ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް މާލޭގެ ދެ ސަރަހައްދެއް ބަލައި ފާސްކޮށް 13 ބިދޭސީން އަތުލައިގެންފިއެވެ.

މާލޭގެ އިތުރުން އިމިގްރޭޝަނުން ވަނީ އެ މުއައްސަސާގެ އޮޕަރޭޝަންތައް އަތޮޅުތެރެއަށް ވެސް ފުޅާކޮށްފައެވެ. އެގޮތުން މި މަހު ރ. ދުވާފަރުގައި ހިންގި އޮޕަރޭޝަނެއްގައި ގަވާއިދާ ޚިލާފަށް އުޅެމުންދިޔަ 51 ބިދޭސީއަކު ވަނީ އަތުލައިގެންފައެވެ.

ގަވާއިދާ ޚިލާފަށް ރާއްޖޭގައި އުޅެމުންދާ ބިދޭސީން ހޯދުމަށް އިމިގްރޭޝަންގެ ޓާސްކް ފޯސްއިން އިއްޔެ ވަނީ ޒިކުރާ މިސްކިތް ސަރަހައްދާއި ބޮނޑިބަތް ޕާކު ސަރަހައްދު ބަލައި ފާސްކޮށްފައެވެ. މި ދެ ސަރަހައްދަކީ ވެސް އާންމުކޮށް ގިނަ ބިދޭސީން އުޅޭ ދެ ސަރަހައްދެވެ. 

އިމިގްރޭޝަނުން ބުނީ ޒިކުރާ މިސްކިތް އަދި ބޮނޑިބަތް ޕާކު ސަރަޙައްދުގައި ހަރަކާތްތެރިވަމުން ދިޔަ ބިދޭސީން މި އޮޕަރޭޝަނުގެ ތެރެއިން ބަލައި ފާސްކޮށްފައި ވާ ކަމަށެވެ. އެގޮތުން، 35 ބިދޭސީއަކު ޗެކުކޮށް އޭގެތެރެއިން 13 މީހަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް އެ މުއައްސަސާއިން މައުލޫމާތު ދެއެވެ.