ހައްދުފަހަނައެޅި ޔަހޫދީ ބޮޑުވަޒީރު ބެންޖަމިން ނަތަންޔާހޫ ހައްޔަރު ކުރުމަށް ބައިނަލްއަޤްވާމީ ޖިނާޢީ ކޯޓު، އައިސީސީން ޢަމުރެއް ނެރެފައި ވަނިކޮށް އޭނާ ހަންގެރީއަށް ދިޔުމަށް ދަތުރު ފަށައިފިއެވެ.ޣައްޒާގައި ހިންގަމުންދާ ހަނގުރާމައިގެ ޖަރީމާތަކާ ގުޅިގެން އައިސީސީން އޭނާއާއި ޔަހޫދީ ދިފާއީ ވަޒީރު ޔޮއަވް ގަލަންޓް ހައްޔަރު ކުރުމަށް އައިސީސީން އަމުރެ ނެރުނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ.

ހަންގޭރިއަކީ އައި.ސީ.ސީގެ މެމްބަރު ޤައުމަކަށް ވީނަމަވެސް، އެ ޤައުމުގެ ވެރިން ވަނީ ނެތަންޔާހޫ ހައްޔަރުކުރުމަށް އިންކާރުކޮށްފައެވެ.

ހަންގެރީއަށް ޒިޔާރަތް ކުރުމަށް އެ ޤައުމުގެ ބޮޑުބަޒީރު ވިކްޓޯ އޯބާން ނަތަންޔާހޫއަށް ދައުވަތު ދީފައި ވަނީ އައިސީސީއިން އަމުރު ނެރުމުގެ އެއް ދުވަސް ފަހުންނެވެ.

ނަތަންޔާހޫ ހަންގެރީއަށް ކުރާ ހަތަރު ދުވަހުގެ ދަތުރުގައި އޯބާންއާ ބައްދަލު ކުރުމަށް ވެސް ވަނީ ހަމަޖެހިފައިވާއިރު އޭނާ ހައްޔަރުނުކުރާނެކަމަށާއި އައިސީސީން ގެ ނިންމުން ތަންފީޒު ނުކުރާނެކަމަށް ހަންގޭރީގެ ބޮޑުވަޒީރުވަނީ ބުނެފައެވެެ.

އައިސީސީގެ އަމުރަށްފަހު ނަތަންޔާހޫ ފުރަތަމަ ދަތުރު ކުރީ ފެބްރުއަރީ މަހު އެމެރިކާގެ ރައީސް ޑޮނަލްޑް ޓްރަމްޕް އާ ބައްދަލުކުރުމަށެވެ. އެމެރިކާއަކީ އައިސީސީގެ ގައުމެއްނޫނެވެ.އައި.ސީ.ސީ އިން ވަނީ ހަންގޭރިގެ މި ނިންމުމާމެދު ފާޑުކިޔާފައެވެ. އެ ކޯޓުގެ ތަރުޖަމާނު ފާދީ އަލް އަބްދުﷲ ވިދާޅުވީ، އައި.ސީ.ސީގެ ޤާނޫނީ ނިންމުންތަކުގެ ސައްޙަކަން ވަކި ފަރާތަކުން އަމިއްލައަށް ކަނޑައެޅުމަކީ ރަނގަޅު ގޮތެއް ނޫން ކަމަށެވެ.