ފަލަސްތީނުގެ ޣައްޒާގައި ޔަހޫދީން ހިންގަމުން އަންނަ ގަތުލުއާއްމު މެދުކަނޑާލުމަށް ޔަހޫދީން ހުށަހެޅި އައު ޝަރުތުތަކަށް ހަމާސްއިން އިންކާރުކޮށްފިއެވެ.

ނަމަވެސް ހަނގުރާމަ މެދުކަނޑާލުމަށް މިޞްރުން ހުށަހަޅާފައިވާ އައު ހުށަހެޅުންތައް ބަލައިގަތުމަށް ނިންމާފައިވާކަމަށް ހަމާސްގެ އިސް އޮފިޝަލަކާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.

ޔަހޫދީން ޣައްޒާގައި ހިންގަމުންދާ ގަތުލުއާއްމު މެދުކަނޑާލުމަށް އެއްބަސްވުމަކަށް އައުމުގެ މެދުވެރިއެއްގެ ދައުރު އަދާކުރަނީ މިޞްރާއި ޤަޠަރުންނެވެ.

މިޞްރުގެ އައު ހުށަހެޅުންތަކުގައި އޮތީ ކުރިން އަމަލު ކުރި އެއްބަސްވުމުގެ މުއްދަތު 50 ދުވަހަށް އިތުރުކޮށް، ހަމާސްގެ ބެލުމުގެ ދަށުގައި ތިބި އަސީރުންގެ ތެރެއިން ފަސް މީހުން މިނިވަން ކުރުމަށެވެ. ބަދަލުގައި އަދި ޔަހޫދީންގެ ޖަލުތަކުގައި ލާއިންސާނީ އަނިޔާތައް ދެމުންދާ މުސްލިމުންގެ ތެރެއިން 250 މީހުންނާއި، ޣައްޒާއިން ހައްޔަރު ކޮށްފައިވާ 2,000 މީހުން މިނިވަން ކުރަންޖެހޭނެއެވެ.މީގެ އިތުރުން ޣައްޒާގެ އުތުރާއި ދެކުނު ވަކި ކުރުމަށާއި ދަތުރުފަތުރަށް ހުރަސްއެޅުމަށް ޔަހޫދީން ގާއިމުކޮށްފައިވާ ނެޓްޒަރިމް ކޮރިޑޯ ރޫޅާލުމާއި ސަރަހައްދީ ރޮނގުތައް ހުޅުވާލައި ޣައްޒާއަށް ކާބޯތަކެއްޗާއްި އިންސާނީ އެހީ އެތެރެކުރުމަށް އޮތް ހުރަސް ނައްތާލުންވެސް ހިމެނެއެވެ.

ނަމަވެސް މި ހުށަހެޅުމަށް ޔަހޫދީން އަންނަނީ އިންކާރުކުރަމުންނެވެ. އޭގެ ބަދަލުގައި އެއްބަސްވުމުގެ ފުރަތަމަ މަރުހަލާގެ މުއްދަތު 40 ދުވަހަށް އިތުރުކުރުން ހިމެނެއެވެ.

ޣައްޒާގައި ހިންގަމުން އަންނަ ގަތުލުއާއްމު އިތުރަށް ފުޅާކޮށް ޣައްޒާގެ ބައެއް ބިންތަކުން ފަލަސްތީނުގެ ރައްޔިތުން ބާލަން މަޖުބޫރުކޮށް އެ ބިންތައް ހުސްކުރުމާއެކު ޔަހުދީ ވަޒަންވެރިން އަންނަނީ ވަޒަންވެރިކުރުވަމުންނެވެ.

ފަލަސްތީނުގެ ބިންތަކާއި އެ ބިންތަކުގެ ކައިރީގައިވާ ލުބުނާނާއި ސީރިއާގެ ބިންތަކަށް ހަމަލާދިނުމަށްވެސް ޔަހުދީން ފަށާފައިވާއިރު މިއީ ޔަހޫދީން ޣައްޒާގައި ފަށާފައިވާ ގަތުލުއާއްމު މުޅި އެހިސާބަށް ފުޅާކުރުމުގެ ކޮޅުމަތިކަމަށް ބައިނަލްއަގްވާމީ މީޑިއާތަކުން ސިފަކުރެއެވެ.