logoEN
ޚަބަރު

ސަރުކާރު ސްކޫލްތަކުގައި ދަރިވަރުންގެ އިސްވާރުން ހޮވާނެ ގޮތުގެ އުޞޫލެއް

އާމިނަތު ސަފާއާމިނަތު ސަފާ

03 އޭޕްރީލު 2025 - 09:24

ސަރުކާރުން ހިންގާ ސްކޫލްތަކުގައި ދަރިވަރުންގެ އިސްވާރުން ހޮވާނެ ގޮތުގެ އުޞޫލެއް ކަނޑައަޅައި އަންނަ ދިރާސީ އަހަރުން ފެށިގެން އެ އުޞޫލަށް އަމަލުކުރަން ސްކޫލްތަކަށް އެޑިޔުކޭޝަން މިނިސްޓްރީން އަންގައިފިއެވެ.

މިދިޔަ ފެބުރުވަރީ މަހުގެ 24 ވަނަ ދުވަހު ސްކޫލްތަކަށް އެޑިޔުކޭޝަން މިނިސްޓްރީން ފޮނުވި ސަރކިއުލާގައި ބުނެފައި ވަނީ، ދަރިވަރުން އިސްނެގުމާއި ހުނަރު ތަރައްޤީކުރުމަށް ސްކޫލްތަކުގައި ހުރިހާ ދަރިވަރުން ޝާމިލުވާ ގޮތަށް ފުރުޞަތު ފަހިކޮށް ދިނުމަކީ ތައުލީމީ ސިޔާސަތެއް ކަމަށާއި، "ދަރިވަރުންގެ އިސްވާރުން ހޮވާނެ ގޮތުގެ އުޞޫލު" އެ މިނިސްޓްރީން އެކުލަވާލީ ހުރިހާ ދަރިވަރުންނަށް އެ ފަދަ ފުރުޞަތު ފަހިވާގޮތަށް ސްކޫލްތަކުގެ މަޝްވަރާއާ އެކު ކަމަށެވެ. އެ ސަރކިއުލާގައި ބުނެފައިވާ ގޮތުން އެ އުޞޫލުގައި ހިމެނޭ ދަރިވަރުން ހޮވާ ޝަރުޠުތަކަށް އަމަލުކުރަން ފަށާނީ 2026 ވަނަ އަހަރު ފަށާ ދިރާސީ އާ އަހަރުން ފެށިގެންނެވެ. ނަމަވެސް އެ އުޞޫލުގައި ހިމެނޭ އެހެން ބައިތަކަށް އަމަލުކުރަން ފަށާނީ އަންނަ އެޕްރީލް މަހުގެ ހަތް ވަނަ ދުވަހު ފަށާ ދިރާސީ އަހަރާ އެކުގައެވެ.

އިސްވާރުން ހޮވާނެ ގޮތުގެ އުޞޫލުގެ ތައާރާފުގައި ބުނެފައިވާ ގޮތުގައި، ދަރިވަރުންގެ އިސްވާރު މަޤާމްތަކަކީ ދަރިވަރުންގެ އުމުރާއި ވިސްނުމުގެ ތަރައްޤީއާއެކު ވަކި ގުރޭޑްތަކުން މަތީގެ ދަރިވަރުންނަށް ޚާއްޞަ ކުރެވިފައިވާ މަޤާމްތަކެކެވެ. ނަމަވެސް ކޮންމެ ދަރިވަރަކީ ވެސް ތަފާތު ހުނަރުތަކެއް ލިބިގެންވާ ދަރިވަރަކަށްވާތީ ސްކޫލްތަކުގައި ދަރިވަރުންނަށް ފަހިކޮށްދޭ ލީޑަރޝިޕް ތަރައްޤީ ކުރުމުގެ ފުރުޞަތު ވާންވާނީ ހުރިހާ ކުދިން ޝާމިލު ކުރެވޭ ފުރުޞަތުތަކަށެވެ. ދަރިވަރުންގެ އިސްވާރުގެ މަޤާމްތައް ކަނޑައަޅާނީ އެ ސްކޫލެއްގެ އާބާދީއާއި އެ ސްކޫލެއްގައި ތަޢުލީމް ފޯރުކޮށްދޭ ކީސްޓޭޖަށް އަދި ސްކޫލުގައި ހިންގާ އިތުރުހަރަކާތްތަކަށް ރިޢާޔަތްކޮށްގެންނެވެ. ޕްރިފެކްޓް ބޯޑާއި ސްޓޫޑެންޓް ކައުންސިލުގެ މުއްތަކީ ދިރާސީ އެއް އަހަރެވެ.

