ބިދޭސީންނާ ގުޅުންހުރި އެކި ފީތައް ނުދައްކާ 8000އަށްވުރެ ގިނަ ފަރާތް އެކްސްޕެޓް ސިސްޓަމްގެ ތެރެއިން ސަސްޕެންޑްކޮށްފިއެވެ.

ހޯމް މިނިސްޓްރީއިން ހާމަކުރި ގޮތުގައި، ބިދޭސީންނާ ގުޅުންހުރި އެކިއެކި ފީތައް ނުދައްކާ ހުރި 8000 އަށްވުރެ ގިނަ ފަރާތެއް އެކްސްޕެޓް ސިސްޓަމުން ވަނީ ސަސްޕެންޑް ކުރެވިފައެވެ. މިއީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރެވޭ މަސައްކަތުގެ ތެރެއިން އެޅުނު ފިޔަވަޅެކެވެ.

Ad by Hajj Corporation

2023 ވަނަ އަހަރުގެ ޑިސެމްބަރު މަހުގައި، ސަރުކާރުގެ ކަމާބެހޭ އެންމެހާ މުއައްސަސާތައް ގުޅިގެން، ރާއްޖޭގައި ހުއްދަނެތި ދިރިއުޅޭ ބިދޭސީންގެ މައްސަލަ ހައްލުކުރުމުގެ މަސައްކަތް ފެށިއެވެ. މީގެ ތެރޭގައި ބިދޭސީންގެ ބަޔޯމެޓްރިކްސް ނެގުމާއި، އެކްސްޕެޓް ސިސްޓަމް ވަރުގަދަކުރުމާއި، ދައުލަތަށް ދައްކަންޖެހޭ ފައިސާ ހޯދުމާއި، ބިދޭސީން ޤާނޫނީ އިމުގެ ތެރެއަށް ވެއްދުމުގެ މަސައްކަތް ހިމެނެއެވެ.

ހޯމް މިނިސްޓްރީގެ ސްޓޭޓް މިނިސްޓަރ ޢަބްދުލްމަޖީދު އިބްރާހީމް ދައުލަތުގެ މީޑިއާއަށް މައުލޫމާތުދެއްވަމުން ވިދާޅުވި ގޮތުގައި، ދައުލަތަށް ލިބެންޖެހޭ 1.7 ބިލިއަން ރުފިޔާގެ ތެރެއިން މިހާތަނަށް 1.2 ބިލިއަން ރުފިޔާ ވަނީ ހޯދިފައެވެ. އަދި މިހާރު ނިޒާމު ބައްޓަންކުރެވެމުންދަނީ ފީ ނުދައްކާ ފަރާތްތަކަށް ދައުލަތުގެ އެއްވެސް ޚިދުމަތެއް ނުލިބޭނެ ގޮތަށެވެ.

އެކްސްޕެޓް ޕޯޓަލްގައި ރަޖިސްޓްރީވެފައިވާ 68000 ވަޒީފާދޭ ފަރާތުގެ ތެރެއިން 8900 ފަރާތެއް ވަނީ ފައިސާ ނުދެއްކުމުގެ ސަބަބުން ސަސްޕެންޑް ކުރެވިފައެވެ. އަދި ބޮޑެތި އަދަދުތަކުން ޖޫރިމަނާ ދައްކަންޖެހޭ ފަރާތްތަކަށް އިންސްޓޯލްމަންޓް އުސޫލުން ފައިސާ ދެއްކުމުގެ ފުރުސަތު ދެވި، އޮކްޓޯބަރުގައި ހަމަވާ މުއްދަތު އިތުރުކުރުމަށް ވަނީ ނިންމާފައެވެ.