ޤައުމީ ޞިއްޙީ ލެބޯޓަރީ އަކީ އެމްއެފްޑީއޭގެ މަސައްކަތްތައް ހަރުދަނާކުރުމަށް ކުރެވޭ މުހިއްމު މަޝްރޫއެއް ކަމުގައި ޞިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގެ ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ އެމްއެފްޑީއޭއަށް މި އަހަރާއި އަންނަ އަހަރު ގެނެވޭ އެންމެ ބޮޑު ކުރިއެރުމަކީ ޤައުމީ ޞިއްޙީ ލެބޯޓަރީ ޤާއިމްކުރުމުގެ މަސައްކަތްކަމަށެވެ. މިއީ މިނިޒާމަށް ކުރިއަތް އޮތް ދެއަހަރު ބަދަލެއް ގެނުވާނެ މަސައްކަތެއްކަމަށް ވިދާޅުވިއެވެ.

ވަޒީރު ވިދާޅުވީ، ޤައުމީ ޞިއްޙީ ލެބޯޓަރީ މިހާރުހިނގަމުންދާ ޞިއްޙީ ވުޒާރާގެ އިމާރާތަކީ މިފަދަ ތަނެއް ހިންގުމަށް އެންމެ އެކަށީގެންވާ ތަނެއް ނޫންކަމަށެވެ. މި ގޮންޖެހުންތަކުން އަރައިގަނެ ހައްލު ހޯދުމަށްޓަކައި ޤައުމީ ލެބޯޓަރީ އިމާރާތްކުރުމަށް ބޭނުންވާ މަސައްކަތް ސަރުކާރާއި ޔޫރަޕިއަން އިންވެސްޓުމަންޓު ބޭންކުގެ ލޯނު އެހީގެ ދަށުން މަސައްކަތް ކުރަމުން އަންނަކަމަށް ވަޒީރު ވިދާޅުވިއެވެ.

Ad by Hajj Corporation

ވަޒީރު ވިދާޅުވީ މިއީ 25 މިލިޔަން ޑޮލަރުގެ ޕްރޮޖެކްޓެއް ކަމަށާއި މި މަޝްރޫޢުގެ ދަށުން ޤައުމީ ލެބޯޓަރީގެ ފީސިބިލިޓީ ހެދުމުގެ މަސައްކަތް ޖަރުމަންގެ ޖައިޓެކް ކޮންސަލްޓިން ޤްރޫޕާއި 1.2 މިލިޔަން ޑޮލަރަށް ހަވާލުކޮށްފައިވާ ކަމަށެވެ. އަދި މީގެ ބޮޑުބައެއް ނިމިފައިވާކަމަށާއި މިހާރު ކުރަމުންދަނީ ޑިޒައިންގ ކުރުމުގެ މަސައްކަތް ކަމަށް ވިދާޅުވިއެވެ.

ސިއްހީ ވަޒީރު ވިދާޅުވީ މިއަހަރުގެ ޖޫން ނުވަތަ ޖުލައި މަހުގެ ތެރޭގައި މަޝްރޫޢު ކޮންޓްރެޓްކުރުމަށް އިޢުލާންކުރެވޭނެކަމަށެވެ. މިކަމަށް ބޭނުންވާ 26،000 އަކަ ފޫޓުގެ ބިން ހުޅުމާލެއިން ހަމަޖެހިފައިވާކަމަށާއި މި ލެބޯޓަރީ ޤާއިމުކުރުމަށް ހަމަޖެހިފައިވަނީ ދެ އިމާރާތެއްގެ ގޮތުގައި ކަމަށް ވިދާޅުވިއެވެ.

އެގޮތުން 9 ފަންގިފިލާގެ އިމާރާތަކާއި 3 ފަންގިފިލާގެ އިމާރާތެއް ހެދުމަށް ހަމަޖެހިފައިވާ ކަމަށާއި މީގެ ތެރެއިން އެއް އިމާރާތް ޚާއްސަކުރާނީ އެމްއެފްޑީއޭގެ އިދާރީ އަދި ޓެކްނިކަލް މަސައްކަތްތަކަށް ވިދާޅުވިއެވެ. އަދި ދެވެނަ އިމާރާތް ޚާއްސަކުރާނީ ލެބޯޓަރީގެ މަސައްކަތްތަކަށް ޚާއްސަ އިމާރާތެއްގެ ގޮތުގައި ކަމަށް ވަޒީރު ވަނީ ވިދާޅުވެފައެވެ.