ފަލަސްތީނުގެ ޣައްޒާއަށް ޔަހޫދީން ދެމުން އަންނަ ހަމަލާތަކުގައި ފާއިތުވި 24 ގަޑިއިރުގެ ތެރޭގައި 80 މީހުން ޝަހީދުކޮށްލައިފިއެވެ.

ފަލަސްތީނުގެ މީޑިއާތައް ބުނާގޮތުން އެންމެ ގިނަ މީހުން ޝަހީދުވެފައިވަނީ ޖަބަލިޔާ ރެފިއުޖީ ކޭމްޕްގައި ހުންނަ އދ. ގެ އަންރުވާ މެޑިކަލް ފެސިލިޓީއަށް ދިން މިސައިލް ހަމަލާއާ ގުޅިގެންނެވެ.

މިހަމަލާއާއ ގުޅިގެން ޔަހޫދީންނަށް ފާޑުކިޔުން އަމާޒުވެފައިވާއިރު މިހަމަލާގައި ގިނައިން ޝަހީދުވެފައިވަނީ އަންހެނުންނާއި ކުދަކުދިންނެވެ.

ޔަހޫދީންގެ ހައްދުފަހަނައެޅި ބޮޑުވަޒީރު ބެންޖަމިން ނަތަންޔާހޫ ވަނީ ޔަހޫދީން ދެމުންގެންދާ ލާއިންސާނީ ހަމަލާތައް ދިފާއުކޮށް ޣައްޒާގެ ސަރަހައްދުތައް ޔަހޫދީންގެ ބާރުގެ ދަށަށް ގެންނަމުންދާކަމަށް ބުނެފައެވެ.

ޣައްޒާގެ ސިއްޙީ ވުޒާރާއިން ބުނާ ގޮތުގައި އިސްރާއީލުން ދެމުންދާ ހަމަލާތަކުގައި ޝަހީދުވި މުސްލިމުންގެ އަދަދު ވަނީ 50،423 އަރާފައެވެ. އަދި ޒަހަމްވި މީހުންގެ އަދަދު 114،638 އަށް އަރައެވެ.

މީގެ އިތުރުން ހިފާފައިވާ ހުޅަނގު އައްސޭރީގައިވެސް ޔަހޫދީ ސިފައިން އަންނަނީ ގަތުލުއާއްމުތައް ހިންގަމުންނެވެ. އެގޮތުން މިއަދު ފަތިހު ހުޅަނގު އައްސޭރީގެ ރާމަﷲގެ ހުޅަނގަށް އޮންނަ ބައިތޫނިޔާއާއި ނާބުލުސް އާއި ސައްރާ އާއި ބައިތު ފޫރިކް އަށް ވަދެގަނެ އެތައް ބަޔަކަށް އަނިޔާކޮށް ކުށަކާ ނުލައި އެތައް ބަޔަކު ހައްޔަރުކޮށްފައިވާކަމަށް މީދިއާތަކުން ރިޕޯޓުކުރެއެވެ.

މިއަދުގެ ހަމަލާތަކާ ގުޅިގެން އަދި ޔަހޫދީ ސިފައިން އެއްވެސް އެއްޗެއް ބުނެފައި ނުވިނަމަވެސް މިފަދަ ހަމަލާތައް ދެމުންދަނީ ޓެރަރިޒަމާ ދެކޮޅަށް ކުރާ މަސައްކަތުގެ ތެރެއިން ކަމަށް ޔަހޫދީން އަންނަނީ ވަކާލާތުކުރަމުންނެވެ.

ފަލަސްޠީނުގެ އޮފިޝަލުން ވަނީ މިފަދަ ހަމަލާތައް ހުއްޓުވުމަށް ބާރު އަޅައިދިނުމަށް ދުނިޔެއަށް ގޮވާލާފައެވެ.