އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް އަލަށް އިތުރުކުރި 75 އެނދު އަންނަ މޭ މަހު ބޭނުންކުރަން ފަށާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

"ރައްޔިތުންނާ އެކު" ޕޮޑްކާސްޓުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، މި ސަރުކާރާ ހަވާލުވިއިރު އައިޖީއެމްއެޗުގެ ފެންވަރު ހުރީ ދަށްކޮށް ކަމަށާއި، އެހެންކަމުން މިދިޔަ ދުވަސްތަކުގައި އެތަނުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް ކުރެވުނު ކަމަށެވެ. މި މަސައްކަތުގެ ތެރޭގައި 75 އެނދުގެ ޕްރޮޖެކްޓް ހިމެނޭ ކަމަށް އެމަނިކުފާނު ވިދާޅުވިއެވެ.

"ދެން އެންމެ އަވަހަށް ހުޅުވިގެން ދާނީ 75 އެނދުގެ ޕްރޮޖެކްޓް. އޭރުން ވަރަށް ބޮޑުތަނުން ޖާގަ އިތުރުވެގެން އެބަދޭ،" ރައީސް ވިދާޅުވިއެވެ.

ރައީސް މުޢިއްޒު ވިދާޅުވި ގޮތުގައި މި އައު ފެސިލިޓީގައި ޖެނެރަލް ވޯޑުގައި 44 އެނދާއި، ހައި ޑިޕެންޑެންސީގައި 15 އެނދާއި، އަދި 14 ޕްރައިވެޓް ޔުނިޓް ހިމެނޭނެއެވެ. މި އިތުރުކުރެވޭ އެނދުތަކުގެ ސަބަބުން މިހާރު އައިޖީއެމްއެޗަށް ދިމާވެފައިވާ ޖާގައިގެ ދަތިކަމަށް ބޮޑު ހައްލެއް އަންނާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ރައީސް މުޢިއްޒު ފާހަގަކުރެއްވި ގޮތުގައި އައިޖީއެމްއެޗްގައި ކުރެވުނު އިތުރު މަސައްކަތްތަކާއެކު ދަރުމަވަންތަ ހޮސްޕިޓަލާއި ހުޅުމާލޭ ހޮސްޕިޓަލު ވެސް ޓާޝަރީ ފެންވަރަށް ބަދަލުކޮށް ޚިދުމަތްތައް ވަނީ އިތުރުކޮށްފައެވެ. އަދި ވިލިމާލޭގައި ވެސް 100 އެނދުގެ ޓާޝަރީ ހޮސްޕިޓަލެއް އެޅުމަށް ޗައިނާ ސަރުކާރުން ދޭ ހިލޭ އެހީގެ ދަށުން ގާއިމުކުރާނެ ކަމަށާއި، މި މަޝްރޫޢުތަކަށް ފައިސާގެ ދަތިކަމެއް ނެތް ކަމަށް ވެސް އެމަނިކުފާނު ވިދާޅުވިއެވެ.

މި އައު ތަރައްޤީތަކާއެކު، ރާއްޖޭގެ ޞިއްޙީ ޚިދުމަތުގެ ފެންވަރު އިތުރަށް ރަނގަޅުވެ، ރައްޔިތުންނަށް ލިބޭ ޚިދުމަތްތައް ފުޅާވެގެންދާނެ ކަމަށް އުންމީދުކުރެވެއެވެ.