އިސްވާރުންގެ މަޤާމުގެ ގޮތުގައި ކޮންމެ ސްކޫލެއްގައި ވެސް އޮންނަންޖެހޭނެ މަޤާމްތަކެއް ކަނޑައަޅާފައިވެއެވެ. އެއީ ސްކޫލް ކެޕްޓަނާއި ސްކޫލް ޑެޕިއުޓީ ކެޕްޓަނުގެ އިތުރުން އެކްޓިވިޓީ ކެޕްޓަނެވެ. މީގެ އިތުރުން ސްކޫލްތަކުން ހިންގާ އިތުރު ހަރަކާތްތަކަށް ބަލައި އިތުރު މަޤާމްތައް އިތުރުކުރެވިދާނެއެވެ. އެގޮތަށް އިތުރު ކުރާ މަޤާމްތަކުގެ ތެރޭގައި ހިމެނޭނީ ޑެޕިއުޓީ އެކްޓިވިޓީ ކެޕްޓަނާއި ހައުސްތަކުގެ ކެޕްޓަނުންނާއި ކުލަބު ތަކުގެ ރައީސުންނާއި ނާއިބު ރައީސުންނާއި ޔުނިފޯމް ހަރަކާތްތަކުގެ ލީޑަރުންނާއި ނާއިބު ލީޑަރުންނެވެ.

އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަޙްމަދު މުޙައްމަދު ސޮއިކުރައްވައި، ސްކޫލްތަކަށް ފޮނުއްވި ސަރކިއުލާގައި، ބުނެފައިވާ ގޮތުގައި، ކީ ސްޓޭޖް 2އާ ހަމައަށް ކިޔަވައިދޭ ސްކޫލްތަކުން ޕްރިފެކްޓުން ހޮވާނެ އެންމެ ދަށް ގުރޭޑަކީ ގުރޭޑް 5އެވެ. ކީ ސްޓޭޖް 3އާއި 4އާއި އަދި 5އަށް ކިޔަވައިދޭ ސްކޫލްތަކުން ޕްރިފެކްޓުން ހޮވާނެ އެންމެ ދަށް ގުރޭޑަކީ ގުރޭޑް 7އެވެ.

އިސްވާރުންގެ އިސް މަޤާމްތައް އެކުލަވާލާއިރު ޝަރުޠު ހަމަވާ ހުރިހާ ދަރިވަރުންނަށް ފުރުޞަތު ލިބޭ ގޮތަށް ކޮންމެ ސްކޫލަކުން ވެސް އެ ސްކޫލެއްގެ އެސްއޯޕީ އެކުލަވާލަންޖެހެއެވެ. މި އެސްއޯޕީގައި، ދަރިވަރުންގެ އިސްވާރުންގެ އިސް މަޤާމްތަކަށް ދެ ޖިންސްގެ ދަރިވަރުންނަށް ހަމަހަމަ ފުރުޞަތުތަކެއް ލިބޭ ގޮތަށް އިންތިޒާމް ކުރަންޖެހެއެވެ.

އިސްވާރުންގެ އިސް މަޤާމްތަކުގެ ތެރޭގައި ހިމެނޭ، ކެޕްޓަނާއި ޑެޕިއުޓީ ކެޕްޓަނާއި އެކްޓިވިޓީ ކެޕްޓަނާއި ޑެޕިއުޓީ ކެޕްޓަން ކަމަށް ކުރިމަތިލެވޭނީ ސްކޫލުގެ ޕްރިފެކްޓެއްގެ މަޤާމުގައި ހުރި ދަރިވަރަކަށެވެ. އިސްވާރުންގެ އިސް މަޤާމްތަކަށް ދަރިވަރުން ހޮވުމުގައި ޕޮއިންޓްދޭނެ ގޮތުގެ މިންގަނޑެއް ވެސް އެކުލަވާލާފައިވެއެވެ. މި މިންގަނޑުގައިވާ ގޮތުން، ޕޮއިންޓް ދޭންޖެހެނީ:

