މިއަހަރުގެ ހެލްތު އެކްސްޕޯ އަންނަ ނޮވެންބަރު މަހު ބޭއްވުމަށް ހަމަޖެހިފައިވާކަމަށް ހެލްތު މިނިސްޓްރީން ހާމަކޮށްފިއެވެ.

ހެލްތު މިނިސްޓްރީން ވަނީ މި އެކްސްޕޯ އިންތިޒާމުކޮށްދޭނެ ބަޔަކު ހޯދަން އިއުލާންކޮށްފައެވެ.

މިނިސްޓްރީން ބުނީ، ހެލްތު އެކްސްޕޯ ބޭއްވުމަށް ހަމަޖެހިފައިވަނީ އަންނަ ނޮވެންބަރު މަހުގެ 13 ވަނަ ދުވަހުން ފެށިގެން 15 ވަނަ ދުވަހާ ހަމައަށް ކަމަށެވެ.

މިއީ ދުޅަހެޔޮ މުޖުތަމައެއް ބިނާކުރުމާއި އެ މިނިސްޓްރީން ކުރަމުން އަންނަ މަސައްކަތްތަކާއި ސިއްހީ ގޮތުން ދުޅަހެޔޮ އާދަތަކަށް ހޭލުންތެރިކުރުމާ ގުޅޭގޮތުން ރައްޔިތުންނަށް މައުލޫމާތު ފޯރުކޮށްދިނުމަށް ބާއްވާ އެކްސްޕޯއެއްކަމަށް އެ މިނިސްޓްރީން ވަނީ ބުނެފައެވެ.

Ad by Hajj Corporation

މި އެކްސްޕޯގައި 50 ސްޓޯލާއި ކާބޯތަކެތި ވިއްކާ 10 ސްޓޯލް ހުންނާނެކަމަށް އެ މިނިސްޓްރީން މައުލޫމާތު ދެއެވެ. އަދި ލަކީޑްރޯ ހޮވުމާއި ސްޓޭޖް ޝޯއެއް ކުރިއަށްގެންދިއުމަށްވެސް ހަމަޖެހިފައިވާ ކަމަށް އެ މިނިސްޓްރީން ވަނީ ބުނެފައެވެ.

ފާއިތުވި އަހަރު ބޭއްވި ހެލްތު އެކްސްޕޯގައި ހެލްތް މިނިސްޓްރީގެ އިތުރުން ހޮސްޕިޓަލްތަކާއި ސިއްހީ ހިދުމަތްދޭ އެހެނިހެން ތަންތަނާއި، މަދަނީ ޖަމްޢިއްޔާ ޖަމާއަތްތަކާއި އަމިއްލަ ފަރާތްތަކުން ބައިވެރިވެ، 50 އަށްވުރެ ގިނަ ސްޓޯލް ބަހައްޓާފައިވެއެވެ.