުރަމުންނެވެ.

ލާމަރުކަޒީކޮށް ރައްޔިތުންނާ ގާތުން ފުލުހުންގެ ޚިދުމަތް ދިނުމަށް ކުރަމުންދާ މަސައްކަތްތަކުގެ ތެރެއިން ރަށްރަށުގައި ފުލުހުންގެ ޚިދުމަތް ގާއިމުކޮށް އަދި ފުލުހުންގެ ޚިދުމަތް މިހާތަނަށް ގާއިމުވެފައި ނުވާ ރަށްރަށުގައި ފުލުހުންގެ ޚިދުމަތް ގާއިމުކުރުމުގެ މަސައްކަތް މެދުކެނޑުމެއްނެތި ސަރުކާރުން އަންނަނީ ކުރަމުންނެވެ.

އަދި ރާއްޖޭގެ ކޮންމެ ރަށަކީވެސް ކޮންމެވެސް ފެންވަރެއްގައި ފުލުހުންގެ ޚިދުމަތް ޤާއިމުވެފައިވާ ރަށްތަކެއްގެ ގޮތުގައި ހެދުމަށް ފުލުހުންގެ ޚިދުމަތުން މަސައްކަތްކުރަމުން އަންނައިރު ރަށްރަށުގައި ޕޮލިސް ސްޓޭޝަން ހެދުމާއި، ޕޮލިސް ޕޯސްޓް އަދި ޕޮލިސް ޑެސްކްތައް ޤާއިމްކުރުމުގެ މަސައްކަތްވެސް ފުލުހުންގެ މުޢައްސަސާއިން އަންނަނީ ކުރަމުންނެވެ.

undefined

ދިވެހި ފުލުހުންގެ ޚިދުމަތަށް 92 އަހަރު ފުރުމުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި މެސެޖުގައި ވަނީ މި ސަރަޙައްދުގެ އެންމެ ޒަމާނީ، އެންމެ އިތުބާރު ހުރި، އެންމެ އޯގާތެރި، އަދި އެންމެ ތަންފީޒީ ފުލުހުންގެ ޚިދުމަތް ދިވެހިރާއްޖޭގައި ޤާއިމުކުރުމަކީ ސަރުކާރުގެ އަމާޒެއްކަމުގައި ވިދާޅުވެފައެވެ.

އަދި ފުލުހުންގެ ޤައުމީ ޚިދުމަތަށް 100 އަހަރު ފުރުމާ ހަމައަށް ދާއިރު، މި ލަނޑުދަނޑި ހާސިލުކުރުމަށް ސަރުކާރުން މަސައްކަތް ކުރައްވާނެ ކަމުގެ ޔަގީންކަން އެމަނިކުފާނު ވަނީ ރައްޔިތުންނަށް ދެއްވާފައެވެ. މިކަން ހާސިލުކުރުމަށްޓަކައި ފުލުހުންގެ ތަމްރީނުތައް އިތުރަށް ހަރުދަނާކޮށް، ޒަމާނީ ވަސީލަތްތަކާއި ޓެކްނޮލޮޖީ ބޭނުންކޮށްގެން ފުލުހުންގެ ޚިދުމަތް އިތުރަށް ފުޅާކުރެވޭނެ ކަމަށްވެސް އެމަނިކުފާނު ވިދާޅުވިއެވެ.

މީގެއިތުރުން، ރައީސުލްޖުމްހޫރިއްޔާ ފާހަގަކުރެއްވީ ފުލުހުންގެ މުއައްސަސާގައި މިހާރުވެސް ޤައުމަށް ބޭނުންތެރި އެކި ދާއިރާތަކުން މޮޅަށް ކިޔަވައިގެން ތިބި ޤާބިލު އެތައް ދަރީންނެއް ތިބިކަމާއި، މި ޤާބިލުކަން އިތުރަށް ފުޅާކުރުމަށް ސަރުކާރުން އިސްކަންދޭނެކަމުގެ ޔަގީންވެސް ދެއްވާފައެވެ.

undefined

މީގެ އިތުރުން ފުލުހުންގެ ޚިދުމަތް އިތުރަށް ހަރުދަނާކުރުމަށްޓަކައި ބައިނަލްއަޤްވާމީ ފެންވަރުގައި ފުލުހުންގެ މުއައްސަސާތަކާއެކު ގުޅުން ބަދަހިކޮށް، އެ ފަރާތްތަކުގެ ތަޖުރިބާ އާއި ހުނަރު ހޯދުމަށް މަސައްކަތް ކުރައްވާނެކަން ފާހަގަކުރައްވާ ރައީސް ވަނީ ރާއްޖޭގެ ހުރިހާ ކަންކޮޅުތަކެއްގައި ފުލުހުންގެ ޚިދުމަތް ހަމަހަމަކަމާއެކު ފޯރުކޮށްދިނުމަށް އިތުރު މަސައްކަތްތަކެއް ކުރައްވާނެ ކަމަށް ވިދާޅުވެފައެވެ.

ރައީސް ވިދާޅުވީ ފުލުހުންނަކީ ރައްޔިތުންގެ އިތުބާރު ލިބިފައިވާ، އޯގާތެރި އަދި ޤާނޫނަށް ޙުރުމަތްތެރިކޮށް ހިތާ ބަޔަކަށް ހެދުމަކީ ސަރުކާރުގެ އެންމެ މުހިންމު އެއް އަމާޒު ކަމަށެވެ. އަދި މިކަން ހާސިލުކުރުމަށް ފުލުހުންނާއި ރައްޔިތުންގެ އެއްބާރުލުން ވަރަށް މުހިންމު ކަމަށްވެސް ރައީސް ފާހަގަކުރެއްވިއެވެ.

ތަންފީޒީ ފުލުހުންގެ ޚިދުމަތް ދިވެހިރާއްޖޭގައި ޤާއިމުކުރުމަކީ ސަރުކާރުގެ އަމާޒެއްކަން ރައީސް ހާމަކުރެއްވި އިރު އެމަނިކުފާނު ވަނީ 2025 ވަނަ އަހަރަކީ އުމްރާނީ ތަރައްޤީގެ އަހަރެއްގެ ގޮތުގައި ތަސައްވަރު ކުރައްވާފައެވެ. އެގޮތުން ރައީސްގެ ހާއްސަ އިރުޝާދުގެ ދަށުން ވަނީ ފުލުހުންގެ ޚިދުމަތް މުޅި ރާއްޖެއަށް ފުޅާކުރުމަށްޓަކައި 75 ރަށެއްގައި ފުލުހުންގެ މަރުކަޒުތައް އެޅުމުގެ މަސައްކަތް ސަރުކާރު ހިއްސާވާ ތިން ކުންފުންޏަކާ ހަވާލުކޮށްފައެވެ.

undefined

މި މަޝްރޫއު ނިމުމުން، ދިވެހިރާއްޖޭގެ މީހުން ދިރިއުޅޭ ރަށްތަކުގެ ގާތްގަނޑަކަށް ދެބައިކުޅަ އެއްބައި ރަށުގައި ފުލުހުންގެ އަމިއްލަ، ޒަމާނީ މަރުކަޒުތައް ހުންނާނެއެވެ. މީގެ ސަބަބުން ފުލުހުންގެ ބަޖެޓުގެ ރިކަރަންޓް ހަރަދު ކުޑަކޮށް، ހިދުމަތް ދިނުމަށް ކުރެވޭ ހޭދަ އިތުރުކުރެވޭނެކަމަށް ފުލުހުން މައުލޫމާތުދެއެވެ.

ކޮމެންޓް

871x217_placeholder