1- އެކަޑެމިކް: 40 އިންސައްތަ

2- އިތުރު ޙަރަކާތްތައް: 20 އިންސައްތަ

3- އަޚުލާޤު: 15 އިންސައްތަ

4- ހާޒިރީ: 10 އިންސައްތަ

5- ދަރިވަރުންގެ ވޯޓް: 15 އިންސައްތަ

އިސްވާރުންގެ އެންމެ އިސް މަޤާމްތަކަށް ދަރިވަރުން ހޮވުމުގައި އެ މަޤާމްތަކަށް ކުރިމަތިލާފައިވާ ދަރިވަރުންނަށް ޕޮއިންޓް ދިނުމަށްފަހު، ކޮންމެ ދަރިވަރެއްގެ ވެސް ބެލެނިވެރިޔާ ނުވަތަ ދަރިވަރު ތަމްސީލުކުރާ ފަރާތާއެކު ބައްދަލުވުމެއް ބާއްވާ ޕޮއިންޓް ދެވުނު ގޮތުގެ ތަފްޞީލް ހިއްސާކުރަންޖެހެއެވެ. މި ބައްދަލުވުން ބާއްވާތާ 3 ދުވަސްފަހުން ދަރިވަރުންނަށް ދީފައިވާ ޕޮއިންޓް ޕްރިންސިޕަލް މެދުވެރިކޮށް ފައިނަލް ލިސްޓް އެންޑޯޒް ކުރަންޖެހެއެވެ.

ކޮންމެ އަހަރެއްގެ ދަރިވަރުންގެ އިސްވާރުން ހޮވުމުގެ މަސައްކަތް ކުރުމަށް ސްކޫލުގެ އެސްއެމްޓީ (ޕްރިންސިޕަލް ނުހިމަނާ) މުދައްރިސުން ހިމެނޭހެން 3 ނޫނީ 5 މެމްބަރުންގެ ވިލަރެސް ކޮމިޓީއެއް ޕްރިންސިޕަލް އެކުލަވާލަންޖެހެއެވެ. ކޮންމެ ސްކޫލަކުން ވެސް ދިރާސީ އަހަރު ފެށޭ ދުވަހުން ފެށިގެން ހަ ހަފްތާ ތެރޭގައި ދަރިވަރުންގެ އިސްވާރު މަޤާމުތަކަށް އަދި ޕްރިފެކްޓް ބޯޑަށް ދަރިވަރުން ހޮވާ ނިންމަންވާނެ ކަމަށް އުޞޫލުގައި ބުނެފައިވެއެވެ.

އެޑިޔުކޭޝަން މިނިސްޓްރީގެ އުޞޫލުގައި ބުނެފައިވާ ގޮތުން އިސްވާރު ދަރިވަރުން އަދި ޕްރިފެކްޓްކަން ލިބޭ ދަރިވަރުން ސްކޫލް ޔުނިފޯމްއާއެކު ބޭނުން ކުރާނީ ދަރިވަރު އަދާކުރާ މަޤާމް އަންގައިދޭ ޓެގް އެކެވެ. އޭގެ އިތުރުން ސްކޫލް ޔުނިފޯމްއަށް އިތުރު އެއްވެސް ބަދަލެއް ނާންނާނެއެވެ. ނަމަވެސް އިސްވާރު ދަރިވަރުންނަށް ސްކޫލް އަދި ޤައުމީ ފެންވަރުގައި ބޭއްވޭ އެކި ޙަރަކާތްތަކުގައި ބައިވެރިވުމަށް ޔުނިފޯމާއި އެކު ސޭޝް ބޭނުން ކުރެވިދާނެއެވެ.

ދަރިވަރުންގެ އިސްވާރުގެ މަޤާމްތަކަށް އަދި ޕްރިފެކްޓް ބޯޑަށް ހޮވޭ ދަރިވަރުންނަށް މަޤާމް ހަވާލުކުރާނީ ސްކޫލުގެ އެސެމްބްލީގައެވެ.

ދަރިވަރުންގެ އިސްވާރުން ހޮވާނެ ގޮތުގެ އުޞޫލުގައި ބުނެފައިވާ ގޮތުން، ޔުނިފޯމް ހަރަކާތްތަކުގެ ލީޑަރުންނާއި ކުލަބުތަކުގެ ރައީސުންނާއި ނައިބުން ހޮވުމުގައި ބަލާނެ ގޮތްތަކާއި އިންތިޙާބު ކުރާނެ ގޮތް ހިމަނާފައިވެއެވެ. އަދި ދަރިވަރުން ކެމްޕޭން ކުރާނެ ގޮތްތަކާއި އެކަން ކުރާނެ ގޮތް ބަޔާންކޮށްފައިވެއެވެ.

ކޮމެންޓް

871x217_placeholder