ދުޅަހެޔޮ މުޖުތަމަޢުއެއް ބިނާކުރުމަށް އެކި ކަހަލަ ފަރާތްތަކާއި އެކު މަސައްކަތްކުރެވޭ ފަދަ ބާރުވެރި އަދި ޤާބިލް ބަޔަކު ދިރިއުޅޭ މުޖުތަމަޢުއަކަށް ހެދުމަށް ކަމާއި ގުޅުން ހުރި ހުރިހާ ފަރާތްތަކެއް އެކު މަސައްކަތްކުރުމަކީ މުހިންމުކަމެއް ކަމަށް ސިއްހީ ވުޒާރާއިން ބުނެފިއެވެ.

2 އެޕްރީލްއަކީ ކޮންމެ އަހަރަކުވެސް ދުނިޔޭގެ އޯޓިޒަމްއަށް ހޭލުންތެރިކަމުގެ ދުވަސް ފާހަގަކުރާ ދުވަހެވެ.

މިނިސްޓްރީ އޮފް ހެލްތުއިން މި ދުވަސް ފާހަގަކުރުމުގެ މައިގަނޑު މަޤްޞަދަކީ އާންމުންގެ ހޭލުންތެރިކަން އިތުރުކޮށް، އަވަހަށް ފަރުވާ ފެށުމުގެ މުހިންމުކަން ފާހަގަކޮށް، އޯޓިޒަމް ހުންނަ ފަރާތްތަކާއި އެފަރާތްތަކުގެ އާއިލާތަކަށް ޚިދުމަތް ދިނުމުގައި އާއި އެހީތެރިވެދޭ ނިޒާމުތައް ހަރުދަނާކުރުމެވެ.

މިދުވަހާއި ގުޅޭގޮތުން މިއަހަރަށް، ޔުނައިޓަޑް ނޭޝަންސް (އދ.)އިން ކަނޑައަޅުއްވާފައިވާ ތީމްއަކީ "ނިއުރޯޑައިވަރސިޓީ އާއި އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތައް ކުރިއެރުވުން" އެވެ. މިގޮތުން، އޯޓިޒަމް ހުންނަ ފަރާތްތަކުގެ ހުނަރުކުރިއެރުވުމަށް މަގުފަހިކޮށްދިނުމާއި، އެފަރާތްތަކަށް ބޭނުންވާ ޚިދުމަތް ހޯދުމަށް ފަސޭހައިން ވާޞިލުވެވޭ މާޙައުލެއް ޤާއިމުކޮށް، ހަމަހަމަ ފުރުޞަތުތައް ހޯދައިދިނުމުގެ މުހިންމުކަން މި ތީމްގައި ފާހަގަކޮށްފައިވެއެވެ.

ދިވެހިރާއްޖޭގައި އޯޓިޒަމްއާ ގުޅޭ ހޭލުންތެރިކަމާއި ފަރުވާގެ ޚިދުމަތްތައް އިތުރުވަމުން އަންނަ ނަމަވެސް، އޯޓިޒަމް ހުންނަ ފަރާތްތަކަށް ލިބެންޖެހޭ ޚާއްޞަ ތަޢުލީމާއި އަދި ޞިއްޙީ ޚިދުމަތްތަކަށް ވާޞިލުވުމުގައި އަދި ވެސް ގޮންޖެހުންތައް ހުރިކަމާއި އަދި މުޖުތަމަޢުގެ ތެރެއިން މިފަދަ ފަރާތްތަކާއި މެދު ދެކޭ ނޭދެވޭ ގޮތްތަކުގެ ސަބަބުން އިޖުތިމާއި ކަންކަމަށާއި އަދި ޚިދުމަތް ހޯދުމުގައި ހުންނަ އުނދަގޫކަންކަން އަދިވެސް ތަހައްމަލުކުރަން ޖެހޭކަން ފާހަގަކުރެވެއެވެ.

ކުރިއާލާ މި ފަދަ ކޮންޑިޝަންތައް ދެނެގަތުމާއި އެކު އިންޓަވެންޝަން ދެވޭނެ ނިޒާމެއް ގާއިމްކުރުމާއި އަދި މިފަދަ ފަރުވާގެ ޚިދުމަތްތްތައް ފަސޭހައިން ރީޖަނަލް ހޮސްޕިޓަލްތަކުން ލިބޭނެ ނިޒާމެއް އެކުލަވާލުމަކީ މިނިސްޓްރީ އޮފް ހެލްތުގެ ވަރަށް ބޮޑު އަޒުމެކަން ފާހަގަކުރައްވާފައެވެ. މީގެ އިތުރުން ސަރުކާރުގެ ކަމާބެހޭ ވުޒާރާތަކާއި، އަމިއްލަ ޖަމްޢިއްޔާތަކާއި، ޞިއްޙީ ދާއިރާގެ ފަންނުވެރިންނާއި، ޔުނިސެފް އަދި ޑަބްލިއުއެޗްއޯ ފަދަ ބައިނަލްއަޤްވާމީ ބައިވެރިންނާ ގުޅިގެން އޯޓިޒަމްއަށް އެހީތެރިވުމުގެ ސިޔާސަތުތަކާއި ޕްރޮގްރާމްތައް ހަރުދަނާކުރުމަށް މިނިސްޓްރީ އޮފް ހެލްތުން މިހާރު ވެސް މަސައްކަތްކުރާ ކަން ވެސް ވަނީ ފާހަގަކުރައްވާފައެވެ.

