މި އަހަރުގެ ފާއިތުވި އަށް މަހުގެ ތެރޭގައި ކާބޯތަކެތި ގެންގުޅޭ 1،579 ތަނެއް ބަލައި ފާސްކޮށް މުޅި ޖުމްލަ 14 ތަނެއް ބަންދުކޮށްފައިވާ ކަމަށް ސިއްޚީ ވަޒީރު ޑރ. އަބްދުﷲ ޚަލީލް ވިދާޅުވެއްޖެއެވެ.

ރާއްޖޭގައި ކާބޯތަކެތި އުފައްދާ ބައެއް ތަންތަނުގެ ސާފުތާހިރުކަން ދަށްވެ، އެތަންތަނުގެ ވީޑިޔޯ އާއި ފޮޓޯ މިފަހަކުން އައިސް މީސް މީޑިޔާގައި ދަނީ ދައުރުވަމުންނެވެ. އެކަންކަމާ ގުޅިގެން ސިއްޚި ވުޒާރާއާ އެކު ރާއްޖޭގެ ފުޑް އަދި ޑްރަގް އޮތޯރިޓީ އިން މިއަދު ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، ފާއިތުވި އަށް މަހުގެ ތެރޭގައި ގަވާއިދާ އެއްގޮތަށް ރަޖިސްޓްރީކޮށްގެން ހިންގާ 1،579 ތަނެއް އިދާރާތަކުން ބަލައި ފާސްކޮށްފައިވާ ކަމަށެވެ.

އެގޮތުން ބަލައި ފާސްކުރެވުނު ތަންތަނުގެ ތެރެއިން މުޅި ޖުމްލަ 14 ތަނެއް ބަންދުކުރެވި، މިހާތަނަށް 13 ތަނެއް އަލުން ހުޅުވިފައިވާ ކަމަށް ވަޒީރު ވިދާޅުވިއެވެ. ވަޒީރު ވިދާޅުވި ގޮތުގައި އެއް ތަނެއް އަދި ވެސް ހުޅުވާފައެއް ނުވެއެވެ.

ވަޒީރު އިތުރަށް ވިދާޅުވީ ރާއްޖޭގައި އާންމުކޮށް ނުތާހިރުކޮށް ހިންގާ ތަންތަނުގެ ގޮތުގައި ފާހަގަ ކުރެވިފައިވަނީ ސިއްރުން ހިންގާ ތަންތަން ކަމަށެވެ. އަދި އެފަދަ ތަންތަން އާންމު ގޮތެއްގައި ހިންގަނީ ގަވާއިދާ ޚިލާފަށް އުޅޭ ބިދޭސީން ކަމުގައި ވެސް ވަޒީރު ވިދާޅުވިއެވެ.