ދުނިޔޭގެ އޯޓިޒަމްއަށް ހޭލުންތެރިކަމުގެ ދުވަސް ފާހަގަކުރުމަށްޓަކައި މިއަހަރުގެ ހަރަކާތްތަކުގެ ތެރޭގައި މީޑިއާ ކެމްޕެއިނެއް ހިންގުމާއި، މިދާއިރާގައި މަސައްކަތްކުރައްވާ ފަރާތްތަކުގެ މެދުގައި ޕެނަލް މަޝްވަރާކުރިއަށް ގެންދިއުމާއި، ގުޅުން ހުރި ދާއިރާތަކާއި އަދި ގުޅުންހުރި ފަންނީ ބޭފުޅުންނާއި އަދި އޯޓިޒަމްހުންނަ ފަރާތްތަކުގެ ބެލެނިވެރިންނާއި އެކު ރައުންޑް ޓޭބަލް މަޝްވަރާ ބައްދަލުވުން ބޭއްވުމަށްވަނީ ހަމަޖެހިފައެވެ. މީގެ އިތުރުން ޞިއްޙީ ޚިދުމަތްދޭ ފަރާތްތަކަށް ޙާއްސަ ތަމްރީން ޕްރޮގްރާމްތައް ވެސް ފަރުމާކުރެވި ބޭއްވިގެން ދާނެކަން އެ ވަޒާރާއިން ވަނީ ފާހަގަކުރައްވާފައެވެ. ދުޅަހެޔޮ މުޖުތަމަޢުއެއް ބިނާކުރުމަށް އެ މުޖުތަމަޢުއަކީ ތަފާތު އެކި ކަހަލަ ފަރާތްތަކާއި އެކު މަސައްކަތްކުރެވޭ ފަދަ ބާރުވެރި އަދި ޤާބިލް ބަޔަކު ދިރިއުޅޭ މުޖުތަމަޢުއަކަށް ހެދުމަށް ކަމާއި ގުޅުން ހުރި ހުރިހާ ފަރާތްތަކެއް އެކު މަސައްކަތްކުރުމަކީ މުހިންމުކަމެކެވެ.

ވީމާ، މި ދުވަސް ފާހަގަކުރުމަށް ބެލެނިވެރިންނާއި، ތަޢުލީމީ ދާއިރާގެ މަސައްކަތްތެރިންނާއި، ޞިއްޙީ ޚިދުމަތްތެރިންނާއި އަދި ޢާންމު ރައްޔިތުން ބައިވެރިވުމަށް މިނިސްޓްރީ އޮފް ހެލްތުއިން ވަނީ އިލްތިމާސްކޮއްފައެވެ. އެންމެން އެކުގައި މަސައްކަތްކޮށްގެން، އޯޓިޒަމް ހުންނަ މީހުންނަށް މުޖުތަމަޢުގައި ހުރިހާ ދާއިރާއަކުން ވެސް ކުރިއެރުން ލިބޭ އޯގާތެރި މާޙައުލެއް އުފެއްދުމަށާއި އަދި މިފަދަ ފަރާތްތަކާއި މެދު ގެންގުޅޭ ނޭދެވޭ ވިސްނުން ނައްތާލުމަށް އެންމެން އަތުގުޅާލުމަށް ވެސް ވުޒާރާއިން ވަނީ އިލްތިމާސްކުރައްވާފައެވެ.

މިފަދަ ކަންކަމަށް ސަރުކާރުން ގެންގުޅުއްވާ ސިޔާސަތްތަކަށް ދެއްވާ އަހައްމިއްޔަތު ފާހަގަކޮށް ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ވަނީ ޝުކުރު ދަންނަވާފައެވެ. އަދި ހަމައެހެންމެ، މި ދާއިރާއަށް އެކި ގޮތްގޮތުން އެހީތެރިކަން ފޯރުކޮށްދެމުންދާ ފަންނުވެރިންނާއި މި މަސައްކަތުގައި ޝާމިލުވާ ފަރާތްތަކަށްވެސް އެ ވުޒާރާ އިން ވަނީ ޝުކުރު ދަންނަވާފައެވެ.